Read Phom Naga EZEKIEL 27 Bible Online

EZEKIEL 27 - Phom Naga bible

EZEKIEL 27

¹SHEMBÜPAlei shah ngei touei pei:

²Shennyak ha, Tyre am kü mahng kesho hük lokeishuoh.

³Yungching yungkungei nyutü yungkungei nyupü jatthü peü mü bhei leihpü Tyre am kü hapakei etuh. SHEMBÜPA Kahvangi hapakei enyüke: “Tyre, hamü den ngoishi nethe meipeih” shei ammi eteke.

⁴Am nyushing yungching shangkü lingteke, ammei shem vebüthü den ngoiyei nethe meishi lingteke;

⁵Jomi ammei tauktayü Senir leipü fir pü, hatü ammei shemhayü Lebanon leipü cedar pü yah-ei lingteke.

⁶Jomi ammei ailüngü Bashan leipü longkhampü yah-ei lingteke, hatü jomi jahas bümü meinyübha mongei shihtü Cyprus leipü awkaongpü yah-ei lingteke.

⁷Jahas kü vanglük yüphen ashakü Ijip leipü meipü nyemin ashak khüamlung kei nyuteke. Shangei jümpü ashakü Cyprus shübaong leipü manghshempü ashaki lingteke.

⁸Sidon hatü Arvad amü ammei jahas yüpbüthü nyuteke. Lahhinpü Zemer shennyakthüyü am mü ammei ai yatbüthü nyuteke.

⁹Gebal am mistrithü am mü ammei ashakbaong thüngei nyuteke; Yungchingei jahas kü longteipü kemei ammei bhei leihshingei bhei leihteke.

¹⁰Persia, Lydia hatü Put am shennyakthüi ammei veshanthü vaiyei chongphoteke. Jomi jomei inyüshung, hatü nyiam athen peü ammei bham kü nyanteke, hatü am kü müknyinshekhang koei peiteke.

¹¹Arvad hatü Helekh shennyakthüi ammei bham, hatü Gamad am shennyakthüi ammei shangdü yomteke. Jomi jomei inyüshung ammei bham kü nyanteke; Jomi am nethe meipü den ngoihüteke.

¹²Ammei mopnyümopha longi nyupü nangkü Tarshish ami am mü bhei leihteke. Jomi ammei douthü mü ngin, nyiam, dam, hatü langdüknyiam jeiteiteke.

¹³Greek, Tubal hatü Meshekh ami am mü bhei leihteke, hatü ammei douhinang mü jomi aathü hatü laktetnyiam jeiteiteke.

¹⁴Beth Togarmah am shennyakthüi amü dou dükpü koyeithü, vehok koyeithü hatü dou kohen gaduthü mü jeiteiteke.

¹⁵Rhodes ami am mü bhei leih, hatü yungching yungkung kü nyupüthü ammei bhei shakpü am vaiteke; jomi am kü lop vaishi meinyübha hatü eboni douvang pü koei peiyei shuohpeih.

¹⁶Ammi dou longi lingei ngaiaokpü nangkü Aram ami am mü bhei leihteke; jomi ammei dou mü thüngshingpü douvang yaong, manghshempü ashak, hoipü ashak, meipü nyemin ashak, yungching mongeipü douvang yaong shuohpeih.

¹⁷Judah hatü Israel ami am mü bhei leihteke; jomi ammei dou mü Minneth leipü wheat, nyahjiü, olive mainga, hatü vong meipü meli jeiyei shuohpeih.

¹⁸Ammi dou longi lingei ngaiteke hatü douhinang mophimo longi nyupü nangkü Damaska ami am mü Helbon leipü yiü, hatü Zahar leipü mimum jeiyei shuoh-ei am mü bhei leihpeih.

¹⁹Dan hatü Uzal leipü Greek ami ammei douthü shak; jomi ammei douthü mü dhüngei lingpü nyiamthü, kassia hatü kalamus jeiteiteke.

²⁰Dedan ami am mü koyei dokshangei uoshing linghen ashak yuei bhei leihpeih.

²¹Arabia hatü Kedar am ongthü peü ammei bhei shakpü am nyuhampeih; jomi am mü mi, mi chehathü hatü yumthü yuei bhei leihpeih.

²²Sheba hatü Raamah am bhei leihpüthüi am mü bhei leihpeih; Jomi ammei douthü mü hahying lemphü douvang yaong hatü hon jeiteihampeih.

²³Haran, Kanneh, hatü Eden chingnyüthü, hatü Sheba, Asshur hatü Kilmad am am mü bhei leihteke.

²⁴Ammei bhei leihshingei jomi am kü ashakviha meipüthü, thüngla ashak hoipü ashak hatü vü meishi bhawei vüjung loktükpü ow longi kohpü aangshung ashak yuhampeih.

²⁵Tarshish amei jahasthü ammei yuhen douthü kohamteke, amü yungchingei hanggo longi kotü daipü jahas keiha nyupeih.

²⁶Ammei ai yatbüthü yungching yungmok kü müei daiteke. shejao heong vanglüki yungching jiamei hapa ai khüptük.

²⁷Ammei mopthü, ashakviha hatü douhinangthü peü, ammei jahas yüpbü hatü yatpüthü, Ammei jahas lingpüthü hatü bhei leihpüthü, jahas mongei nyupü veshanthü peü yungchingei am mahpü nyih peü mahdaiteke.

²⁸Ammei jahas mübüthüi vaüpü-eepü danei yungkungei nyupüthü kheüteke.

²⁹Jahas peü yakphongtü hapa müpüthü peü yungphaangei leidaiteke.

³⁰Jom peü shangjing kü bhihla nyiotü, depla kü lüteiyei am nangkü shahyaki thepnyüke.

³¹Am nangkü jom peüi sho chaei kuptüknyüke; jomi dhoila ashak ümnyüke. Jomi laangha mangei hatü mongdang kü shahyaki thepnyüke.

³²Jomi am kü mahng kesho hapakei loknyüke: “Yungchingei shinei nyupü üami Tyre am keiha bhih-ei maanei leidaipa?”

³³“Mechem ammei mophimo yungching homei daipa, ammi jatthü longi shümoh meihüphei; Ammei mopnyümopha, hatü ammei douhinangi kahdoknyü kübü ongthü shemmei leihüphei.

³⁴Shaang amü yung chüpülei yungchingi am lomohhüteke; Ammi mophimothü hatü hapa kü dükpüthü am mü hingdaiteke.

³⁵Yungching yungkungei nyupüthü peüi ammei lashüh eetü hannyüke; hatü ongthü nyemei hannyüke, jomei dhe nyempai yüpyonyüke.

³⁶Jatthü kübü bhei leihpüthüi ammei mangshie nyiohahhen khih shei nyemnyüke; Amü nyembenüng dohpütenpü hük ngoiteke hatü hajük kü am nenyuhen.”