Read Phom Naga EZEKIEL 29 Bible Online

EZEKIEL 29 - Phom Naga bible

EZEKIEL 29

¹Wüpküpei nyupü bong an, len an mü nyih anpünyipabü kü SHEMBÜPAlei shah ngei touei pei:

²“Shennyak ha, nüngei dhe Ijip am Pharaoh ongpa khüei meetuh, hatü büpa hatü Ijip am kemei khüei teteivantuh.”

³“SHEMBÜPA Kahvangi hapakei enyüke” shei büpa kü etuh: “Ngei nüng khüei nyüpeih, Ijip ongpa Pharaoh, yungyenei lemshi nyupü Dragon nüngi, Nile yungyenü ngelei; ngei laophü shing linghahpeih” shei enyüke.

⁴Ngei nüngei shaapdok shaapmai kü nyiamphaaki kenhen, hatü nüngei yungyen leipü nyahthü nüngei ka kü khatü ngei nüng yungmong leipü shüei ngaihen.

⁵Ngei nüng hatü nüngei yungyen leipü nyahthü bhih kahdokei yaktükhen; Nüngei büm koshoyalei vühen, hatü ha üpaiyao yah-ei mahng nevühen. Nüngei mahng asha alang phai vaihühen.

⁶Shejüang Ijip am peüi ngeiyü SHEMBÜPA khih shei nyinghen; mehenangkü Israel ami nüng kü mongnyangshi nyuhampeih, shejao nüngü wong nekohpü bhuknyü lenshuoh mü meipüba nevai.

⁷Mechem jomei laki nüng kü shongpa, nüng bhagei jomei bhagsha kü hümteke, hatü mechem jomi nüng kü nyaangpa, nüngi jomei dok cheihhüteke.

⁸Hanangkü SHEMBÜPA Kahvangi hapakei enyüke: Ngei yan hük yah-ei peikahen, hatü nüngei nanglakthü hatü yemhimakthü jütükhen;

⁹hatü Ijip kahdokü lavüngtoiyei yakphonghen. Shejüang jomi ngeiyü SHEMBÜPA shei nyinghen. Mehenangkü nüngi, “Nile yungyenü ngelei, ngei ha linghahpeih” shei eteke;

¹⁰hanangkü ngei nüng hatü nüngei yungyen khüei nyüpeih, hatü ngei Ijip kahdokü chemjalak kü Migdol kübü Syene, hatü Ethiopia thahshi lavüngtoiyei leitükhen.

¹¹Shennyak nevaijü yemhimakei lakhila-i ha kü shoupei nekamhen, hapayü meheyao nenyui vangbong pinyi thahshi tuhhen.

¹²Lavüngtoiyei yakphongpü kahdokthü khongkü Ijipü lavüngtoiyei, hatü mangtükpü chingnyüthü khong kü vangbong pinyi thahshi mangtüktü tuhphonghen. Ngei Ijip am jatthü touei haitükhen hatü kahmükthü touei yantükhen.

¹³SHEMBÜPA Kahvangi hapakei enyüke: Vangbong pinyi dohpheikü ngei Ijip am jatthü touei haidaipü thaiyei leihen.

¹⁴Ngei jom wüpküp leipü müei leihen, hatü chebü chepa amei kahdok Pathroslei nyuhühen. Hapayü wong nekohpü ongching vaihen.

¹⁵Hapayü peü mü wong nekohpü ongching vaihen, hatü mechemao lebü jatthü shak kü vanglem nelemaokhen.

¹⁶Hajük kü Ijip amü Israel am mongnyang shing nevaihen, shejao pinnyü kü mongnyangpü nangkü mang thahpü khih shei deih-ei danghen. Shejüang jomi ngeiyü SHEMBÜPA Kahvang khih shei nyinghen.

¹⁷Vangbong hapünyetpabü shongpü len shongpü nyih kü SHEMBÜPAlei shah ngei touei peiteke:

¹⁸“Shennyak ha, Babylon amei ongpa Nebukadnezzari veshanthü müei peiyei Tyre hahteke. Büpai laophülei veshanthü sho kaongshi, hatü bhagchong yungshi hanggo kohütü dai shejao büpa nevaijü büpalei veshanthü üpaiyao hanghiyei Tyre hahpü laklei nedang.

¹⁹Hanangkü SHEMBÜPA Kahvangi hapakei enyüke: Ngei Ijip amü Babylon am Nebukadnezzarlei lak kü shuohtükhen, hatü büpai haleipü mophimothü shetlanghen. Büpai veshanthü kü lenlop shuohhen shangmü haleipü mopthü shetlanghen.

²⁰Ngei nangkü büpa hatü büpalei veshanthüi kheyei dükpü nangkü ngei büpa kü laklei vaishi Ijip am shuohhen shei SHEMBÜPA Kahvangi enyüke.”

²¹Hapa nyih ngei Israel am phang vaung koh-ei longhühen, hatü ngei jom touei Ezekiel, nüngei ju aphühen. Shejüang jomi ngeiyü SHEMBÜPA Kahvang khih shei nyinghen.