Read Phom Naga EZEKIEL 21 Bible Online

EZEKIEL 21 - Phom Naga bible

EZEKIEL 21

¹SHEMBÜPAlei shah ngei touei pei.

²“Shennyak ha, Jerusalem khüei nüngei dhe meetuh hatü khümshing khüei chongventuh. Israel kahdok khüei teteivantuh,

³hatü pinnyü kü SHEMBÜPAi hapakei enyüke shei etuh: Ngei am khüei nyüpeih. Ngei ngelei yanlu nohen hatü am peü nemeipü meipü nyiphen jühen.

⁴Mehenangkü ngei am nemeipü meipü peü jühen vaipü nangkü, ngei apsha hatü pehe thahshi kübü shennyak peü khüei ngei yanpishung kübü yanlu tukei yahhen.

⁵Shejüang nanglak peüi ngei, SHEMBÜPAi yanpishung kübü yanlu tukei yahteke hatü ha ne-yei nelaaplanghen shei nyinghen.”

⁶Hanangkü mahng theptuh, shennyak ha! Jomi eeshi mongdang mangei shahyaki mong kü tüngei theptuh.

⁷Hatü mechem jomphongi nüng kü, “Nüng mehekei thepnya?” shei ephüjü, nüngi jom kü, “Shahjang peiküpü nangkü” shei ehen. Peüha mong maandaihen hatü lak shaokdaihen, peüei laangha kuidaihen hatü peüei lashüh wong nekoh-i yung kei leidaihen. Hapa ngoikünyüke! Hapa hingmei vamküshasha shei SHEMBÜPA Kahvangi enyüke.

⁸SHEMBÜPAlei shah ngei touei pei:

⁹Shennyak ha, hapa teteivanei etuh; SHEMBÜPAi hapakei enyüke shei etuh: “Yanlu hük, yanlu hük yütüktü nyüke, hapayü thittüktü nyüke;

¹⁰Hapayü jühen nangkü yütüktü nyüke, klang kei nyephen shingvaishi thittüktü nyüke! Mekei etü jen mongongshi nyuhen? Ammi yeanpü hatü ungei-aeipü peü yaktükteke.

¹¹Hapa yanü lakei shümhen shingvaishi thittükpeih; Hapayü shennyak jübülei lakei nohen yütükpeih.

¹²Mong kü tüngei theptuh, Oh shennyak ha; mehenangkü hapayü ngelei nanglak khüei nyüke; Hapayü Israel ongthü khüei nyüke; Jomphongü ngelei nanglakthü mü chemi jühen yepei shüktüknyüke. Hanangkü jaaba kü daüpei theptuh.”

¹³Deihhümao: Mehe! Amphongi yeanpü yaktükpai shei hapa dokpü nepeihen je? shei SHEMBÜPA Kahvangi enyüke.

¹⁴Hanangkü, nüng shennyak ha, teteivanei etuh, hatü yan hi yan bapteihütuh. Yanlu nyipa jempa thahshi bapteihütuh. Hapayü jüteishangteipü yanlu. Hapayü jüteipü yanlu longpü, hapayü jom shinei nyüke.

¹⁵Hapai ngelei nanglakthülei mong maandaihen, hatü longshi shing huluh shuohhen. Jomei penyüsha kemeilei ngei jom jühen yan notü tapei tuh-ei nyüpeih. Oh! hapayü klang kei nyelepshi nyüke, hatü hapayü jühen nangkü thittüktü nyüke.

¹⁶Oh yanlu, laknyong lakdah melemei nüngei nah meenya, jütuh.

¹⁷Ngeiyao ngelei lak apei ngei mongshihpü meihen. Ngei, SHEMBÜPAi ha etepih.

¹⁸SHEMBÜPAlei shah ngei touei pei:

¹⁹“Shennyak ha, kahmük hük kübü chongpangei Babylon ongpalei yanlu peihen lem nyi laettuh. Chingnyülei phaakei aongpü lembaong peü kü füo haongei tuhtuh.

²⁰Lem hükü Ammon amei chingnyü Rabbahlei yanlu noei peihen lem, hatü hükpayü Judah, hatü penyü showtükpü Jerusalem am khüei yanlu noei peihen lem laettuh.

²¹Mehenangkü Babylon ongpai hapa lem nyi phaakpü lembaongei yaongtü phongyomhen; büpai laophülei lajei kü pheyeiyuhen; hatü moila shuohpü yemha dhen yah-ei phongyomhen.

²²Büpalei lakdah philei Jerusalemei lashüh jung penyü laamhen pülu temhen, jühen nangkü nyükhen, thep nyükhen, penyüshathü khüei penyü laamhen pülu temhen, lateen lingei ching hahhen shangdü linghen noshi nyüke.

²³Shejao jomphong shingvaishi hapayü shahshem phongyompükei nyuhen; jomi vangeishuwei lahteke shejao büpai jom pungpü mang deih-ei danghühen, hatü jom wüpküpei müei daihen.”

²⁴Hanangkü SHEMBÜPA Kahvangi hapakei enyüke: Mehenangkü am nanglakthüi ngaiheyei khüei yaongpai ammei mang shakei vamhüpü nangkü; ammi dükpü lemphü kü mang shakei vamhüpü nangkü am wüpküpei yah-ei daihen.

²⁵“Oh sheihdaipü hatü nemeipü Israel ong, am hanghihen dohpü nyihhihe ngoiteke.

²⁶SHEMBÜPA Kahvangi hapakei enyüke: Shangshak yahlangtuh, ong athen bhühtüktuh; douthü hapakei lakshing nechongkahen. Phangei nyupü longei antuh. shaoshi nyupü peekei shantuh.

²⁷Mangtükhen! mangtükhen! ngei hapa chingnyü mangtükhen! Shejao hapa chingnyü hanghihühen nangkü ngei jepü shennyak mangpei thahshi ha nevamhen. Hapa pheikü mon ngei büpa kü hapa shuohhen.”

²⁸“Shennyak ha, nüngi ha teteivantuh hatü etuh: Ammon am hatü jomi eelapü nangkü SHEMBÜPA Kahvangi hapakei enyüke. ‘Yanlu hük, yanlu hük, jühen tukei anteke; Jühen shingvaishi klang kei nyangshi jintükteke.

²⁹Ammi eepü manghkhang peü shahshem, ammi teteivanpü peü kemei shahshem, Mahhen nyupü nemeipüthü, hanghihen dohpü nyih hatü hepak ngoidaitü nyupüthülei ngaümtüng kü ha baphen.

³⁰Hapa yan yanpishungei laaptüktuh! Nüng lingpü shingei nüng vampü kahdokei ngei nüng kü shahphenhen.

³¹Ngelei mongshih ngei nüng kü khüphen, hatü ngelei mongshih awlom nüng kü bahhühen. Mahtükhen longi manpü amei lak kü ngei am laneishuohtükhen.

³²Amphongü awbhaong kübü awjung kei nyuhen, ammei kahdokei ammei iy yenhen; hajük kü am deih-ei nedanghen; mehenangkü ha ngei, SHEMBÜPAi etepih.’ ”