Read Phom Naga EZEKIEL 36 Bible Online

EZEKIEL 36 - Phom Naga bible

EZEKIEL 36

¹“Shennyak ha, Israel kahshangthü kü, ‘Oh Israel kahshangthü, SHEMBÜPAlei shah bangtuh shei teteivanei etuh.’

²SHEMBÜPA Kahvangi hapakei enyüke: Vepathüi am kü, ‘Aha!’ meyangmeyangpü shangtaothü-ü jenei vaidaiteke” shei enyüke.

³Hanangkü SHEMBÜPA Kahvangi hapakei enyüke shei teteivanei etuh: Mehenangkü jomi amü lebü jatthülei lakmongei nyemnyu, hatü mihnyiyangnyai jatli, hatü yaüeilungei eteihen doutennangshai nyemlei shei am kü lem peü philemei lavüngtoiyei tuhhen ngümteke.

⁴Hanangkü Oh Israel kahshangthü, SHEMBÜPA Kahvangei ngeü bangtuh: Am shinei nyupü jatthüi mophimo yahlangtü ne-ienelemi lavüngtoiyei yakphongpü kahshang, kahji, shanghishong, shohinga, lavüngtoiyei yakphongpü shinghiphei hatü jilathü kü SHEMBÜPA Kahvangi ha enyüke.

⁵SHEMBÜPA Kahvangi hapakei enyüke: Ngei mongshih wong kempai lebü jatthü hatü Edom am kempü kü khüei ha enyeih. Mehenangkü jomi naamnyi nyiyei mongongei hatü yaüeilungei ngelei kahdok hatü haleipü yinghilong kaamlangpeih.

⁶Hanangkü Israel kahdok nangkü teteivantuh, hatü kahshang, kahji, shanghishong, shohingathü kü SHEMBÜPAi hapakei enyüke shei etuh: Am kü lebü jatthüi yaüeilungpü ponghahpü nangkü ngei mongshih wong kemei enyeih.

⁷Hanangkü SHEMBÜPA Kahvangi hapakei enyüke: Am shinei nyupü jatthü peü jomao yaüeilunghahpü ponghen.

⁸Shejao nüng, Oh Israel kahshangthü, kaohilak phaakei daihen, ngelei nanglak Israel am kü betjük jükhen; mehenangkü jom lomi shem yemei leidaikahen.

⁹Veituh shaang, ngeiyü am shingvaishi nyüpeih; ngei am touei nyokei leikahen, hatü ammi han hokei sheili haihen,

¹⁰hatü ngei ammei nanglak Israel am shemthü kemei dahühen; jilathü kü shennyak chingchingei nyuhen, hatü lavüngtoiyei tuhpü shingthü leiyei linghen;

¹¹hatü ngei am kü hangku hatü yemhimak daphahen. Jom daeisheyei betjük jükhen, hatü meyangpü hepak kü keiha chingchingei nyuhühen, hatü sheleipü kao nyeishi daeishehen. Shejüang ngeiyü SHEMBÜPA Kahvang khih shei amphongi nyinghen.

¹²Ngei ngelei Israel nanglakthü nüng touei müei leikahen, hatü jomi nüngü jomei mükjüp vailanghen. Nüngi hajük kü jomei hühihathü aeiyeileyei netuhhen.

¹³SHEMBÜPA Kahvangi hapakei enyüke: “Amü shennyak hahpü am hatü amü hühihathülei kahdok gühpü am” shei jomi am kü epü nangkü,

¹⁴hajük kü am shennyak hahpü am nevaihen hatü hühihathülei kahdok gühpü am neleihen shei SHEMBÜPA Kahvangi enyüke;

¹⁵hatü hajük kü lebü jatthüi am kü yaüeilungei epü nedanhühen; hajük kü shennyakthülei mongmang nekohühen, hatü ammi laophülei jat huluh neshuohhühen shei SHEMBÜPA Kahvangi enyüke.

¹⁶SHEMBÜPAlei shah ngei touei peiteke:

¹⁷Shennyak ha, mechem Israel am phang laophülei kahdokei nyupa, jomei lemthü, jomei douthü, hatü ngei touei jomi dükpeyü nyüha hük hangha tenpü hepak kü nedaüi leipükei nyuhampeih.

¹⁸Hanangkü hapa kahdok kü jomi iy yenhüpü nangkü, hatü jom sheihpü lajeithü nangkü ngei ngelei mongshih jom kü khapshuohpeih.

