Read Phom Naga EZEKIEL 33 Bible Online

EZEKIEL 33 - Phom Naga bible

EZEKIEL 33

¹SHEMBÜPAlei shah ngei touei peiteke:

²“Shennyak ha, nüngei kahmük kübü nanglak kü hapakei etuh: Mechem ngei kahmük kü vehok yah-ei peihenshang, hatü kahmük kü nyupü shennyakthüi jomphong khong kübü bahük yombü vaiyei jejema,

³hatü büpai vepa peijapü eeyei nanglakthü hakahen shingvaishi amit vüngjema,

⁴hatü hanei-i ha dantü, ha shahvüng kü nehaka-i nyupü nangkü vepa peiyei büpa jütükjema, büpa mahpü iy büpalei shangjing kü kohen.

⁵Mehenangkü büpai amit ngeü danpheikü nehakapü nangkü mahjema, büpalei iy büpalei shangjing kü kohen. Büpai paoh shahvüng kü hakalangmeyü büpa yangdaihah shepeih.

⁶Shejao yombüi vepa peipü eetüktü nanglakthü hakahen amit nevüngjema hatü vepa peiyei jomphong khong kübü hük dangkao mahjema, büpa laophülei mang homei dinyüpeih, shejao büpalei iy yombü leipü yühen.”

⁷Hanangkü shennyak ha, ngei nüngü Israel am jat shingvaishi yombü hük leihüpeih; mechem nüngi ngelei ju kübü shah danhenshang, nüngi jomphong kü ngelei shahvüng shuohtuh.

⁸Ngei mangthü kü, “Oh mang shennyak, nüng dihen khih” shei ejü nüngi büpalei lem kübü mong lepei leidaihen ne-eshuohjema, hapa mang shennyakü laophülei mang homei mahhen, shejao büpalei iy nüng kübü yühen.

⁹Shejao nüngi hapa mang shennyak kü laophülei lem kübü mong lepei leihen epheikü büpa monglepei neleijema, büpa laophülei mang homei mahhen, shejao nüngei yangnyu ha kübü yangdaihen.

¹⁰“Shaang, nüng shennyak ha, ammi hapakei eteiteke: Jenei mangi hatü jen pungpai jen kü vihyaki chetteke, hapa homei jen lomohnyu khih. Jen mekei etü nyuaokhen?” Hanangkü Israel phang kü ha etuh.

¹¹Ngeiyü vanyangyem Kahvang shei SHEMBÜPA Kahvangi enyüke, ngei mang shennyak hük dipü kü mongneongnyih, shejao mang shennyak hük laophülei lem kübü mong lepei leiyei yangnyu yem dangei nyupü eehünyeih. Oh Israel phang, ammei mang lemthü kübü mong leptuh, mehekei am dihenang?

¹²Hanangkü shennyak ha, nüngei Israel nanglakthü kü ha etuh. Mechem daülangpü shennyak hüki mang thahhenshang, büpai daülangpeih shei deihhahpai büpa neyangpih; hatü mechem mang shennyak hük laophülei mang kübü mong lepei leihenshang, hapai büpa huluh shuoh-ei nedopih; Mechem daülangpü shennyak hük mang thahhenshang, büpa shelei daülangi nyupai shei büpa neyangpih.

¹³Ngei daülangpü shennyak hük kü, “Hingmei nüng yemmü nyuhen” shei ejao, shejao büpai laophü daülangshemshepü kü changpeih shei deihtü mang thahjema, büpai dükpü daülangpü dou hükao deih-ei nedangpih; shejao büpai thahpü mang tata kü büpa dihen.

¹⁴Shao, ngei mang shennyak hük kü “Hingmei nüng dihen” shei ejao büpai laophülei mang kübü mong lepei mehe shahhing, hatü jiüpa, ha dükjema;

¹⁵büpai bheishe hang nangkü yahpü dou, nyokei shuoh-ei, büpai gühpü dou nyokei leishuohtü yangnyu shuohpü shahkung kü müjema, hatü mang nedükjema, hingmei büpa nedi-i yemmü nyuhen.

