Read Phom Naga EZEKIEL 24 Bible Online

EZEKIEL 24 - Phom Naga bible

EZEKIEL 24

¹Bong shü, lenyang an mü nyih anpabü kü SHEMBÜPAlei shah ngei touei pei:

²“Shennyak ha, hapa nyih, shinnyihpü nyih nyangei tuhtuh. Mehenangkü Babylon ongpai hapa nyih Jerusalem shümei pangteke.

³Hapa khüei yaongpü nanglakthü kü, ‘SHEMBÜPA Kahvangi hapa shahlap enyüke’ shei etuh: Nükdük chantuh, ha chantuh, ha kü yung shihtuh.

⁴Hapa kü phaiphu meipü shihtuh, phaidao meipü la hatü bhag shihtuh. Hapa kü vang meipü maei shihtuh.

⁵Mi khongkü meipüba hük yah-ei hapa phangkü vang müphen pü shüngtuh; hapa vang meishi müpei halei cheütuh.”

⁶Hanangkü SHEMBÜPA Kahvangi hapakei enyüke: Jüteipai maei nyupü chingnyü Onyükei! Nevaüpü dük düi hahpükei nyüke. Phaiphu hük pheikü hük leptuh, hükao aoei tetuhphong.

⁷Pinnyüi laophü mongei iy yenhüteke. Bhihla-i nelintükaokhen mü yaongba shangei haishi nyüke.

⁸Mongshih vamhahhen hatü bhüh yemhen shingvaishi, hapa iy mehe-iyao neküpi yaongba kü haiphongpeih.

⁹Hanangkü SHEMBÜPA Kahvangi hapakei enyüke: Jüteipai maei nyupü chingnyü Onyükei! Ngei awbhaong longi shao bhaongei tuhhen.

¹⁰Pü longi bhaongtuh hatü aw hapeishuoh. Haohilai mü nyettü phai meishi cheütuh, hapalei vang aw kü jakeishuoh.

¹¹Hapa dük kong awkhin shangkü haüeishuoh, hatü hapa hakpüh-i leihütuh. Hapheikü mon hapa dük leipü dü hahtüktü daülangi leikahen.

¹²Angsha kü ngei nyiueinangei nyupeih; haleipü dü awiyao nedaühüaok.

¹³Ngei nüngei iyjeiphaileipü ngei daüphüjao, nüngi nüngei nühinam kübü daüei nenyu. Hanangkü ngei nüng kü mongshihpü hüshemei mangdük thahshi sheyü nüng nedaühühen.

¹⁴Ngei, SHEMBÜPAi etepih; ngei dou dükhen hepak ngoiteke. Ngei lak neyünghen, ngei lak neshih-i neaophonghen, hatü ngei nejü-üi dükhen. Nüngei lemthü hatü douthü aimü ngei shahphenhen shei SHEMBÜPA Kahvangi enyüke.

¹⁵SHEMBÜPAi ngei kü eteke:

¹⁶“Shennyak ha, ngei chem mon lak shihpü kü nüngei mük kü meipü shennyak yahlanghen mü nyüpeih. Nüngi ha kü teyoung, tethep hatü mükphi teyen.

¹⁷Huituh, shejao wongmü nevai; dipü am nangkü mahng tethep. Shangshak shaktuh, lathuh thuhtuh; nüngi ju kü tejüm nevaijü mahng bhaong tehah.

¹⁸Hanangkü ngei nanglakthü kü nepnüng ha eshuohteke, hatü om kü ngelei nyüha didai. Hatü nepphei ngei kü ephopükei ngei dükteke.”

¹⁹Nanglakthüi ngei kü, “Hathü douthüi ham kü mehe dükphahen nüngi hamphong kü ne-ephahen je?” shei pheteke.

²⁰Hanangkü ngei jomphong kü e, “SHEMBÜPAlei shah ngei touei peiteke:

²¹‘SHEMBÜPA Kahvangi Israel am phang changmeihen wong dangpü, ammei mük kü meipü, ammei mongi lümpü phopshem ngei sheihtükhen hatü ammi tuhphongpü hapeüthü yani mahhen.

²²Ngei dükpükei ammi dükhen; ammi ammei ju kü nejümhen nevaijü mahng bhaong nehahhen.

²³Ammei shangshak peü ammei shangjing kü shakhen, hatü la kü ammei lathuhthü thuhhen; am neyounghen nevaijü nethephen, shejao ammei mang homei ammei wong laaidaihen, hatü hüki hük mü mahng thephen.

²⁴Hapa keiha Ezekiel-ü am shingvaishi nyangeihepü hük nyukahen; büpai dükpükei ammi dükhen. Mechem ha peikahenshang, ammi ngeiyü SHEMBÜPA Kahvang shei nyinghen.’ ”

²⁵Hatü nüng, shennyak ha, mechem ngei jomi wong dangpü, jomei mongong hatü jomei müknyinshekhang, jomei mük kü meipü, hatü jomei mongi lümpü phopshem hatü jomei hapeüthü yah-ei lüdaihenshang,

²⁶hapa nyih yangei daipü shennyaki am touei hapa shahjang ephahen peikahen.

²⁷Hapa nyih amphongi yangpü shennyak touei ammei ju kaei ehen hatü hajük kü nenmü nenyuhen. Hanangkü amphongü jom kü nyangeihepü vaihen, hatü jomi ngeiyü SHEMBÜPA shei nyinghen.