Read Phom Naga EZEKIEL 28 Bible Online

EZEKIEL 28 - Phom Naga bible

EZEKIEL 28

¹SHEMBÜPAlei shah ngei touei peiteke:

²Shennyak ha, “SHEMBÜPAi hapakei enyüke” shei Tyre ongpa kü eyeishuoh: “Mehenangkü nüngei mongei changmeiyei, ‘Ngeiyü kahvang hük,’ yungching jiamei ngeiyü kahvangthülei uoshing küuonyeih” shei eteke. Nüngü kahvang kei kon kohpeih shei deihjao, nüngü kahvang nevai dihen shennyak hük mon.

³Nüngü Daniel mao nahpeih shei deihnyu je? Nüng touei mehe doujo-ao joshi nenyuaokhen je?

⁴Nüngei kihikon hatü danaokpü koni nüngi laophü shing mop yowteke, hatü hon hi ngin nüngei mop jaoshingei thaiteke.

⁵Bhei leihpü kü nüngei kon longpü homei nüngi nüngei mop dateke, hatü nüngei mongdangi nüngei mop eeyei changmeiyei leidaiteke.

⁶Hanangkü SHEMBÜPA Kahvangi hapakei enyüke: “Mehenangkü nüngi Kahvang shük kon kohpeih shei deihpü nangkü,

⁷Jatthü khongkü peü mü vemang jat ngei am khüei yah-ei leikahen. Ammei dhemeilaüma hatü kihikon khüei jomei yan nohen, hatü ammei themeilaüma jomi mangtükhen.

⁸Jomi nüngü kahshalei hütükhen, hatü nüngü yungching ilangmongei hühmahng haümahng vaiyei dihen.

⁹Nüng jüpü am touei, ‘Ngeiyü kahvang hük’ shei eaokhen je? Nüng jühen am touei nüngü kahvang nevai, shennyak mon vaidaihen.

¹⁰Nüngü nejappü hatü kung amei lak kü dihen shei SHEMBÜPA Kahvangi enyüke.”

¹¹Nedoh-i SHEMBÜPAlei shah ngei touei peiteke:

¹²“Shennyak ha, Tyre ongpa kü mahng kesho hük lokeishuoh, hatü SHEMBÜPA Kahvangi hapakei enyüke” shei etuh: “Chem nüngü den ngoipü kü lappü hük, kihikon hatü dhemeilaüma kü den ngoiyei nyuhampeih.

¹³Nüngü Kahvangei pemong Edenei nyuhampeih; douvang yaong lemphü yah-ei owtü nyuhampeih. Douvang yaong, diamond, topaz beril, karnelian, jasper, emerald; Sapphir, turquoise. Nüngü hon-ow longi nyuhampeih. Nüng lingpü nyih hathüyü nüng shingvaishi lingpeih.

¹⁴Ngei jepü cherub phongshani nüng yomei tuhpeih. Nüngü ngelei daülangpü kahshangei nyuhampeih, hatü nyangnyangpü yaongthü chi kü kamhampeih.

¹⁵Nüng lingpü nyih kübü mang nethahpü nyih thahshi nüngü eela neshiüi nyuhampeih.

¹⁶Mechem bhei leih-ei mop longi bongpüshang, jüteishangteipai maei mang thahpeih. Hanangkü nüngü nedaüpü dou keiha Kahvangei kahshang leipü yaktükpeih, hatü nyangnyangpü yaong kübü cherub phongshani nüng changtükpeih.

¹⁷Nüng dhemeilaümapü nangkü nüngei mongei changmei; nüng veihen meipü nangkü nüngei kon mangtükpeih. Hanangkü ngei nüngü kahdokei yaktükpeih; jomei müki veiteihen shingvaishi ngei ongthü touei shakei ngaihüpeih.

¹⁸Nüngei mang longi nyupai, nüng bhei leihpü kü shahhing ne-epai nüngi nüngei daülangpü shing sheihtükpeih. Hanangkü ngei nüngei mong leipü aw vamhütü nüng hahtükpeih, hatü nüng eepüthülei mük touei ngei nüngü kahdoknyü kü depla leitükpeih.

¹⁹Nüng nyingei nyupü jatthü peüi nüng ponghahpü eeyei nyemnyüke. Nüng kü nyembenüng dohpütenpü laphen hük ngoiteke, hajük kü nüng nenyuhen.”

²⁰SHEMBÜPAlei shah ngei touei peiteke:

²¹“Shennyak ha, nüngei dhe Sidon lemei meetuh, hatü hapa khüei teteivanei etuh,

²²hatü SHEMBÜPA Kahvangi hapakei enyüke” shei etuh: “Ngei nüng khüei nyüpeih, Oh Sidon, nüng kü ngei dükpü dou eeyei nanglakthüi ngei kü vihhen. Mechem ngei halei shahphenpü eehen, hatü ngei daülangshemshepü halei shakei vamhühenshang, jomi ngeiyü SHEMBÜPA khih shei nyinghen.

²³Mehenangkü ngei halei cham hatü hapalei chingyangshongei iy-aongmashateipü shomhen. Hapa mongei mahmahng longi nyuhen; pinnyü khüei shing peü lemei yan maei nyuhen. Shejüang jomi ngeiyü SHEMBÜPA khih shei nyinghen.”

²⁴Israel nanglakthü shingvaishi hajük kü laipü, hühpü hühhihang keipü chingyowyüpi neheühen. Shejüang jomi ngeiyü SHEMBÜPA Kahvang khih shei nyinghen.

²⁵SHEMBÜPA Kahvangi hapakei enyüke: “Mechem ngei Israel nanglakthü jatthü touei haidaipü thaiyei leihen, hatü jatthüi eeshi ngelei daülangshemshepü huhenshang, shejüang jomi ngei ngelei chongphopü Jakob kü shuohpü kahdokei chingchingei nyuhen.

²⁶Jomi halei nyempü neshiüi nyuhen, hatü shem veyei nyalingngupai sheiyei nyuhen. Mechem ngei jom kü ne-ienelemi dükpü jatthü kü shahphenhenshang, jom halei nenyemi nyuhen hatü jomphongi ngeiyü SHEMBÜPA, jomei Kahvang khih shei nyinghen.”