Read Phom Naga EZEKIEL 25 Bible Online

EZEKIEL 25 - Phom Naga bible

EZEKIEL 25

¹SHEMBÜPAlei shah ngei touei pei:

²“Shennyak ha, Ammon am philei nüngei dhe meetuh hatü jom khüei tetei etuh.

³Jomphong kü, ‘SHEMBÜPA Kahvangei shah bangtuh. SHEMBÜPA Kahvangi hapakei enyüke’ shei etuh: Mechem ngelei phopshem sheihtükpa, hatü Israel kahdok lavüngtoiyei nyupü hepak kü, hatü Judah nanglakthü wüpküpei daishingkü ‘Hüha’ shei epü nangkü,

⁴ngei amphong Heong nanglakthü kü lanei shuohtükhen. Jomi am touei baümtapthü hatü ashakshem vehen; jomi ammei betjük hahtükhen hatü ammei amma yingtükhen.

⁵Ngei Rabbah chingü utthüi het hahying, hatü Ammonü mikhong nyiumei shing leitükhen. Shejüang ammi ngeiyü SHEMBÜPA khih” shei nyinghen.

⁶SHEMBÜPA Kahvangi hapakei enyüke: “Mehenangkü ammi Israel kahdok khüei ammei lak apei, la shoupei, mong kü ten kohshi mongongpü nangkü,

⁷ngei ngelei lak am khüei nohen, hatü jatthüi ammei mophimo aetlanghen lanei shuohhen. Ngei jatthü khong kübü am katitükhen hatü kahmükthü khong kübü am dohtükhen. Ngei am mahtükhen hatü ammi ngeiyü SHEMBÜPA khih shei nyinghen.”

⁸SHEMBÜPA Kahvangi hapakei enyüke: Mehenangkü Moab hatü Seir ami, “Veituh, Judah amao lebü jatthü kei leidaiteke,” shei epü nangkü,

⁹Moab kahdok viong kü vepa hungpü müknyinshekhangpü Beth-Jeshimoth, Baal-Meon, hatü Kiriathaim chingnyüthü hahtükhen.

¹⁰Ngei Ammon am mü chemi Moab am Heong leipü shennyakthü kü shuohtükhen; sheyü Ammon amü jatthü khongkü deih-ei nedanghen,

¹¹hatü ngei Moab am kü hanghi shuohhen. Shejüang jomi ngeiyü SHEMBÜPA Kahvang khih shei nyinghen.

¹²SHEMBÜPA Kahvangi hapakei enyüke: “Mehenangkü Edom ami Judah am phang kü bhüh yem, hatü hapa dükpai pungpü nangkü,

¹³SHEMBÜPA Kahvangi hapakei enyüke: Ngei Edom am khüei ngelei lak nohen, hatü haleipü shennyakthü hatü yemhimakthü jütükhen. Ngei hapa ching lavüngtoiyei tuhhen, hatü Teman kübü Dedan thahshi jomphong yani mahkemhen.

¹⁴Ngei ngelei nanglak Israel amei lak homei Edom am kü ngei bhüh yemhen, hatü jomphongi Edom am kü ngelei mongshih aimü dükhen; jomi ngei bhüh yempü nyinghen shei SHEMBÜPA Kahvangi enyüke.”

¹⁵SHEMBÜPA Kahvangi hapakei enyüke: “Mehenangkü Philistia ami bhüh yem, hatü jomei mongei bhüh yemei deihpü nangkü, hatü aivang den mü ponghok vanshengpai Judah mahtükhen yempü nangkü,

¹⁶SHEMBÜPA Kahvangi hapakei enyüke: Ngei Philistia am khüei ngelei lak nohen yopailei nyüpeih, hatü ngei Kereth hatü yungkung kü nyupüthü mahtükhen.

¹⁷Ngei jom kü longpü bhüh yemhen, hatü ngei mongshihpai jom kü hanghi shuohhen. Mechem ngei jom kü bhüh yemhenshang, jomi ngeiyü SHEMBÜPA khih shei nyinghen.”