Read Phom Naga EZEKIEL 37 Bible Online

EZEKIEL 37 - Phom Naga bible

EZEKIEL 37

¹SHEMBÜPAlei lak ngei shak kü nyu, hatü SHEMBÜPAlei laanghai ngei müei daiyei vangtao mon maei nyupü kahji hükei uohüteke.

²Büpai ngei hathü shinei müei dei; kahjilei hathü longi nyuteke, hatü hathüyü longi vandaitü nyuteke.

³Büpai ngei kü, “Shennyak ha, hathü vangtao yem leikahen aoküla?” shei pheteke. “Oh SHEMBÜPA, nüngi-üng nying” shei ngei jangei e.

⁴Hahepak kü büpai ngei kü e, “Hathü vangtaothü kü teteivanei eyeishuoh: Oh vandaipü vangtaothü, SHEMBÜPAlei shah bangtuh.

⁵Hathü vangtaothü kü SHEMBÜPA Kahvangi hapakei enyüke: Ngei amphong kü ngü shihhen, hatü am yem leihen.

⁶Ngei amphong kü nyimnyaam vamhühen hatü ha kü phai vamhühen, hatü ha kü shuwi jümhen, hatü ngü shihphahen, hatü yem leihen, hatü ammi ngeiyü SHEMBÜPA khih shei nyinghen.”

⁷Ngei kü ephopü keiha ngei teteivanei e, hatü ngei teteivanei eshingkü ngangahük kü jenao jenshi ngeü hük vam, hatü vangtaothü hüki hük mü thentei.

⁸Ngei veishuohjü vangtaothü kü nyimnyaam vamei nyu, hatü phai vam, hatü ha kü shuwi jüm shejao hathü ngü neshiüi nyu.

⁹Hahepak kü büpai ngei kü e, “Ngü kü teteivanei etuh, shennyak ha: vaungjung ali kübü vanglük peikei hatü yem leihen shingvaishi hathü mahng kü ngü heeyeishuoh shei SHEMBÜPA Kahvangi enyüke.”

¹⁰Ngei kü ephopü keiha ngei teteivanei e, hatü hathü kü ngü peiteke, hatü yem leiyei khongnyü longpü leiyei yaongkemteke.

¹¹Hahepak kü büpai ngei kü, “Shennyak ha, ha vangtaothüyü Israel am phang kempü hih. Hamei vang vandai; monglempü mahdai, hatü ham chemjalak kü ngoikahen laphen neshiü” shei jomi eteke.

¹²Hanangkü teteivanei hathü kü SHEMBÜPAi hapakei enyüke shei etuh: “Ngei ammei mahngchongthü aphen, hatü am mahngchong leipü paohühen, Oh ngelei nanglak, hatü ngei am Israel kahdokei müei leihen.

¹³Mechem ngei ammei mahngchong aptü haleipü am paohühenshang, Oh ngelei nanglak, ammi ngeiyü SHEMBÜPA khih shei nyinghen.”

¹⁴Ngei am kü ngelei laangha shihphahen, hatü am yem tuhphonghen; shejüang ngei, SHEMBÜPAi ha eteke, hatü ha dükkahen shei ammi nyinghen shei SHEMBÜPAi enyüke.

¹⁵SHEMBÜPAlei shah ngei touei peiteke:

¹⁶“Shennyak ha, peshow hük yah-ei hapa kü, ‘Judah ongching’ shei nyangtuh. Shao peshow lebü hük yah-ei hapa kü, ‘Israel ongching’ shei nyangtuh,

¹⁷hatü nüngei lakei peshow hük mon keiha eehen shingvaishi haüpteitü notuh.

¹⁸Mechem nüngei nanglakthüi nüng kü, ‘Hathü mehe lappa, nüngi ham kü nehuphahen je?’ shei ephahenshang,

¹⁹nüngi jomphong kü, ‘SHEMBÜPA Kahvangi hapakei enyüke’ shei etuh: ‘Ngei Israel am jat lappü peshow yah-ei Judah am lappü peshow mü chemi hük leiyei haüphen, hatü henyiphen ngelei lakei hük mon leihen.

²⁰Nüngi nyangpü peshow nanglakthüi eeshi notuh,

²¹hatü SHEMBÜPA Kahvangi hapakei enyüke shei hathü kü etuh: Ngei Israel am jatthü touei yandaipü peü leihen, ngei jomphong peü lemeipü thaihen, hatü jomei kahdokei müei leihen.

²²Ngei hapa kahdok Israel kahshangthülei jomphongü jat hük leiyei mongjemhühen. Jom shak kü ong hüki mon vanglem lemhen, hatü jom hajük kü ongching nyi nenyuhen, nevaijü ongching nyi vaishi nehanhen.

²³Sheyü jom nyingi jomei lajeithü, hatü jiühitnalaipü douthü nevaijü lebü pungpüshaipü homei mang nethahhen; mehenangkü ngei jomphong vüpü mang kübü yanghen, hatü ngei jom daütükhen. Shejüang jomphongü ngelei nanglak, hatü ngeiyü jomei Kahvang vaihen.’ ”

²⁴Ngei chongphobü David keipü ong hüki jom kü ong vaihühen, hatü jom peü shak kü mi yombü hük mon nyuhen. Jomi ngelei shahkungnyü phei mühen, hatü ngelei vanglemthü kenhingei noteihen.

²⁵Ngei ngelei chongphobü Jakob kü shuohpü kahdok, chebü chepa am nyuhampü kahdokei jom nyuhen. Jom hatü jomei hühihathü halei den kü nyuhen, hatü ngelei chongphobü David keipü ong hüki jom kü den kü ong vaihen.

²⁶Ngei jom mü chingmeivangmei vangpüshuwpü hük linghen; hapayü nedohnetenpü vangpüshuwpü vaihen; ngei jom kü moihimanhen hatü jom nanglak dahüshehühen, hatü ngelei phopshem düngei jomei kahdokei chonglingei tuhhen.

²⁷Ngei jom mü nyuhen; ngei jomei Kahvang, hatü jomphongü ngelei nanglak vaihen.

²⁸Mechem ngei ngelei phopshem düngei jomei kahdokei chonglingei tuhhenshang ngei SHEMBÜPAi Israel am jepü khih shei jatthüi nyinghen.