Read Phom Naga EZEKIEL 20 Bible Online

EZEKIEL 20 - Phom Naga bible

EZEKIEL 20

¹Bong nyet mü len ngapabü nyih anpabü kü Israel am behethü hanei SHEMBÜPA kü phehen shingvaishi peiyei ngei touei uoteke.

²Hahepak kü SHEMBÜPAlei shah ngei touei pei:

³Shennyak ha, SHEMBÜPA Kahvangi hapakei enyüke shei hathü Israel mübüthü kü etuh: Amphongi ngei kü phehen peiküpü je? Hingmei ngeiyü vanyangyem Kahvang, amphongi ngei kü meheyao nephehüpih shei SHEMBÜPA Kahvangi enyüke.

⁴Nüngi jomei shahphenhen je, Oh shennyak ha? Nüngi jomei shahphenhen je? Shejema jomei bühipai dükpü jiühitnalaipü douthü nyinghütuh,

⁵hatü hathü kü, SHEMBÜPAi hapakei enyüke shei etuh: Ngei Israel am jepü nyih, ngei Jakobei hühihathü kü lahpeih Ijip kahdokei ngei jom touei shakei vamei hupeih. Ngelei lak haongtü, “Ngeiyü SHEMBÜPA, ammei Kahvang” shei lahpeih.

⁶Hapa nyih ngei jomphong kü Ijip kahdok leipü ngei jom shing yempü kahdok, amma hatü nyahjiü mon yenpü, kahdok peü shak kü müknyinshekhangpü kahdokei müei leihen lahpeih.

⁷Hatü ngei jom kü, “Ammei mük mopü jiühitbenüng douthü peü yaktüktuh, am peüi, hatü Ijip amei lajeithü homei am nedaü-i teleihü; ngeiyü SHEMBÜPA, ammei Kahvang” shei etepih.

⁸Shejao jomi ngei khüei yaong hatü ngei epü kü nebang; jom üpayao jomei mük mopü jiühitpü douthü neyaktük, nevaijü jomi Ijip amei lajeithü netuhphong. Hahepak kü jom Ijiplei nyushiüng ngei ngelei mongshih jom kü khüphühen shei deihteke.

⁹Shejao ngei ngelei men kü, jom mü nyupü jatthüi eeshi ngelei men netenhühen, hatü jomi eeshi ngei jomphong Ijip leipü müei leihen shei nyinghütükpü nangkü ngei ha nedükpeih.

¹⁰Hanangkü ngei jom Ijip leipü müei daiyei jahpan thahhüpeih.

¹¹Jomi ha dükei yemmü nyuhen nangkü ngei ngelei vanglem hatü shahkung jom kü shuohpeih.

¹²Ngei, SHEMBÜPAi jom daütükpeih shei nyinghühen nangkü ngei hatü jom aa kü nyangeihepü hük vaishi ngei jom kü Sabbath themhen shuohpeih.

¹³Shejao Israel am phangi jahpanei ngei khüei yaongpeih; jomi ngelei vanglemthü nenotei, shejao ngelei Sabbath longi mangtükpeih; jomi paoh ha düklangmeyü yemmü nyuhen vaipeih. Hahepak kü jahpanei nyushiüng jom men mahtükhen ngei ngelei mongshih khüpeilangei shuohjü hiang shei deihpeih.

¹⁴Shejao ngei ngelei men kü, jatthü eeshi ngelei men netenhen shingvaishi, jomi eeshi ngei Israel am müei lüdaipü nangkü ngei ha nedükpeih.

¹⁵Anyei vaishi amma hatü nyahjiü mon yenpü kahdok, kahdokthü peü mü müknyinshekhangpü kahdokei ngei jom müei nedaipih shei jahpanei nyushi ngei jom kü lahpeih,

¹⁶Mehenangkü jomi ngelei vanglemthü yaktük, hatü ngelei shahkungthü nenotei; jomei mongdang lajeithü phei lüdaitü ngelei Sabbath mangtükpeih.