¹⁶Büpai thahpü mang hükao büpa khüei deih-ei nedanghen. Büpai mehe shahhing hatü jiüpa, ha dükteke; büpa hingmei yemmü nyuhen.

¹⁷Shejao nüngei nanglakthüi jomei lem nejiüi tuhtü, “SHEMBÜPAlei lem nejiüang” shei enyüke.

¹⁸Mechem daülangpü shennyaki daülangpü lem tuhphongtü mang thahhenshang, büpa hapa tata kü dihen.

¹⁹Hatü mechem mang shennyaki laophülei mang kübü mong lepei mehe shahhing hatü jiüpa, ha dükjema, büpai hapa dükpai yemmü nyuhen.

²⁰Shejao, Oh Israel phang, ammi, “SHEMBÜPAlei lem nejiüang” shei enyüke. Shejao am shennyak ieyei laophüi dükpü dou aimü ngei shahphenhen.

²¹Wüpküpei nyupü bong anpünyi, lenyang an, mü nyih ngapabü kü Jerusalem leipü yangei daipü shennyak hüki ngei touei peiyei, “Chingnyü dodaiteke” shei ephüteke.

²²Ha ya om kü hapa shennyak peishekü SHEMBÜPAlei laki ngei kü shong, hatü hapa shennyak nepphei dhom mü peishekü büpai ngelei ju aphüteke hatü shah ne-e-i nenyuaoki nyu.

²³SHEMBÜPAlei shah ngei touei peiteke:

²⁴“Shennyak ha, Israel kahdokei lavüngtoiyei yakphongpü shingthü kü nyupüthüi hapakei enyüke, ‘Abrahamü shennyak hük mon nyu, shejao kahdok kemei büpa kü shuohpeih, shaang jen longi nyüke hanangkü hingmei hapa kahdokü jenei vaihen shuohpeih.’ ”

²⁵Hanangkü SHEMBÜPA Kahvangi hapakei enyüke shei hathü kü etuh: “Ammi phai mü iy-ao omshi hahnyüke, hatü ammei lajeithü kü khümnyüke, hatü iy vamhünyüke; hapakei tuhtü hapa kahdok yah-aokhen je?

²⁶Ammi laophülei yanlu kü monglemnyüke, ammi jiühitnalaipü douthü düknyüke, hatü chingyowpalei nyüha mü mükbongjuyungnyüke; hapakei tuhtü ammi hapa kahdok yah-aokhen je?

²⁷SHEMBÜPA Kahvangi hapakei enyüke shei hathü kü etuh: Ngeiyü vanyangyem Kahvang, lavüngtoiyei yakphongpü shingthülei nyupüthü yani mahhen, hatü üam koshoyalei nyu, hathü phaüyemthüi hahtükhen, hatü üam kahshang hatü yaongshathülei joshi nyu, chami dikemhen.

²⁸Ngei hapa kahdokü lavüngtoiyei yakphonghen, hatü pinnyüi changmeipü wong dohtükhen, hatü Israel amei kahshangthü üpaiyao nepeihteihen mü lavüngtoiyei leitükhen.

²⁹Jomi dükpü jiühitnalai douthü nangkü mechem ngei hapa kahdok lavüngtoiyei leitükhen, shejüang jomi ngeiyü SHEMBÜPA khih shei nyinghen.”

³⁰Shennyak ha, nüngei nanglakthüi mechem chingnyü bham nevaijü shem shaden yopailei heüteihenshang jomi nüng nang hüki hük mü hapakei eteinyüke, “Huoi, SHEMBÜPAleipü mehe shah peipüshang bangshah.”

³¹Jomphongi nüng touei düngei peiteipükei peinyüke, hatü nüngi epü banghen nüng touei uonyüke, shejao jomi dou leiyei nedüknyu. Jui mon jom vaipü enyüke, shejao jomei mongdangü mop nempai maei nyüke.

³²Jom shingvaishi nüngü ünghinyah meishi harp meishi vüngei maibong kesho lokteipü shennyak hük leshi nyüke, nüngi mehe e, jomi ha banghahnyüke, shejao dou leiyei nedüknyu.

³³Mechem hathü peü vamhen, hatü hingmei peü vamhen shejüang jom mü thibü hük nyuhampü khih shei jomi nyinghen.