Read Phom Naga EZEKIEL 3 Bible Online

EZEKIEL 3 - Phom Naga bible

EZEKIEL 3

¹Büpai ngei kü, “Oh shennyak ha, ha laidü hahtuh, hatü daiyei hapa Israel am phang kü etuh” shei eteke.

²Hanangkü ngei ju ka, hatü büpai ngei kü hapa laidü hahhen shuoh.

³Hapheikü büpai ngei kü, “Shennyak ha, ngei nüng kü shuohpü laidü yah-ei moh-ei hahtuh” shei e. Hanangkü ngei hapa hah, hatü hapayü nyahjiü keiha vüngnyangi nyuteke.

⁴Hapheikü büpai ngei kü, “Shennyak ha, shaang Israel phang touei nüng daiyei jom kü ngelei shahthü eyeishuoh.

⁵Nüngü shah nenyingteipü nevaijü wongpü shah epü shennyakthü touei shomnyu nevaipih, shejao Israel phang touei shomnyeih

⁶nenyingbenüng hatü wongpü shah epü nanglak longi; jomei shah nüngi nedanaokpülei neshomnyih. Hingmei ngei nüng jom touei shomlangmeyü nüngi epü kü jomi banghen vaipeih.

⁷Shejao Israel am phangi nüngi epü kü nebangküpih; mehenangkü ngei epü kü nebanghünyu; mehenangkü Israel am phang kemei mong vaanshi hatü laophüi lümpü mon düknyüke.

⁸Veituh, jomei mong vaanpü keiha ngei nüngao mong vaanshi leihühen; jomei shangba mü nüngei shangba vaanpüba leihühen.

⁹Ngei nüngei shangbayü yaonglang keiha leihühen. Nüngi jom kü tenyem nevaijü tehan; mehenangkü jomphongü khüei yaongpü jatli.

¹⁰Büpai ngei kü, ‘Shennyak ha, ngei nüng kü epü shahthü kemei nüngei mongei yahtuh hatü nüngei dhaongi bangei yahtuh;

¹¹hapheikü wüpküpei nyupü nüngei nanglakthü touei peiyei jom kü etuh.’ Jomphongi bangjao nebangjao, SHEMBÜPA Kahvangi hapakei enyüke” shei jom kü etuh.

¹²Hahepak kü laanghai ngei shangei an, hatü ngei pheikü ngeü longpü hüki, “Vangsholei SHEMBÜPAlei müknyinshekhang kü vihtuh” shei epü dan.

¹³Ngei yemhathüi hüki hük mü yang bheiteipü hatü kharilathülei ngeü vampü ngei danteke.

¹⁴Laanghai ngei shangei an hatü ngei müei dai, hatü SHEMBÜPAlei ngan ngei touei wongmü pei, hatü ngei shahyaki mongshih-ei deihteke.

¹⁵Kebar yungyen yopailei Tel Abiblei wüpküpei nyupüthü touei ngei pei, hatü halei jom nyushingei ngei nyih nyet nyiuei themteke.

¹⁶Nyih nyet peihpheikü SHEMBÜPAlei shah ngei touei pei.

¹⁷“Shennyak ha, ngei nüngü Israel jat kü yombü leihüteke; hanangkü ngei epü shah bangtuh hatü jomphong kü ngelei shahvüng shuohtuh.

¹⁸Mechem ngei nemeipü shennyak hük kü, ‘Nüng hingmei dihen’ shei ehenshang büpalei yangnyu yanghen shingvaishi nüngi shahvüng neshuohjema nevaijü mang lem kübü yanhen ne-eshuohjema, hathüyü laophülei mang lat dihen shejao jomei iy nüng kübü yühen.”

¹⁹Shejao nüngi jom kü ejü jomi jomei mang kübü nevaijü nemeipü lem kübü nyokei neleijema, jomi jomei mang tata kü dihen, shejao nüngei yangnyu payü yangdaihen.

²⁰Shao daülangpü shennyakthü daülangpü lem tuhphongtü mang thahjema, hatü ngei jom kü shanghah vongshüh shuohjü nüngi jom kü shahvüng neshuohjema, jomi jomei mang tata kü dihen, hatü jomi dükpü doumei ngei deih-ei nedanghen, shejao jomei iy nüng kübü yühen.

²¹Shejao nüngi daülangpüthü kü mang nethahhen eshuohjü jom mang nethahjema, jomphong hingmei yemmü nyuhen, hatü nüngei yangnyuao yangei nyuhen.

²²Hapheikü SHEMBÜPAlei ngan ngei kü pei, hatü büpai ngei kü, “Yaongtuh, hatü kahjilei daituh, hatü halei ngei nüng kü ephahen” shei e.

²³Hanangkü ngei layaongei kahjilei dai, hatü halei SHEMBÜPAlei müknyinshekhang ngei ee, hatü hapayü ngei Kebar yungyenei eepü müknyinshekhang kei nyuteke hatü ngei kahdokei dhe aümei sha.

²⁴Hapa Kahvang laangha ngei kü shü, hatü ngelei la noei an, hatü büpai ngei kü e, “Shemei leiyei sha lattü nyudaituh.

²⁵Shennyak ha, nüngü vü shatü nyuhen hatü nüng daiyei shennyakthü mü nenyuaokhen,

²⁶hatü ngei nüngei yei shaapdokei anei khatükhen; nüngi shah ne-eaokhen hatü hathü kü shahvüng neshuoh-aokhen; mehenangkü jomphongü khüei yaongpü shennyakthü nyüke.

²⁷Shejao mechem ngei nüng mü shah ehenshang, ngei nüngei ju apphahen, hatü nüngi jomphong kü, ‘SHEMBÜPA Kahvangi hapakei enyüke’ shei eshuohhen. Banghüpü ami hapa banghen, nebanghüpü ami hapa yaktükhen; mehenangkü jomphongü khüei yaongpü shennyakthü nyüke.”