Read Phom Naga EZEKIEL 34 Bible Online

EZEKIEL 34 - Phom Naga bible

EZEKIEL 34

¹SHEMBÜPAlei shah ngei touei peiteke:

²Shennyak ha, SHEMBÜPA Kahvangi hapakei enyüke shei Israel am mi yombüthü khüei teteivanei etuh: Oh, Israel am mi yombüthü, amphongi laophü mon moh-ei hahtü mithü nehaümnyu.

³Ammi amma yingnyüke, mimum ashak ümnyüke, ammi nitshüpü mithü jüei hahnyüke, shejao hathü kü nejungnyu.

⁴ammi wong nekohpüthü kü wong koh-ei neleihü, tüngpü kü nejung, maju nethüng, paüeiyonei lüdaipüthü müei nelei, mahdaipüthü neyem, shejao kangeishungei loh-ei mangei jom shak kü vanglem lemteke.

⁵Mi yombü neshiüpü nangkü jom haidai, hatü paüei daijapü nangkü phaüyemthüi hathü jüei hahtükkem.

⁶Hanangkü ngelei mithü kahshang hatü shangtaothü peü lemei haishi paüeiyonei nyüke; üpaiyao yemei leihen neshiü ngelei mithü kahdok shak kü yaüshi nyüke.

⁷Hanangkü am mi yombüthü, SHEMBÜPAlei shah bangtuh:

⁸Ngeiyü vanyangyem Kahvang shei SHEMBÜPA Kahvangi enyüke; mi yombüthü neshiüpü nangkü mithüyü phaüyemthülei het leidaiteke. Mehenangkü ngelei mi yombüthüi ngelei mithü neyemi jom mon moh-ei hahtü ngelei mithü nehaümpü nangkü,

⁹am mi yombüthü, SHEMBÜPA Kahvangei shah bangtuh:

¹⁰Ngei mi yombüthü khüei nyüpeih, hatü jomphongei lak leipü ngelei mithü yühen, hatü jomi mi jüei hajük kü nehahhen, mi yombüthü sheyü jom nying kü shümoh meiyei nenyuhen. Mithü jomei hahying neleihühen shingvaishi ngei jomei ju leipü mithü yanglanghen.

¹¹SHEMBÜPA Kahvangi hapakei enyüke: Ngei laophülei mi yemhen hatü jom danghen.

¹²Paüdaipü mithü khongkü mi yombüi laophülei mi yempü keiha ngei ngelei mithü yemhen. Baijüm vangyim nyih kü jom paüdaipü shingthü peü leipü ngei hathü yanglanghen.

¹³Ngei hathü jatthü hatü kahmükthü leipü thaiyei leilanghen, hatü jomei lompü kahdokei leilanghen, hatü ngei jomphong kü Israel kahshangthü, yungyenthü hatü hangku nyupü kahdok peü philei ühyinghen.

¹⁴Ngei jomphong kü thüngkon meipü shingei ühyinghen, hatü Israel kahshang shaopüthü peü jomei het hahshing leihühen; halei jom het hahshing meipülei lemlemleyei tuhhen, hatü jomi Israel kahshang leipü thüngkon meipülei hahyinghen.

¹⁵Ngei laophülei mithü kü mi yombü vaihen, hatü ngei jomphongü lemlemleyei tuhhen shei SHEMBÜPA Kahvangi enyüke.

¹⁶Ngei mahdaipüthü yemhen, paüdaipüthü yemei leihen, hatü ngei jomei makaw thünghen, hatü ngei wong nekohpüthü wong kohhühen, shejao nitshüpü hatü wong kohpüthü mahtükhen. Ngei shahhingi jom kü ühyinghen.

¹⁷Shaang, ngelei mithü, shei SHEMBÜPA Kahvangi enyüke: Ngei mi hi mi aa kü, hatü mi hi yum nyi aa kü shahphenhen.

¹⁸Ammi hahhen thüngkon meipü changshi neshiüang je? Aopü thüngkon kemei la-i shouptükhen je? Amphong shing yinghen yung meipü changshi neshiüang je? Aopü yung kemei mak dungtükhen je?

¹⁹Ngelei mithüyü amphongi la-i shouptükpü thüng hahhen hatü amphongi mak dungtükpü yung yinghen je?

²⁰Hanangkü SHEMBÜPA Kahvangi hathü kü hapakei enyüke: Veituh, ngei nitshüpü mi hatü koihpü mi nyi aa kü shahphenhen.

²¹Mehenangkü amphongi tüngpü mithü peü kü bhagchongi hatü ngaüpi hungteke, hatü hathü mangyandai thahshi hokei changteke.

²²Ngei ngelei mithü yanghen, hatü jom kü hajük kü nemei-i nedükhen, hatü ngei mi hi mi aa kü shahphenhen.

²³Ngei jom shak kü mi yombü hük, ngei chongphobü David tuhhen, büpai jom kü ühyinghen hatü büpa jomei mi yombü vaihen.

²⁴Ngei, SHEMBÜPAyü jomei Kahvang vaihen, hatü ngelei chongphobü Davidü jom khongkü ong vaihen. Ngei, SHEMBÜPAi ha etepih.

²⁵Ngei jom mü chingmeivangmei vangpüshuwpü linghen, hatü meishih nyahmang peü changtükhen; shejüang jomphong bhih kahdokei nyuhen hatü hüshemei phaülei shiyeichonghen.

²⁶Ngei jom hatü ngelei kahshang shinei nyupü shingthü kü moihimanhen; ngei hepak vangpan kü jiüshi vang shomhen; halei moihimanpü vang keihen.

²⁷Kah kü nyupü püthüi betjük jükhühen, hatü kahdoki hahying vamhühen. Mechem ngei jomei nyiamvü phentükhen, hatü jom aa leihüpüthülei lak kübü yanghenshang, jomphong nenyemi hüshemei nyuhen, hatü jomphongi ngeiyü SHEMBÜPA khih shei nyinghen.

²⁸Hajük kü lebü jatthüi jom kü aeteisheyei nedükhen, nevaijü meishih nyahmangi jom nehahhen; jomphong nenyemi hüshemei nyuhen, hatü üpaiyao jom nenyemhühen.

²⁹Ngei jom kü kahcheü kohpü kahdok shuohhen, hatü kahdok kübü aeipülepü dohtükhen, hatü lebü jatthüi neienelempü kü jom nehanghihen.

³⁰Jomi ngei, SHEMBÜPA, jomei Kahvangü jom mü nyüke shei nyinghen, hatü jom, Israel phangü ngelei nanglakthü shei SHEMBÜPA Kahvangi enyüke.

³¹Amphongü ngelei mithü, hatü ngelei thüngkon shangei üh-ei haümpü mithü, hatü ngeiyü ammei Kahvang shei SHEMBÜPA Kahvangi enyüke.