Read Phom Naga EZEKIEL 35 Bible Online

EZEKIEL 35 - Phom Naga bible

EZEKIEL 35

¹SHEMBÜPAlei shah ngei touei peiteke:

²“Shennyak ha, nüngei dhe Edom am khüei meetuh,

³hatü SHEMBÜPA Kahvangi hapakei enyüke shei teteivanei etuh: Edom am, ngeiyü nüng khüei nyüpeih, ngei am lavüngtoiyei leitükhem ngelei lak nohen,

⁴Ngei nüngei chingthü mangtükhen hatü nüng lavüngtoiyei tuhphonghen. Shejüang ammi ngeiyü SHEMBÜPA Kahvang shei nyinghen.”

⁵“Mehenangkü amü Israel am mü aivang den mebü ve vaihamteke, hatü Israel am ponghahpü nyih, hatü dohpü hanghi pongpü hepak kü ammi jom nyemmah shei vepa lak kü shuohpeih;

⁶hanangkü ngeiyü vanyangyem Kahvang shei SHEMBÜPA Kahvangi enyüke, ‘Ngei am shing iy yenhen temphahen hatü hapa iy-i am kü changhen; mehenangkü ammi iy-aongmashateihen kü nejiühitpü nangkü, iy-aongmashateipai am kü changphahen.

⁷Ngei Edom amü lavüngtoiyei yakphonghen, hatü jom touei peipü leipü peü dohtükhen.

⁸Ngei ammei kahshangthü mahmahngi mahühen; yani mahpüthü ammei kahshang, kahji hatü yungyenthü kemeilei mahühen.

⁹Ngei am den kü lavüngtoiyei tuhphonghen; ammei jilathü kü shennyak chingchingei nenyuhen. Shejüang ammi ngeiyü SHEMBÜPA khih shei nyinghen.’ ”

¹⁰Mehenangkü ammi, “Judah hatü Israel jat nyiyü hamei vaihen, hatü ngei, SHEMBÜPA halei nyujao hami hapa kahdok kaamei yahhen” shei eteke.

¹¹Hanangkü ngeiyü vanyangyem Kahvang, ammi hathü kü mongshihpü, hatü jom kü jiühitei mükhakpü aimü ngei am kü dou dükhen, hatü mechem ngei am kü shahphenhenshang, jom mü ngei nyupü nyinghühen.

¹²Shejüang ammi Israel kahshangthü vüshih-ei epü ngei, SHEMBÜPAi danteke shei ammi nyinghen. “Jomü lavüngtoiyei nyupeih, hatü jeni jom lühtükhen shuohpeih” shei ammi eteke.

¹³“Ajükiyao neyingi ammi ngei khüei changmei shah epeih, hatü ha ngei dantepih.

¹⁴Mechem kahdoknyü kemei mongonghen, ngei amü lavüngtoiyei tuhphonghen shei SHEMBÜPA Kahvangi enyüke.

¹⁵Mechem Israel jat amei mükjüp lavüngtoiyei nyupa, am mongongpeih; hanangkü ngei hapa dükhen. Nüng lavüngtoiyei tuhhen, Oh Seir Kahshang, nüng hatü Edom kemei. Shejüang ngeiyü SHEMBÜPA khih shei jomi nyinghen.”