Read Phom Naga EZEKIEL 32 Bible Online

EZEKIEL 32 - Phom Naga bible

EZEKIEL 32

¹Wüpküpei nyupü vangbong anpünyipabü len anpünyi shongpü nyih kü SHEMBÜPAlei shah ngei touei peiteke:

²Shennyak ha, Ijip am Pharaoh ongpa khüei young kesho hük ventuh hatü büpa kü hapakei etuh: “Jatthü khongkü nüngü mailang hük leshi nyüke; nüngü yungching mong leipü dragon hük keiha shohinga kü bheinyüke, nüngei la-i yung kü haonyüke, hatü yung mak dungei shanshihnyüke.

³SHEMBÜPA Kahvangi hapakei enyüke: Nanglak longi thaipü shingei ngei nüng kü ngelei shang shephen, hatü nüng ngelei shang kü mantü shüei anhen.

⁴Ngei nüng kahdokei shüktükhen, koshoya kü ngei nüng yaktükhen, hatü shangou peü nüngei büm kü bakhühen, hatü nüngei büm phaüyemthü kü ühtükhen.

⁵Ngei nüngei phai kahshangthülei haiphonghen, hatü kahjithü kemeilei ammei mahmahngi mahühen.

⁶Ammei iy yenpai yungyen leiyei kahshangthü thahshi shanshihhen, hatü ammei iy-i shohathü mahühen.

⁷Mechem ngei am mahtükhen, Ngei vangshothü jümtükhen, hatü lithathü manghtükhen; Ngei phumnyaki vanghenyü jümtükhen, hatü lennyüi laophülei vangngai neshuohhen.

⁸Ngei am shak kü nyapü vangsho leipü vangngai kemei manghtükhen, hatü ammei kahdok kü vangnyak koei peihen shei SHEMBÜPA Kahvangi enyüke.

⁹Mechem ngei am mahtükhen jung ammi chemao mangdanpü jatthüi hapa shahjang danhenshang; jatthü longi mongshanghen.

¹⁰Ngei am kü dükpü dou eeyei jatthüi hanhen; hatü jomei ongthüi am eeyei nyemei kheühen. Am mahpü nyih mechem ngei ngelei yanlui jom kü nyem sheühen, jom peüi laophülei yangnyu deih-ei nyemei kheühen.

¹¹SHEMBÜPA Kahvangi hapakei enyüke: Babylon ongpalei yanlu am khüei peikahen.

¹²Jatthü khongkü peü mü mangpü shennyakthülei yani ammei nanglakthü mahhühen. Jomi Ijip am changmeipü mahtükhen, hatü haleipü nanglakthü peü mahhen.

¹³Yung yopailei haümpü ammei yemhimakthü peü mahtükhen; Hangkui nevaijü yemhimaki hajük kü hapa yung kü mak nedunghen.

¹⁴Shejüang ngei jomei yungyenthü daülangi yenhühen, hatü jomei yung mainga keiha yenhühen shei SHEMBÜPA Kahvangi enyüke.

¹⁵Mechem ngei Ijip am lavüngtoiyei tuhphonghen, hatü hapa kahdok leipü lemphü thitei yaktükhen; mechem ngei halei nyupüthü peü mahtükhen, shejüang jomi ngeiyü SHEMBÜPA khih shei nyinghen.

¹⁶Hapayü young kesho; ha lokhen: Jatthü kübü nyühathüi Ijip am hatü haleipü nanglakthü shingvaishi lokhen shei SHEMBÜPA Kahvangi enyüke.”

¹⁷Wüpküpei nyupü vangbong anpünyipabü shongpü len nyih anpüngapabü kü SHEMBÜPAlei shah ngei touei peiteke:

¹⁸“Shennyak ha, Ijip am shennyak khong shingvaishi mahng theptuh; hatü pinnyü mü chemi wong kohpü jatthülei nelathü kahshalei shüdaipüthü mü jomphongao dipü kahdokei shüeishuoh.

¹⁹Amü mih mü nyeinya meinyeih shei deihnyu je? Nejaptükpüthü mü dipü kahshalei shüei nyutuh!”

²⁰Yani mahpüthü mü jomao chemi mahhen. Jom peü jütükhen yanlu hük temtüktü nyüke.

²¹Ijip am khüambakei hokpü hampa longpüthüi Ijip am kü dipü kahshalei nyükhen. Jomphongi: “Nejaptükpüthü üam yani mahpa, shaang thahshi halei lemshi nyüke” shei lenhen.

²²Assyria am hatü jomei veshanthü yani mahpüthülei mahngchongi shinei yahtü halei nyüke.

²³Jomei mahngchongü kahsha mongpalei nyüke, hatü jomei veshanthüyü laophülei mahngchong shinei nyüke. Yemmü nyupü kahdokei üami nyemhihan yanhü, jom peü yani mahtükkemteke.

²⁴Elam am hatü jomei veshanthü mahngchong shinei nyüke. Jom peü yani mahtükteke. Yemmü nyupü kahdokei üami nyemhihan yanhü, jom peü nejaptüki kahshalei shüdaiteke. Kahshalei shüdaipüthü mü jomi jomei veü konyüke.

²⁵Elam amei shinshingü mahpüthü mü lingei nyüke, hatü pinnyülei veshanthülei mahngchongü pinnyü shinei nyüke. Jom peü nejaptükpüthü, jom peü yani mahteke. Yemmü nyupü kahdokei jomi nyemhihan yanpü nangkü jomi kahshalei shüdaipüthü mü jomei veü konyüke; jomphongü mahpüthü mü mahng vüei nyüke.

²⁶Meshekh hatü Tubal nyi mü jomei veshanthü jomei mahngchongi shinei yahtü halei nyüke; Jom peü yani mahpü nejaptükpüthü nyüke; mehenangkü jomi yemmü nyupü kahdokei nyempühanpü vamhüteke.

²⁷Jomphongao lebü mahdaipü nejaptükpü veshanthü, laophülei vehok phunglang, laophülei yanlu shangjing kü letü mahng vüei nyupüthü mü vüei neshiüpü je? Yemmü nyupü kahdokei jomi nyemhihan longi vamhüjao, laophülei mang shingvaishi hanghi laophüi kotü nyüke.

²⁸Hapa keiha Oh Pharaoh, nüngao mahhen, hatü yani mahpü nejaptükpüthü mü mahng vühen.

²⁹Edom amao wonghingan nyulangmao pinnyülei ong hatü vanglem lembüthü peü halei nyüke, jomü yani mahpüthü mü mahng vüei nyüke. Jomphongü kahshalei shüdaipü nejaptükpüthü mü lemshi nyüke.

³⁰Apshaphi leipü vanglem lembüthü peü, hatü Sidon am peü halei nyüke; jomei wongi nyemhihan vamhüei nyujao mongkü tüngshi mahpüthü mü vüei nyüke. Jomphongü yani mahpüthü mü laophülei veü kotü kahshalei shüdaipü nejaptükpüthü mü lemshi nyüke.

³¹Pharaoh hatü büpalei veshanthü peüi hathü eehen hatü yani mahpü büpalei veshanthü eetü büpa nyiushem meihen shei SHEMBÜPA Kahvangi enyüke.

³²Yemmü nyupü kahsha kü ngei büpa homei nyemhihan yanhülangmao, Pharaoh hatü büpalei veshanthü peü nejaptükpüthü, yani mahpüthü mü mahng vüei tuhhen shei SHEMBÜPA Kahvangi enyüke.