Read Phom Naga EZEKIEL 30 Bible Online

EZEKIEL 30 - Phom Naga bible

EZEKIEL 30

¹SHEMBÜPAlei shah ngei touei peiteke:

²“Shennyak ha, SHEMBÜPA Kahvangi hapakei enyüke” shei teteivanei etuh: “Onyükei, hapa nyempühanpü nyih!”

³Mehenangkü nyih hük yopailei peikünyüke, SHEMBÜPAlei nyih ngoikünyüke; Hapayü phumnyaki jümpü nyih hük, jatthü shingvaishi vongshüh nyih hük vaikahen.

⁴Ijip khüei yan hük peikahen, hatü Kush am khüei mongshih hük vamkahen. Ijiplei mahpü chahpü longi vamhen, pinnyülei mop kemei shetlanghen hatü pinnyülei chongnyiam shing bentükhen.

⁵Kush hatü Put, Lydia hatü Arabia, Libya am kemei, hatü Ijip am mü khüambakpü jatthü kemei yani mahkemhen.

⁶SHEMBÜPAi hapakei enyüke: “Üami Ijip am kü sheühnya, dohen, hatü pinnyüi changmeipü wong laaidaihen. Migdol kübü Syene thahshi yani jom mahkemhen shei SHEMBÜPA Kahvangi enyüke.

⁷Jomei kahmükü lavüngtoipü kahmük khongkü, hatü jomei chingnyüthüyü lavüngtoipü chingnyüthü khongkü tuhhen.

⁸Mechem ngei Ijip kü awi haphen, hatü pinnyü kü khüambakpüthü mangtükhen, shejüang jomi ngeiyü SHEMBÜPA shei nyinghen.”

⁹Hapa nyih, Kush am jomei wong kü monglempü nangkü jom nyemhühen shingvaishi jahas kü uotü ngelei phongmokbüthü shomhen. Ijip am vongshüh pongpü nyih mongshih-i jom kü shonghen, mehenangkü hayü hingmei vamshasha.

¹⁰SHEMBÜPA Kahvangi hapakei enyüke: “Babylon am Nebukadnezzar ongpalei laki Ijip am khongnyü mahtükhen.

¹¹Büpa hatü büpalei veshanthü jatthü khongkü longi mangpü jomei kahdok mahtükhen müei leihen. Jomi Ijip khüei jomei yan nohen, hatü kahdokü mahmahngi mahühen.

¹²Ngei Nile yungyen ütükhen, hatü nemeipü shennyakthü kü kahdok yutükhen. Kungpalei lak homei kahdok hatü haleipü lemphü kü lavüngtoipü koei peihen shei ngei SHEMBÜPAi etepih.

¹³SHEMBÜPA Kahvangi hapakei enyüke: Ngei lajeithü mangtükhen, hatü Memphis leipü yaongnaüyathü dohtükhen. Hajük kü Ijip kü longhiong nenyuhen; Hapa keiha ngei Ijip am kü nyempühanpü shuohhen.

¹⁴Ngei Pathros lavüngtoiyei tuhhen, hatü Zoan kü ngei aw haphen, hatü ngei Thebes am kü shahphenhen.

¹⁵Ngei Ijip amei Penyüsha Pelusium chingnyü kü ngelei mongshih khapshuohhen, hatü Thebes am khongnyü jütükhen.

¹⁶Ngei Ijip kü aw haphen; Pelusium chingnyü-ü longi mongmang kü nyuhen; Thebes mangtükhen hatü Memphis am düngei vongshüh kü nyuhen.

¹⁷Heliopolis hatü Bubastis chingnyü kübü nethethü yani mahhen, hatü chingnyüthü wüpküpei daihen.

¹⁸Mechem ngei Ijip amei wong mangtükhen, Tahpanheslei nyihnüngü vangnyak leidaihen, hatü hapalei changmeipü wong dohdaihen. Pinnyü kü phumnyaki jümhen, hatü haleipü jilathü wüpküpei yah-ei daihen.

¹⁹Hapa keiha ngei Ijip am kü hanghi shuohhen. Shejüang jomi ngeiyü SHEMBÜPA khih shei nyinghen.”

²⁰Bong anpühükpabü shongpü len nyih nyetpabü kü SHEMBÜPAlei shah ngei touei peiteke:

²¹“Shennyak ha, ngei Ijip ongpa Pharaohlei lak bhagtüktih. Nyipabü yan nohen mü hapa lak meihen üpaiyao hanshep shepei ashaki neshakang.

²²Hanangkü SHEMBÜPA Kahvangi hapakei enyüke: Ngei Pharaoh ongpa khüei nyüpeih. Ngei büpalei lak nyiphen, meipübayao hatü nemeipübayao büpalei lak leipü yanlu vüdaihen mü mangtükhen.

²³Ngei jatthü touei Ijip am haitükhen, hatü kahmükthü peü kü yantükhen.

²⁴Ngei Babylon ongpalei lak wong kohhühen, hatü ngelei yanlu büpalei lak kü shümhühen; shejao ngei Pharaohlei lak bhagtükhen, hatü büpa touei dihen mü ma yahpü shennyaki vaüpü keiha büpa vaühühen.

²⁵Ngei Babylon ongpalei lak wong kohhühen, shejao Pharaohlei lak vüdaihen. Mechem ngelei yan Babylon ongpalei lak kü shümhühenshang, jomi ngeiyü SHEMBÜPA khih shei nyinghen. Büpai ha Ijip kahdok khüei nohen;

²⁶Ngei jatthü touei Ijip am haitükhen hatü kahmükthü peü touei jomphong yantükhen. Shejüang jomi ngeiyü SHEMBÜPA Kahvang shei nyinghen.”