Read Phom Naga EZEKIEL 23 Bible Online

EZEKIEL 23 - Phom Naga bible

EZEKIEL 23

²Shennyak ha, nyü hükei yiükha nyi nyuteke.

³Jijinyi-i hashih mebü Ijiplei büm yuei pai mü ngühpü la den mahtükpeih.

⁴Chenyalei men Oholah hatü naü-eenyülei menü Oholibah nyu. Jijinyiyü ngei yahpeih hatü hapeüthü bühteke. Oholahyü Samaria lappü, hatü Oholibahyü Jerusalem lappü nyüke.

⁵Ngei mü shem yemei tuhtü Oholah-i Assyria am veshanthü,

⁶ow thüngshingi owpüthü, nethe meipü governor hatü veshan mübüthü hatü koyei veshanthü mü büm yuei nyupeih.

⁷Pinnyü laophü nyingi Assyria am lupülongpüthü peü mü büm yuei nyuteke, hatü pinnyüi büm yushuohpüthülei lajeithü peü mü pinnyü sheihteke.

⁸Pinnyüi nela hepak Ijiplei bahathü mü shiyei, büm kü bhiteiphaüei pai mü ngühpü nela den mahhüei nyupü shaang thahshi ha neyakphongang.

⁹Hanangkü pinnyüi büm yushuohpü Assyria am chemai am kü ngei pinnyü lanei shuohtükpeih.

¹⁰Jomi pinnyü bümkong tuhphong; pinnyülei hapeüthü müei daiyei yani jütükpeih. Pinnyü-ü nyühathü khongkü mihnyi pü leihü, hatü pinnyü kü hanghi shuohpeih.

¹¹Chenaü Oholibah-i ha eeteke, shejao pinnyü-üng nemeipüba lei, hatü Oholah mao nyeinya büm yupü am leipeih.

¹²Pinnyüao Assyria am hamhiman, veshan mübüthü, ve-ow changshi owpü hampathü, koyei veshanthü hatü nethe meipü nethethü mü büm yuei nyupeih.

¹³Pinnyü nyingi sheihdaipü ngei eeteke; jijinyiphen aihük lembien lem kü daiteke.

¹⁴Shejao pinnyüi büm yupü dou anyei nemeipüba dük. Pinnyüi bhamba kü shennyakei lajei, Babylon amei lajei hakpüh-i bakshi,

¹⁵shüng kü shüngshep sheptü hatü longi meipü shangshak ngeihtü eeteke.

¹⁶Pinnyüi hathü eehinüng hathü mü iyjeiphaileihüei deih, hatü Babylonei pinnyüi shah shomteke.

¹⁷Hapheikü Babylon ami pinnyü mü mükbongjuyunghen pei, hatü jomi pinnyü sheihtük hatü pinnyüi shompülei jom kü tengei nyokei leidai.

¹⁸Mechem pinnyüi ngaiheyei büm yuei, pinnyülei bümkong mih kü hupa, ngei tengei chenya toueipü lüdaipükei ngei pinnyü toueipü lüdaipeih.

¹⁹Shejao pinnyü nela hepak kü Ijiplei büm yuei nyupü nyihthü deih-ei pinnyü nyeinya nyeinya büm yupü am leidaipeih.

²⁰Halei pinnyüi gadu nevaijü koyeithüi keiha nyeinya mükbongjuyung dükei hathü mü büm yuei nyuteke.

²¹Hanangkü nüng nela hepak Ijiplei mükbongjuyungei, nüngei büm kü bhithahphaühah-ei laophülei la den tentükpü ha shao dükhünyüke.

²²Hanangkü Oh Oholibah, SHEMBÜPA Kahvangi hapakei enyüke: Ngei nüngi tengei tuhphongpü chühimaithü nüng khüei yaonghühen hatü ngei nüng khüei shing peü lemeipü hathü vamhühen.

²³Babylon hatü Kaldea am, Pekod, Shoa hatü Koa, hatü jom mü Assyria am nethe meipü nethethü, lakchongbüthü, veshan mübüthü, koyei khari lakchongbüthü, laphen shaopü shennyakthü hatü koyeithü peü müei peihen.

²⁴Jomphongi nüng khüei lahhilaong noshi, koyei khari hatü kharithü halei shennyak khongnyü omshi inyüshung hatü nyiam athen longpü maanpü notü lem peü philei nüng khüei peikahen. Hanghihühen shingvaishi ngei jom kü nüng shuohhen, hatü jomi jomei laphen aimü nüng kü hanghi shuohhen.

²⁵Ngei mongshihpü nüng khüei shomhen, hatü jomi mongshih-ei nüng kü nohen. Jomi ammei shong hatü dhaong vettükhen, hatü am yangei nyupüthü yani mahhen. Jomi ammei hapeüthü yah-ei lüdaihen, hatü ha kübü yangei nyupüthü awi hahtükhen.

²⁶Jomi ammei ashakviha nyiuklanghen, hatü ammei chühiyük meipü yahlanghen.

