Read Phom Naga EZEKIEL 40 Bible Online

EZEKIEL 40 - Phom Naga bible

EZEKIEL 40

¹Hapayü wüpküpei nyupü vangbong hapüngapabü chongpangpü len nyih anpabü kü hatü Jerusalem chingnyü dophei kü vangbong anpüalipabü ha nyih SHEMBÜPAlei laki ngei kü düktü büpai ngei halei müei dei.

²Manghkhang hük kü büpai ngei Israel kahdokei müei dei, hatü shaopü kahshang hükei uohü. Pehephi lemei veiheni chingnyü hük leshi shemthü longi eeteke.

³Büpai ngei halei müei dei, hatü shennyak hük veiheni melangnyiam keiha ngei eeteke; büpalei lakei nyemin vülep hük hatü shethen nyiamlüng hük notü shadenei yaongshi nyuteke.

⁴Hapa shennyaki ngei kü, “Shennyak ha, nüngei müki veituh, nüngei dhaongi bangtuh hatü ngei mehe huphahen, ha kü mong shuohtuh; hapa nadang kü nüng hatouei deipeih. Nüngi eepü lemphüli Israel phang kü etuh” shei ephüteke.

⁵Phopshem shinpü kü bhami shinei yahtü ngei ee. Hapa shennyakei lakei nopü nyiamlüngü meter jem lushi nyuteke. Büpai hapa shetshingkü chetpü kü meter jem, shaopü kü meter jem nyu.

⁶Hapheikü büpai heong philei meepü shaden lemei heih. Büpai lateen kü aongtü hapa shaden shakungtüng kü shet, hatü hapayü meter jem nukei shüei nyuteke.

⁷Ha haolei peih-ei dailem hük nyu; nyonghidah dangpongei veyom dung jem baong nyu. Dungnuk ieyei bahiyang hükkei meter jem baong shiüteke, hatü dungnuk hi dungnuk aa ieyei kübü bham chetpü kü meter nyi mü bhaoei nyuteke. Veyom dungnuk haolei peih-ei dailem hük meter jem lushi nyu, hatü phopshem philei meepü chingdung kü thenei nyupü shaden shakungtüngü meter jem nukei shüei nyuteke.

⁸Hapheikü büpai hapa shaden kübü chingdung shetteke;

⁹hatü hapayü meter ali nukei shüei, hatü hapalei shaden shemha kü meter hük chetshi nyu. Hapa shaden leipü chingdungü phopshem philei meeshi nyuteke.

¹⁰Heong peshaden dangpongei veyomshem jem baong nyu; ha jemphen bahiyang aihük mü nyu, hatü shale dangpong phenkü bahiyang aihük mü nyu.

¹¹Hapheikü büpai shaden kam shetshingkü meter vok mü bhaoei nyu, hatü ba kü meter nga nyu.

¹²Veyomshem ieyei kü she philei shakung shaopü kü centimeter 50, hatü chetpü kü centimeter 50 nyu.

¹³Hapheikü büpai ngaümpheiphi bham hük kübü hük thahshi veyomshem hi veyomshem aa kü shetshingkü meter anpünyi mü bhaoei nyu.

¹⁴Büpai shemshom shetshingkü meter an nyu, hatü chingkon shing peü kü shale mü dheanpü peshadenao shetteke.

¹⁵Shühen shaden chingshephi kübü shemshom mongphi thahshi meter hapünga nyu.

¹⁶Veyomshem hatü shalethü kü ümha shaden nyuteke, hatü ha kü peshaden mongphi shinei shaküp nyu, hatü shemshom mongphi peü kü shinei ümha shadenthü nyu, hatü shalethü kü palm pü ow shih-ei nyu.

¹⁷Hapheikü büpai ngei chingshephi chingkonei müei dei; halei chingkon shinei dung hapüan thahshi jintükpü aangshungba kü vetü nyu.

¹⁸Hapa jintükpü aangshungü shaden sheetei shaden yang aimü lingteke. Shem mong leipü aangshungba meyü chingshe leipü-üng nyaümshi nyuteke.

¹⁹Hapheikü büpai maipa chingshe shaden mongphi kübü mong lemeipü chingkon aa shetshingkü meter 50 nyuteke.

²⁰Hapheikü büpai apsha philei meepü chingkon shetteke.

²¹Hapa dangpongei jem baong nyupü veyomshem, shale hatü shemshom shetshingkü shongpü shaden leipü kei bahiyang aihük mü nyu; hapalei yang kü meter hapünga, hatü ba kü meter anpünyi mü bhaoei nyu.

²²Haleipü ümha shadenthü, shemshom hatü haleipü palm püthü kemei heong philei meepü shaden kü kei aihük bahiyang nyuteke. Hapalei lateen nyet thahshi aongei nyu, hatü hapalei shemshomü mong lemei nyu.

²³Heong philei nyupükei apshaphi shaden kü khangteishi mongeipü chingdungei shühen peshaden nyu, hatü shaden kübü shaden thahshi shetjü meter 50 thahshi nyu.

²⁴Hapheikü büpai ngei pehephi lemei müei dei, hatü halei shaden hük nyu. Büpai haleipü shale hatü shemshom shetshingkü lebüthü kei-üng nyu.

