Read Phom Naga EZEKIEL 39 Bible Online

EZEKIEL 39 - Phom Naga bible

EZEKIEL 39

¹“Shennyak ha, ‘SHEMBÜPA Kahvangi hapakei enyüke’ shei Gog khüei teteivanei etuh: Ngei nüng khüei nyüpeih, Oh Gog, Meshekh hatü Tubal amei ongpa.

²Ngei nüng kü shinhühen, hatü shüei daihen. Ngei nüng tailu kahdok apshaphi leipü Israel kahshangthü khüei shomhen.

³Hahepak kü ngei nüngei laknyong lemeipü lahhan kü bheihen hatü nüngei lakdahphi leipü lahhan vütükhen.

⁴Nüng hatü nüngei veshanthü hatü nüng mü nyupü jatthü peü Israel kahshangthülei dohen. Ngei amphongü asha alang phai, hatü yemhimakei het vaihühen.

⁵Amü koshoyalei dihen, ngei ha etepih shei SHEMBÜPA Kahvangi enyüke.

⁶Ngei Magog kü, hatü yungching yungkungei nyupüthü kü aw shomhen; shejüang jomi ngeiyü SHEMBÜPA khih shei nyinghen.”

⁷Ngelei nanglak Israel am kü ngei ngelei daülangpü men nyinghühen. Hajük kü ngei ngelei daülangpü men nesheihhühen, hatü jatthüi ngeiyü SHEMBÜPA, Israel amei Daülangpü Kahvang shei nyinghen.

⁸Ha peikünyüke! Ha hingmei vamkahen shei SHEMBÜPA Kahvangi enyüke. Ngei epeyü hapa nyih hih.

⁹Hahepak kü üam Israel amei jilathülei nyu, jomi vehok phunglang kaakei aw kü jakheninyü, iha, lah, lahhan, phung hatü miyaung hathü vangbong nyet thahshi pü vaishi aw kü jakhen.

¹⁰Jomi kah leipü pü nenahen nevaijü phaü leipü aghen napü neshiü; mehenangkü jomi vehok phunglang kaakei aw kü jakshi nyuhen; üami jom kü aeteishetepa, jomiyao ha am kü aeteishehen shei SHEMBÜPA Kahvangi enyüke.

¹¹Hapa nyih Israel kahdokei Dipü Yungching heong philemei Yendaiouham Kahji touei ngei Gog vühen mahngchong hük shuohhen. Gog hatü büpalei veshanthülei mahng vüpü nangkü yendaiouham lem küpdaihen, hatü hapa kahji kü, “Gog-ei Veshanthülei Kahji” shei nyükhen.

¹²Kahdok daühühen shingvaishi Israel ami mahng vüpü lenyang nyet yahhen.

¹³Kahdok kü nyupü nanglakthü peüi mahng vühen, hatü ngelei müknyinshekhang hupü nyih jomi dhüm danghen, shei SHEMBÜPA Kahvangi enyüke.

¹⁴Kahdok daühühen shingvaishi shennyak düngei dou kü choishi nyuhen. Hanei kahdok peü lemei daihen, ha kü üei haneiyü aokpü mahng vühen. Vangbong nyet pheikü jomphongi hapakei yemei chongpanghen.

¹⁵Jom hapakei yemei daishingkü shennyak hanei-i mahngvang dangjema, jomi hatouei phuo haongei tuhhen, hatü mahngsha shopü ami Gog-ei veshanthülei Kahjilei vüei tuhhen.

¹⁶Shao halei Hamonah chingao nyukahen. Hapa keiha jomi kahdok daütükhen.

¹⁷“Shennyak ha, SHEMBÜPA Kahvangi hapakei enyüke: Ouhiyüh hatü phaüyemthü peü kü nyüktuh: Israel kahshangthü kü ngei jakpü moila longpü am shingvaishi tempü hapa moila shingei peü lemeipü thaitü chemi peikei. Halei ammi phai hahhen hatü iy yinghen.

¹⁸Bashan leipü nitshüpü yemhimakthü mi hi yum hatü mohoh keiha ammi wong kohpü shennyakthülei phai hahhen, hatü ongthülei iy yinghen.

¹⁹Ngei am shing tempü jakpü moila shingei ammi cheü tengshi hahhen, hatü iy chokshi yinghen.

²⁰Ngelei nükdülei amphongi koyei hatü halei uopüthü wong kohpü shennyak hatü veshanthü lemphüli moh-ei hahhen” shei SHEMBÜPA Kahvangi enyüke.

²¹Ngei jatthü kü ngelei müknyinshekhang huhen, hatü jatthü peüi ngei jom kü hanghi shuohpü hatü lak shihpü eehen.

²²Hapa nyih mü leitü Israel ami ngeiyü SHEMBÜPA, jomei Kahvang shei nyinghen.

²³Ngei kü hingnelempü jomei mang tata kü Israel nanglakthü wüpküpei daipü khih shei lebü jatthüi nyinghen. Hanangkü ngei jom toueipü ngelei dhe jodai, hatü vepalei lak kü shuoh, hatü yani mahpeih.

²⁴Ngei jom mü jomei nedaünelang hatü jomei mang aimü dükpeih, hatü jom toueipü ngelei dhe jodaipeih.

²⁵Hanangkü SHEMBÜPA Kahvangi hapakei enyüke: Ngei shaang wüpküp leipü Jakob müei leihen, hatü Israel nanglak peü kü ngei shinshanghen, hatü ngei ngelei daülangpü men kü nyakeikenhen.

²⁶Jom nyemhühen üpayao neshiüi mechem hapa kahdok kü nyiushemmei kü nyuhenshang, jomi ngei touei veü pongpü hatü hingnelempü peü betükhen.

²⁷Mechem ngei jom jatthü leipü müei leihen hatü jomei vepathü kahmük leipü thaiyei leihenshang, lebü jatthülei müksho kü ngeiyü daülangpü shei huhen.

²⁸Shejüang jomi ngeiyü SHEMBÜPA, jomei Kahvang shei nyinghen; mehenangkü ngei jom wüpküpei deishih, hatü hükao ne-aophongi jomei kahdokei müei leipeih shei nyinghen.

²⁹Hajük kü ngelei dhe jom toueipü nejodaihen; mehenangkü ngelei laangha Israel phang kü khüpshuohhen shei SHEMBÜPA Kahvangi enyüke.