¹⁷Shejoongpa ngei jom kü shinshangei deih, hatü ngei jom jahpanei nyushi jom nejütük nevaijü nemahtükkem.

¹⁸Ha nangjeiyei ngei jomei thehilathü kü ammei nyühipathülei vanglem kü tekam, jomei shahkung kü tedai, nevaijü jomei lajeithü homei am nedaü-i telei shei epeih.

¹⁹Ngeiyü SHEMBÜPA, ammei Kahvang; ngelei shahkungthü phei mütuh, hatü ngelei vanglemthü noteihen kenhingtuh,

²⁰hatü ngei hatü am aa kü nyangeihepü mepa Sabbath nyüpa, ha daüeilangei tuhtuh, shejüang ammi ngeiyü SHEMBÜPA, ammei Kahvang shei nyinghen.

²¹Shejao hapa hühihathüi ngei khüei yaongteke: Jomi ngelei vanglem kü nemü, ngelei shahkung noteihen khih shei jomi kenhingei nedeih, hatü ngelei Sabbath mangtükpeih. Jomi hathü paoh bangei düklangmeyü yemmü nyuhen. Hanangkü jahpanei nyushi ngelei mongshih ngei jom kü khüpeilangei shuohhen deihpeih.

²²Shejao ngei ngelei lak shounglangpeih, hatü ngelei men kü, hatü jatthüi eeshi ngelei men netenhen, hatü jomi eeshi ngei jom müei leilangpü nangkü ngei ha nedükpeih.

²³Nyeinya vaishi ngei jom kü jahpanei nyushi ngei jomü jatthü touei, hatü kahmük laolao kü haitükhen shei lah-ei epeih;

²⁴mehenangkü jomi ngelei vanglemthü nenotei, shejao ngelei shahkung yaktük hatü Sabbath mangtük, hatü jomei müki chebü chepa amei lajeithü kü veihampeih.

²⁵Nyeinya vaishi ngei jom kü nemeipü shahkung hatü jom yemmü nenyuaokhen vanglem neshuoh-angpih.

²⁶Jomi ngeiyü SHEMBÜPA khih shei nyinghen shangmü ngei jomei thinthothü jomei shongei shaanpü yem moila peü ngei sheihtükpeih, hatü ngei jom nyempai mahü.

²⁷Hanangkü shennyak ha, SHEMBÜPA Kahvangi hapakei enyüke shei Israel nanglakthü kü eyeishuoh: Hapa keiha ambü ampai ngei kü eelahampeih.

²⁸Ngei jom kü shuohhen shei lahpü kahdokei mechem ngei jom müei leipa, jomi melemei shangtao hatü phenlak ngetpü püthü eepa, hatouei jomi jakpü moila shuohhampeih; halei jomi vong meipü ngü bühüei, yiü moila shuohhampeih.

²⁹Ngei jomphong kü, “Amphong aongteipü shangtaothüyü meheang?” shei phepeih. Hanangkü shinnyih thahshi hapa kü “Bamah” shei nyüknyeih.

³⁰Hanangkü SHEMBÜPAi hapakei enyüke shei Israel am phang kü etuh: Amphongi ambü ampa am kei nyuei am nedaüi leihen hatü jiühitpü douthü dükei lemnyong kü daihen je?

³¹Mechem ammi moila shuohhen hatü ammei hapeüthü aw kü jakei moila shuohhenshang, ammei lajeithü homei am nyingi nedaüi leinyüke. Hakei tuhtü amphongi ngei kü phehen je, Oh Israel phang? Ngeiyü vanyangyem Kahvang, amphongi ngei kü lanshei nephehen shei SHEMBÜPA Kahvangi enyüke.

³²Ammei mongei, “Jenao mih jatthü kei nyushah, yaong hi pü chongphopü jatthü kei nyushah” shei deihpü ha nejiüküpih.