¹⁹Ngei jatthü touei jom haitük, hatü jom kahmük peü lemei yandaipeih; jomei dou hatü dükhiling aimü ngei jom kü shahphenpeih.

²⁰Shejao mechem jom jatthü touei peipa, melei melei jom daipa, jomi ngelei daülangpü men ne-ienelempeih; hanangkü jom nangkü hapakei eteihampeih, “Hathüyü SHEMBÜPAlei nanglakthü, shejao jomü kahdok kübü la laakei daihen mü hetpü khih”

²¹Shejao Israel ami dailem peü kü lebü jatthü touei ne-ienelemi yaktükpü ngelei daülangpü men kü kenei deihpeih.

²²Hanangkü SHEMBÜPA Kahvangi Israel phang kü hapakei enyüke shei etuh: Hapayü ammei men kü nevai, Oh Israel phang, shejao ammi daipü jatthü touei ne-ienelemi yaktükpü ngelei daülangpü men kü ngei ha dükhen.

²³Ammi lebü jatthü touei neienelemi sheihtükpü ngelei longpü men daütükhen, hatü jatthüi ngeiyü SHEMBÜPA shei nyinghen. Am homei jomei mük touei ngelei daülangshemshe huhen shei SHEMBÜPA Kahvangi enyüke.

²⁴Ngei am jatthü peü toueipü, kahmükthü peü lemeipü thailanghen, hatü ammei kahdokei müei leihen.

²⁵Ngei am kü daülangpü yungi haihen, hatü nedaünelangpü lemphü kübü, hatü ammei lajeithü peü kübü ngei am daütükhen.

²⁶Ngei am kü mongdang ja hük yahphahen, hatü laangha ja hük ammei mong kü shihphahen, hatü ngei am leipü yaong mongdang yaktüktü phai mongdang hük yahphahen.

²⁷Ngei am kü laangha ja hük shihphahen, hatü ngelei shahkungnyü kü mühühen, hatü ngelei vanglem noteihen kenhinghühen.

²⁸Shejüang ngei ambü ampa kü shuohpü kahdok kü nyuhen, hatü amphongü ngelei nanglak, hatü ngeiyü ammei Kahvang vaihen.

²⁹Ngei am nedaünelang peü kübü yanghen, hatü ngei lemphü moihiman nyükhen, hatü am changeishaei nyuhen, hatü am kü shaühile nepeihühen.

³⁰Ngei betjük püthü kü betjük jükpü, hatü kah kü hahying changshi vamhühen; hapai jatthü khongkü am kü shaühile shanghah-i nehanghihühen.

³¹Shejüang ammi ammei mang lemthü, hatü ammei mang douthü deih-ei danghen, hatü am nyingi ammei mang hatü jiühitpü douthü kü jiühitkahen.

³²Hayü ammei men kü düknyu nevai shei ammi nyingtuh shei SHEMBÜPA Kahvangi enyüke. Ammei doutenthü deih-ei veüei, mongmangei deihtuh, Oh Israel phang.

³³SHEMBÜPA Kahvangi hapakei enyüke: Ngei am mang peü kübü daüphopü nyih, ngei jilathü kü chingchingei nyuhühen, hatü lavüngtoiyei nyupü shingthü lingei leihen.

³⁴Peihpü leipüthüi eeshi lavüngtoiyei yakphongpü kahdok kü ha nang jeiyei neyei kah linghen.

³⁵Hatü jomi, “Hapa kahdok lavüngtoiyei tuhphongpeyü shaangü Eden pemong kei leidaiteke, hatü lavüngtoiyei yakphongpü, bentükpü jilathü sheyü shennyaki maei penyü showlangteke” shei ehen.

³⁶Shejüang am shinei tuhpü jatthüi ngei, SHEMBÜPAi hapa bentükpü shingthü lingei leiteke, hatü lavüngtoiyei tuhpü shingthü kü sheili neyei sheiteke shei nyinghen. Ngei, SHEMBÜPAi ha etepih, hatü ngei ha dükhen.

³⁷SHEMBÜPA Kahvangi hapakei enyüke: Shao chem ngei Israel ami phepü kü mong shuohhen, hatü jom kü ha dükhen: Ngei jomei nanglak mikhong keiha,

³⁸mohitap kü Jerusalemei moilahen deihpü mithü dahühen. Hapa keiha bentükpü chingnyüthü hangkui maei nyuhen. Shejüang jomi ngeiyü SHEMBÜPA khih shei nyinghen.