²⁷Hanangkü ammi Ijiplei dükei chongpangpü iyjeiphailei hatü büm yupü dohtükhühen. Ammi ha douthü kü mong yungei nevaijü hajük kü Ijip nedeihhen.

²⁸SHEMBÜPA Kahvangi hapa enyüke: Ammi jiühitpü hatü ammi tengei tuhtü lüdaipüthü küang ngei am shuohtükhen.

²⁹Jomi am kü jiühitei nohen hatü ammi nyiuei dükhahpü lemphü yah-ei lüdaihen. Jomi amü bümkong hatü baibai tuhphonghen, hatü ammi büm yupü veüpong shakei vamkahen. Am iyjeiphaileipü hatü büm yupü homei,

³⁰am touei ha koei peipeih, mehenangkü ammi jatthü mü büm yuteke, hatü jomei lajeithü mü am nyingi sheihteke.

³¹Nüngi anyalei lem kü lüdaipü nangkü ngei pinnyülei yungshong nüngei lak kü shümhühen.

³²SHEMBÜPA Kahvangi hapakei enyüke: Nüngi anyalei yungshong longpü hatü chüpü yinghen; Hapai mih-i nyipüwapü hatü ne-ienelempü koei peikahen; mehenangkü hapayü maei nyüke.

³³Nüngü chokpüngapü hatü mongmang, maei nyuhen. Bentükpü hatü lavüngtoipü yungshongü, anya Samarialei yungshong.

³⁴Nüngi hapa yinghen hatü heenei yaktükhen; Nüngi ha khih mü nihtükhen, hatü hapa nihpai nüngei amma shaaktükhen. Ngei ha etepih shei SHEMBÜPA Kahvangi enyüke.

³⁵Hanangkü SHEMBÜPA Kahvangi ha enyüke: Nüngi ngei betük hatü nüngei ngaümpheilei yaktükpü nangkü nüng iyjeiphailei hatü büm yuei kamteipü mang nüngi kohen.

³⁶SHEMBÜPAi ngei kü eteke: “Shennyak ha, nüngi Oholah hatü Oholibah nyi kü shahphenhen hiang? Hapheikü jijinyi-i dükpü jiühitnalaipü dou jung eyeishuoh.

³⁷Mehenangkü jijinyi-i mükbongjuyung dükteke, hatü jijilei lakei iy nyüke; jijilei lajei mü jiji mükbongjuyung dükteke, hatü jijinyi-i ngei kü bühphopü hapeüthü jijilei lajeithü kü moila shuohnyüke.

³⁸Jijinyi-i hapayao ngei kü dükphopeih: Jijinyi ngelei daülangpü shem sheihtük hatü ngelei Sabbath mangtükpeih.

³⁹Jijilei lajeithü kü jijilei hapeüthü moila shuohpü nyih-üng jijinyi ngelei daülangpü shemei shüei hapa sheihtükpeih. Jijinyi-i ngelei shemei ha dükpeih.”

⁴⁰Jijinyi-i phongmokbüthü tailu leipü shennyakthü nyükhen shomteke hatü jom peiteke. Jom shingvaishi anjinyi-i hangha lak, mük kü meli nyio, hatü ownyülangha owteke.

⁴¹Jijinyi-i uoshing meipü kü uo hatü ha shekü haüdü hük haütü hapa shangkü ngelei ayingshü hatü mainga haüteke.

⁴²Pinnyü shinei nehetpü khong hükei ngeü dan; yingnyü leipü khong longi yiüi chokdaitü müei lei, hatü jomphongi nyühathülei lak kü laktet hatü hathülei shangjing kü nethe meipü athen thenhüteke.

⁴³Oh pinnyü-ü mükbongjuyung dükei chang leidaipü shennyak khih shei ngei eteke, shejao jomi pinnyü mü mükbongjuyung dükteke.

⁴⁴Mehenangkü shennyak hük büm yupü am touei peipükei jomi pinnyü touei peiteke. Hapa keiha jomi nehetpü nyüha Oholah hatü Oholibah nyi mü shiteke.

⁴⁵Shejao daülangpü shennyakthüi hathü kü mükbongjuyung hatü jüpü nangkü shahphenhen; mehenangkü jomü mükbongjuyungthü hatü jomei lakei iy lüpshi nyüke.

⁴⁶SHEMBÜPA Kahvangi hapakei enyüke: Jiji khüei khongnyü hük müei leikei hatü jijinyi nyempühanpü hatü lupülempü amei lak kü shuohtüktuh.

⁴⁷Hapa khongnyüi jiji kü yaongi shükhen hatü yani bapei jühen; jomi jijilei hapeüthü jühen hatü jijilei shem peü awi haptükhen.

⁴⁸Hanangkü ngei hapa kahdok kübü iyjeiphailei mahtükhen, shejüang nyühathü peüi hapa shahvüng yahhen hatü jijilei dükhiling kü neveihen.

⁴⁹Anjinyi iyjeiphaileipü nangkü hanghi ponghen hatü lajei kü khümpü mang anji-i kohen. Shejüang anjinyi-i ngeiyü SHEMBÜPA, Kahvang khih shei nyinghen.