Read Phom Naga EZEKIEL 42 Bible Online

EZEKIEL 42 - Phom Naga bible

EZEKIEL 42

¹Hapheikü büpai ngei chingshe leipü chingdungei müei an, hatü phopshem mü khangteipü hatü apshaphi leipü shem kü khangteipü dungei müei dei.

²Apshaphi leipü shemü yangkü meter 50, hatü ba kü meter 25 nyu.

³Shing hük philei hapayü ba kü meter an kohshi phopshem mongphi leipü shingkong philei meeshi nyu, hatü hapa shing lemeiyü chingdung leipü chingsheba lemei meeshi nyu. Hapa dungthüyü hük dok kü hük shei jaan jem dheanei veteke.

⁴Dungthü she philei mongei shüpü lem kü ba kü meter nga, hatü yangkü meter 50 nyu; hatü shemshe apsha lemei nyu.

⁵Dok leipü dungü jiampa hatü chongeipü meyü maanshi nyu.

⁶Dung jaan jem nyu, hatü hathü kü lebü kü kei shemnyü neling; mehenangkü jiampa hatü chongeipü dung nyi leimeyü dokpa leipü ngaümphei lemei shinei leitü ling.

⁷Chingshe philei chingdung lemeipü dungthü mü khangteiyei bham lingei nyu; hapayü yangkü meter hapünga shiüteke.

⁸Chingdung leipü dungthü kü yangkü meter hapünga nyu, hatü phopshem mü khangpü dungthü kü meter 50 nyuteke.

⁹Hapa dungthü la lemei chingdung leipü shühen shingvaishi heong lemeipü shühen lem hük nyu.

¹⁰Phopshem pehe philei heshüphi phopshem dohpü phikü ahshi taishi nevai-i phopshem leshi shem hük nyuteke.

¹¹Hapa dungthü she lemei apsha lemeipü dungthü kü nyupükei lemthü shiüteke. Hapayü bahiyang hükkei, dükyem aihük hatü shadenao aihük mü nyuteke.

¹²Bham chongpangpü heongphi dohpü lemei hapa shem pehe lemei hathü dungthü phangei shaden hük nyuteke.

¹³Hapa shennyaki ngei kü, “Hapa shem nyiphen daülangpü nyüke. Hapa shemei ngongpathü üami SHEMBÜPA nyushing ngoiyei shü, jomi halei longi daülangpü hahying hahhen. Mehenangkü hathü dungthü peü daülangpü; ngongpathüi halei longi daülangpü moilathühahying moila, mang moila, pungpü moila tuhhen.

¹⁴Mechem ngongpai daülangpü shingei shühen, jomi chongphonüng kü owtü shüpü owhiai hatouei hukei netuhphongi chingdungei nanglakthü nyupü touei nevamhen; mehenangkü hathüyü daülangpü; jomi owpü ngong-ow hukei tuhphongtü mon nanglakthü nyupü shingei vamhen aok” shei eteke.

¹⁵Mechem büpai phopshem mongphi shetei kempa, büpai ngei heong philei meepü shaden lemei müei ngai, hatü phopshem shinpü shetteke.

¹⁶Büpai shetpü vü yah-ei heongphi shetshingkü meter 250 nyu.

¹⁷Shao büpai apshaphi shetshingkü haleiyao meter 250 nyu.

¹⁸Büpai shao pehephi shetshingkü meter 250 nyu.

¹⁹Hapheikü büpai heshüphi shetshingkü meter 250 nyu.

²⁰Büpai lem aliphen kü shetshingkü bahiyang kü meter 250 baong nyuteke. Hapa bhami daülangpü hatü nedaüpü aa kü baong hanpü hük nyuteke.