Read Phom Naga EZEKIEL 22 Bible Online

EZEKIEL 22 - Phom Naga bible

EZEKIEL 22

¹SHEMBÜPAlei shah ngei touei pei:

²“Shennyak ha, nüngi hapa jüteishangteipai maei nyupü chingnyü kü shahphenhen hiang? Pinnyüi dükpü jiühitnalaipü douthü peü eyeishuoh.

³SHEMBÜPA Kahvangi hapakei enyüke, shei etuh: Laophülei nanglakthü jüei iy yenhüpü hatü lajei kü khümei mang thahpü chingnyü, hepak ngoiteke.

⁴Ammi yenhüpü iy homei am pungteke, hatü ammi lingpü lajei homei am sheihdaiteke; ammi-üng nyih shoh-ei leihahteke; dohhen ittükpü ammei vangbongthü ngoiteke. Hanangkü ngei jatthü touei amphongü ne-ienelempü dou hük, hatü kahmükthü peü touei mihnyipü leitükhen.

⁵Üam yopailei hatü tailuei nyu, peüi am kü eelahen, Oh shanghah vongshüh-i maei nyupü men neshiüpü chingnyü.”

⁶“Veituh, Israel ongthü peüi iy yenhühen laophülei wong nonyüke.

⁷Hapa chingnyü kü nyupü peüi nyühipa kü dhüm neshuohnyu; hapa chingnyülei nyupü benhayahathü leipü aeteishenyüke; hashihha hatü vaümnyüthü nyongtüknyüke.

⁸Ammi ngelei daülangpü douthü dhüm neshiüi yakphong hatü ngelei Sabbath nyih mangtükteke.

⁹Hapa chingnyülei haneiyü mih jühen nangkü shahshem enyüke; shennyak haneiyü lajeithü kü moilapü hahying hahnyüke, hatü iyjeiphailei dou düknyüke.

¹⁰Hapa chingnyülei hanei laophülei palei nyüha mü shinyüke, hatü nyühathü hangha tenpü hepak kü jemteinyüke.

¹¹Hüki chingyowpalei nyüha mü mükbongjuyungnyüke hatü lebü hüki laophülei hapeülei nyühathü mü hatü laophülei naüpeü mü douten düknyüke.

¹²Hapa chingnyülei shennyakthü mih jühen nangkü yawhdou yahnyüke; ammi nyeishi lop kü lop bhüei yahnyüke, hatü chingyowthü leipü aeteisheyei nanglei dangnyüke, hatü amphongi ngei betükteke shei SHEMBÜPA Kahvangi enyüke.”

¹³Am gühpü kaaipü hatü mih jüpü nangkü ngei ngelei lak nyipheni amphong kü üphen.

¹⁴Ngei am kü dou dükei yaongpü nyih am monglongei nyuaokhen je nevaijü ammei lak wong kohshi nyuaokhen je? Ngei, SHEMBÜPAi ha etepih, hatü ngei hapa dükhen.

¹⁵Ngei amphong jatthü touei yantükhen, hatü kahmükthü peü touei haitükhen, hatü ammei doutenthü ngei dohtükhühen.

¹⁶Mechem am jatthü touei nedaünelangi leihenshang, shejüang ammi ngeiyü SHEMBÜPA khih shei nyinghen.

¹⁷SHEMBÜPAlei shah ngei touei pei:

¹⁸Shennyak ha, Israel am phangü ngei touei makhishak leidaiteke; jom peü langnyiam, dam, nyiam, hatü laktetnyiam awbhaongei aoei nyupükei nyüke. Jomphongü awbhaong leipü nyiamhet kei nyüke.

¹⁹Hanangkü SHEMBÜPA Kahvangi ha enyüke: “Am peü ngei touei makhishak leidaipü nangkü ngei am Jerusalemei thailanghen.

²⁰Shennyakthüi ngin, langnyiam, dam, nyiam hatü laktetnyiam nyaühühen shingvaishi nyahpü awbhaongei thaihüpü keiha ngei mongshihpai am thaiyei chingnyü mongei tuhtü nyaütükhen.

²¹Ngei am thaihen hatü ngelei mongshih-i am nyaühühen.

²²Awbhaongei nyiam nyaüpü keiha am halei nyaühen, shejüang ngei, SHEMBÜPAi am kü ngelei mongshih khüpphopü khih shei ammi nyinghen.”

²³SHEMBÜPAlei shah ngei touei pei:

²⁴“Shennyak ha, Israel am kü eyeishuoh, mongshihpü nyih ammei kahdokei baihivang nekei-i nyupeih.

²⁵Mailangi yemhimak jüei shaakpükei haleipü ongthüi laophülei nanglakthü jütüktü jomei lop hatü mophimo peü aokpükei yahlangnyüke, hatü jomi jüpü nangkü hashih vaümnyü longi vamhünyüke.

²⁶Ngongpathüi ngelei shahkungnyüthü mangtüknyüke hatü ngelei daülangpü douthü sheihtüknyüke; jomi daülangpü hatü nedaünelangpü nyi baong nehannyu; daülangpü hi nedaünelangpü nyi aa kü hayaoha hanpü neshiüpih shei nyuhnyüke; jomphong touei ngei nedaü-i leihühen shingvaishi jomi Sabbath kü dhüm neshuohnyu.

²⁷Jomei lakchongbüthüyü shahhing ne-epü mop danghen shingvaishi shuwi yemhimak jüei shaakpükei nyüke, iy yenhüei jünyüke.

²⁸Haleipü thibüthüi bhamba kü dhon yungi phupükei phuei jomei mang jonyüke; jomi shahshem manghkhang eenyüke. Ngei ne-epü kü jomphongi ngei epükei, ‘SHEMBÜPAi hapakei enyüke’ shei enyüke.

²⁹Hapa kahdok kübü shennyakthüi aeteishenyüke hatü gühnyüke; jomphongi taopathü hatü nehahneyingpüthü kü shüveinyüke hatü yenpa-oupathü kü aeteisheyei nejiüi düknyüke.

³⁰Ngei hapa kahdok nemangtükhen shingvaishi hapa kahdokei men kü mangdaipü bham baongei yaonghen nangkü ngei shennyak hanei yemteke shejao hükao nedang.

³¹Hanangkü ngelei mongshih ngei jom kü khüpshuohhen hatü awi kei ngelei mongshih-i jom hahtükhen; jomi dükpü dou ngei jomei shangjing kü koei leitüktih shei SHEMBÜPA Kahvangi enyüke.”