³³Hingmei ngeiyü SHEMBÜPA, vanyangyem Kahvang, ngei mongshihpai ngelei wong kohpü laki ngelei ngan kempai ngei am shak kü vanglem lemhen shei shahvüng shuohnyeih.

³⁴Ngei amphongü lebü nanglakthü khong kübü tukei ngaihen hatü kahmükthülei haidaipü ngelei laklu wong longpai mongshihpai thaiyei leihen;

³⁵hatü ngei amphongü mih nanglakthülei jahpanei müei daihen hatü halei ngei am kü dhe dhe pongei shahphenhen.

³⁶Ngei jahpanei ambü ampa amei shahphenpükei ngei ammei shahphenhen shei SHEMBÜPA Kahvangi enyüke.

³⁷Ngei ngelei lenshuoh phangkü am shümei tuhhen, hatü vangpüshuwpü phangkü ngei am shaei tuhhen.

³⁸Amphong khong mü nyupü khüei yaongpüthü, hatü ngei khüei mang thahpüthü ngei shaaptükhen; jom benha kei nyupü kahdok leipü ngei jom mülanghen, shejao jom Israel kahdokei neshüaokhen. Shejüang ammi ngeiyü SHEMBÜPA Kahvang khih shei nyinghen.

³⁹Oh Israel am phang, amphong kü SHEMBÜPA Kahvangi hapakei enyüke: Shaang am peü daiyei lajeithü chongphotuh hatü hapheikü amphongi ngei epü nebang, shejao lajeithü kü jakpü moila shuoh-ei ngelei daülangpü men tesheihtük.

⁴⁰Mehenangkü ngelei daülangpü kahshang, Israel kahshang shaopülei Israel am phang kemei, jom peü hapa kahdokei jomi ngei chongphohen. Halei ngei jom yahhen, hatü halei ngei jomei moila hatü jomei meipü thintho hatü daülangpü douthü peü yahhen shei SHEMBÜPA Kahvangi enyüke.

⁴¹Vong meipü meli keiha halei ngei am yahhen, ngei amphong mih nanglakthü hatü lebü kahmükthülei haidaipü peü thaiyei leihen; jatthüi eeshi ngei ngelei daülangshemshepü shakei vamhühen.

⁴²Mechem ngei ambü ampa kü shuohhen shei epü Israel kahdokei müei leihenshang, amphongi ngeiyü SHEMBÜPA shei nyinghen.

⁴³Halei ammi ammei lemthü, hatü ami sheihtükpü douthü peü deih-ei danghen, hatü ammi dükpü mangthü deih-ei am nyingi jiühitei deihkahen.

⁴⁴Ngei ngelei men kü mechem am mü ammei mang shangshi nevai, nevaijü nemeipü douthü aimü nevai-i ngei ha dükhenshang, Oh Israel am phang, ammi ngeiyü SHEMBÜPA Kahvang khih shei nyinghen shei SHEMBÜPA Kahvangi enyüke.

⁴⁵SHEMBÜPAlei shah ngei touei pei:

⁴⁶Shennyak ha, pehe philei nüngei dhe meetuh, pehe am hatü Negeb am khüei chongventuh hatü jom khüei hapa teteivanei,

⁴⁷Negeb am kü, SHEMBÜPAi hapakei enyüke shei etuh: Ngei am kü aw bahhühen, hatü hapai thüngshingpü pü hatü vandaipü pü peü hahtükhen; hapa bahpü awlom nemetdaihen hatü apsha kübü pehe thahshi hapai shaamhühen.

⁴⁸Peüei müki hapa aw-ü ngei, SHEMBÜPAi bahhüpü khih shei eehen, hatü hapa nemetdaihen.

⁴⁹Hahepak kü ngei, “Oh SHEMBÜPA Kahvang, ngeiyü düngei shahlap mon enyüke shei jomphongi ngei kü enyüke” shei eteke.