Read Phom Naga EZEKIEL 31 Bible Online

EZEKIEL 31 - Phom Naga bible

EZEKIEL 31

¹Wüpküpei nyupü vangbong anpühükpabü len jempabü shongpü nyih kü SHEMBÜPAlei shah ngei touei peiteke:

²Shennyak ha, Ijip ongpa Pharaoh hatü büpalei nanglakthü kü ha etuh: “Wong hi ngan kü nüng üpa mü shetteiaokhen?

³Deihhümao, chem hepak kü Assyriayü Lebanon leipü cedar pü keiha, nethe meipü kaothü vamei phaüao dhümshi; hapa shao lupai vangsho thahhen mü nyuhampeih.

⁴Hapayü yungi koh-ei longhüpeih, hapayü kahmong yungi luhüpeih. Hathü yungi ha sheipü shing shinei yen, hatü phaülei nyupü püthü peü kü yung shuohpeih.

⁵Hapalei tünglangei yung changshi nyupü nangkü, phaülei nyupü püthü peü mü ha shaopüba longteke. Hapalei kaonyüthü longei kaohathü phaakei daipeih.

⁶Ouhiyüh peüi hapalei kaonyüthü kü jep lingteke, hatü yemhimak peü hapalei pükao phangei cheha shaanteke, hatü hapalei dhüm phangkü jat longpüthü peü nyu.

⁷Hapalei kaothü phaakei daipü longi nethe meishi nyuteke, mehenangkü hapalei tünglang yung changshi nyupülei yiüteke.

⁸Kahvangei pemong leipü cedar püthüao ha mü nedokteiaok, nevaijü awkaongpüthüi hapa kaothü mü hükkei neleiaok; Lebü pülemthü hapalei kaothü mü neshetteiaok, nevaijü nethe meipü kü Kahvangei pemongei nyupü püthüao nethüaok.

⁹Ngei hapayü kaothü longi phaaktü lingpeih. Edenei nyupü Kahvangei pemong leipü püthü khongkü peüi hapa kü mükhühshi lingpeih.”

¹⁰Hanangkü SHEMBÜPA Kahvangi hapakei enyüke: Mehenangkü hapa shao longi luei vangsho thahhen mü shaopü nangkü, hatü hapa shao luhahpü nangkü mongei changmeipü nangkü,

¹¹ngei hapa jatthülei ongpa kü shuohtükpeih; büpai hapalei mangi shangpükei nopeih. Ngei hapa yaktükpeih.

¹²Jatthü khongkü peüi nyempü kung ami jom agtü tuhphongpeih. Hapalei kaonyüthü kahji kahshang peü kü vüei yaüteke; hapalei kaohilakthü peü shohinga peü kü bhagei yaüteke, hatü kahdoknyü kübü shennyakthü peü hapalei dhüm kübü nyaidaitü tuhphongpeih.

¹³Agei lemshi nyupü pü shangkü ouhiyühthü bakhen hatü phaüyemthüi ha kü phungteihen.

¹⁴Hanangkü yung yopailei nyupü pü mepaiyao shaoei ne-aonghen, nevaijü vangsho thahshi neluhen; hanangkü yung jüppü pü mepaiyao hajük thahshi shao luei ne-aonghen. Shennyak hangku diyei kahmongei shüdaipü keiha jom peü dihen demtükpü nyüke.

¹⁵SHEMBÜPA Kahvangi hapakei enyüke: Hapa Sheolei shüpü nyih, ngei kahmong yungao mahng thepei jümhüpeih; ngei shohingathü shümlangpeih hatü yungthü jümlangpeih. Hanangkü ngei Lebanon am dhe magei leihü, hatü haleipü püthü peü kaotükhüpeih.

¹⁶Sheolei shüpüthü mü ngei mechem hapa halei müei shüpa, hapa dopü ngeü kü jatthü peü nyemei kheühüpeih. Hahepak kü Eden leipü püthü, hatü Lebanon leipü peü mü meipü püthü, yung changshi shuohtükpü püthü peü kahmongei shüshingkü hapa dopü kü mongmeihen.

¹⁷Hapa püdhüm kü üam nyu hatü jatthü kübü hapa kü khüambakpüthü peü shelei yani mahpüthü mü shephen Sheolei shüdaitepih.

¹⁸Eden leipü püthü mepai nüng nethe meipü hatü longpü mü shetteiaokhen? Shejao nüngao Eden leipü püthü mü kahmongei shüei shühen; nüngü nejaptükpü, yani mahpüthü mü lemshi nyuhen. “Hapayü Pharaoh hatü büpalei nanglakthü” shei SHEMBÜPA Kahvangi enyüke.