Read Phom Naga EZEKIEL 26 Bible Online

EZEKIEL 26 - Phom Naga bible

EZEKIEL 26

¹Wüpküpei nyupü bong anpühükpabü len shongpü nyih kü SHEMBÜPAlei shah ngei touei pei:

²Shennyak ha, mehenangkü Tyre ami Jerusalem nangkü, “Aha, jatthü kü showpü penyüsha bendaiteke, hatü hapa shaden ngei kü apei nyüke; sheyü pinnyü-ü mangtükteke, ngei daeisheyei leihen” shei eteke.

³Hanangkü SHEMBÜPA Kahvangi hapakei enyüke: Ngei nüng khüei nyüpeih, Oh Tyre, hatü yungchingi laophülei yung lahao deishihpükei ngei nüng khüei jatthü longi müei leikahen.

⁴Jomi Tyre amei bhamthü mangtükhen, hatü haleipü shangdüthü shemtükhen; ngei haleipü nyüphinya peü maotükhen, hatü ma-ao neshiüpü yaongba kei tuhphonghen.

⁵Yungching jiamei nyah yepbüthüi shang yeemteipü shing leihühen. Ngei, SHEMBÜPAi ha etepih. Jatthüi Tyre am yuhahhen,

⁶hatü jomei yani hapa kahdok jilathü kübü shennyakthü jütükhen. Shejüang jomi ngeiyü SHEMBÜPA shei nyinghen.

⁷SHEMBÜPA Kahvangi hapakei enyüke: “Ngei Tyre am khüei apshaphi leipü Babylon am Nebukadnezzar ongpa, ongthü khong kü ong, büpa mü koyeithü, koyei kharithü, koyei veshanthü hatü longpü, wong kohpü veshanthü müei peihen.

⁸Büpalei yani ammei kahdok jilathü hahhen; büpai am shümei yahhen, vepathü kahsha shoei, bham shangkü thai chanei anhen hatü am khüei inyüshung shonghen.

⁹Jomi ammei bham shüh-ei laamtükhen hatü büpalei ay-i shangdü peü shemtükhen.

¹⁰Büpalei koyeithü longi nyupü nangkü hathüi kübhihla pungpai nüng jümlanghen. Bendaipü chingnyü penyüsha benei shüshingkü jomei vehok koyeithü, khari hatü koyei kharithülei ngeüi ammei bhamthü jenhen.

¹¹Büpalei koyei dhaoki nüngei chingyangshong peü shouptükhen. Büpai nüngei nanglakthü yani mahhühen, hatü nüngei wong kohpü shemnyüthü kahdokei laamtükhen.

¹²Jomi nüngei mophimo aetlanghen, hatü ammei dounyünangba gühlanghen; jomi ammei bhamthü mangtükhen hatü ammei shem meipüthü bentükhen. Ammei yaong, pü hatü kahcheü peü yungei yaktükhen.

¹³Ammei dhaongnok na-aang keshothü ngei dohtükkemhen; ammei lyre vüngpü ngeü hajük kü nedanhen.

¹⁴Meheyao neshiüpü yaongba kei ngei am leitükhen; ammei shingü shang yeemteipü shing leitükhen. Ammei chingnyü hajük kü leiyei nelingaokhen shei ngei, SHEMBÜPAi etepih shei SHEMBÜPA Kahvangi enyüke.”

¹⁵SHEMBÜPA Kahvangi Tyre am kü hapakei enyüke: Mechem am hahpü hatü mahpüchahpü ngeü vamhenshang yungching yungkungei nyupüthüi nenyemhen je?

¹⁶Hahepak kü yungkungei nyupü ongthüi laophülei ong uoshing kübü shühhen; hatü jomi jomei bhagthuh bhühtükhen hatü hoitükpü ashakviha nyiuktüktü kheüei kahdokei uohen. Ammei lashüh shangba eeyei longi nyempai kheüpü nedohhen.

¹⁷Jomi am kü hapa mahng kesho lokphahen: “Oh men-e chingnyü, nüng mekei yungching leipü mahdaipa? Chemü nüng hatü nüngei nanglakthüyü yungching shang kao am wong kohpü nyuhampeih; Halei nyupüthü kü ammi nyemshaohampeih.

¹⁸Shaang am dopü nyih kü yungching yungkungei nyupüthüi kheünyüke; Yungching shübaongi am mangdaipü eeyei nyemnyüke.”

¹⁹SHEMBÜPA Kahvangi hapakei enyüke: “Mechem ngei am shennyak nenyupü chingnyü kei lavüngtoiyei leitükhen, hatü chüpü yungching yah-ei peiyei yungi am lümlanghenshang,

²⁰hahepak kü ngei amphong dipü kahdokei aivang den mebü nyudaipü shennyakthü mü nyuhen shomhen. Denden mangdaipü kahmong leipü kahdoknyülei dipüthü mü nyuhen shomtükhen. Ha tata kü yemmü nyupü kahdokei ne-yei chingchingei nenyuhen.

²¹Ngei am kü nyembenüng dohpütenpü hük koei peikahen. Am yemjao hajük kü am nedanghen shei SHEMBÜPA Kahvangi enyüke.”