²⁵Hapa kü shonei ümha shadenthü nyu, hatü haleipü shemshom kü lebüthü kü nyupükei ümha shaden yang kü meter hapünya, hatü ba kü meter anpünyi mü bhaoei nyu.

²⁶Hapalei lateen nyet thahshi aongei nyu, hatü hapalei shemshomü mong lemei nyuteke. Shale ieyei kü dangpongei palm pü ow hükbaong shih-ei nyu.

²⁷Pehephi shaden mongeipü chingdungei shaden hük nyu, hatü büpai shaden kübü shaden thahshi shetjü meter 50 nyu.

²⁸Hapheikü büpai ngei pehephi peshaden homei mongpa chingdung konei müei dei, hatü büpai pehephi peshaden shetshingkü lebü peshadenthü kei-üng bahiyang aihük mü nyuteke.

²⁹Haleipü veyomshem, shale hatü shemshom shetshingkü lebüthü kei-üng aihük mü nyuteke; ha kü shinei ümha shadenthü nyu.

³⁰Halei shemshomthü shinei nyu, hatü hapa yangkü meter hapünga hatü ba kü meter anpünyi mü bhaoei nyu.

³¹Haleipü shemshomü chingdung philei meeshi nyu, hatü shale kü palm pü ow shih-ei nyu, hatü halei lateen shet thahshi aongei nyu.

³²Hapheikü büpai ngei heongphi peshaden homei mongpa chingdungei müei dei, hatü büpai heongphi peshaden shetshingkü lebü peshadenthü kei-üng bahiyang aihük mü nyuteke.

³³Haleipü veyomshem, shale hatü shemshom shetshingkü lebüthü kei-üng aihük mü nyuteke. Ha kü shinei ümha shadenthü nyu. Halei shemshomthü shinei nyu, hatü hapa yangkü meter hapünga hatü ba kü meter anpünyi mü bhaoei nyu.

³⁴Haleipü shemshomü chingdung philei meeshi nyu, hatü shale kü palm pü ow shih-ei nyu, hatü halei lateen nyet aongei nyu.

³⁵Hapheikü büpai ngei apshaphi peshaden homei mongpa chingdungei müei dei, hatü büpai apshaphi peshaden shetshingkü lebü peshadenthü kei-üng bahiyang aihük mü nyuteke.

³⁶Haleipü veyomshem, shale hatü shemshom shetshingkü lebüthü kei-üng aihük mü nyuteke. Ha kü shinei ümha shadenthü nyu. Halei shemshomthü shinei nyu, hatü hapa yangkü meter hapünga hatü ba kü meter anpünyi mü bhaoei nyu.

³⁷Haleipü shemshomü chingdung philei meeshi nyu, hatü shale kü palm pü ow shih-ei nyu, hatü halei lateen shet aongei nyu.

³⁸Jakpü moila paühen shingvaishi peshaden toueipü shemshom shaden touei dung hük nyuteke.

³⁹Shemshom shaden dangpongei haüdü nyi halei jakpü moila, mang moila hatü pungpü moila shuohpü yem jühen haüshi nyuteke.

⁴⁰Apshaphi peshaden toueipü shemshom chingshelei haüdü nyi nyu, hatü hükpa lemeipü shemshom peshaden touei haüdü nyi nyuteke.

⁴¹Hapa peshaden mong lemei haüdü ali, shak lemei aliyemhathü jühen haüdü peüshep shet nyuteke.

⁴²Shao jakpü moila shuohhen shingvaishi yaong shangei lingpü haüdü ali shaopü kü centimeter 50, bahiyang shinpü kü centimeter 75 nyu. Hapa keyü yemhimak moila jüteipü douhinang haühen nyuteke.

⁴³Hapa haüdü shinei ba kü millimeter 75 shinei ling, hatü jakpü moila shuohhen phai kemei halei haüteke.

⁴⁴Hapheikü büpai ngei mongpa chingdungei müei dei. Halei kesho lokbüthü shingvaishi dung nyi nyu; hükü apsha peshaden touei pehe philei shemshe meeshi nyu, hatü hükü heong peshaden touei apshaphi lemei meeshi nyuteke.

⁴⁵Büpai ngei kü, “Hapa dung pehe philei meepeyü phopshemei chongphopü ngongpathü shing vaihen,

⁴⁶hatü apsha philei meepü dungü moidülei chongphopü ngongpathü shing vaihen. Hathüyü Zadokei hühihathü, Levi phang khong kübü jomphong mon SHEMBÜPA chongphohen nangkü yopailei heihhen” shei e.

⁴⁷Hapa shennyaki chingdung shetshingkü shinpü bahiyang kü meter 50 nyuteke.

⁴⁸Hapheikü büpai ngei phopshem leipü shemshom touei müei dei, hatü büpai shemshom leipü shale shetshingkü chüpü kü meter nyi mü bhaoei, hatü ba kü meter nyet hatü shing nyiphen kü bham chetpü kü meter hük mü bhaoei nyuteke.

⁴⁹Hapa dungei shüpü lateen kü ba kü meter an, chüpü kü meter vok nyu. Shüpü lem dangpongei shemnyü haongshi nyuteke.