Read Phom Naga EZEKIEL 43 Bible Online

EZEKIEL 43 - Phom Naga bible

EZEKIEL 43

¹Hapheikü hapa shennyaki ngei heong philei meepü peshaden touei müei dei.

²Halei Israel Kahvangei müknyinshekhang heongphi leipü peiteke; hapalei ngeü yungching ngeü kei vam, hatü kahdoknyü kü vangngai khangteke.

³Hapa manghkhangü büpai Jerusalem mangtüknüng yiüpü hepak kü eepükei, hatü ngei Kebar yungyenei eepü manghkhang kei shiüteke, hatü ngei kahdokei dhe shüshi doteke.

⁴Heong philei meepü phopshem peshaden lemeipü SHEMBÜPAlei müknyinshekhang shüshingkü,

⁵laanghai ngei noei antü mongeipü chingdung touei shü, hatü phopshemü SHEMBÜPAlei müknyinshekhangi mateke.

⁶Mechem hapa shennyak ngei mü yaongshi nyupa, phopshem leipü shennyak hanei-i ngei kü eteke.

⁷Büpai ngei kü, “Shennyak ha, hapayü ngelei ong uoshing hatü ngelei la shoupshing. Hatouei ngei ngelei nanglak Israel am mü düngei nyuhen. Israel phangi nevaijü jomei ongthüi mükbongjuyungpai nevaijü jomei ongthü dipü mahng homei ngelei daülangpü men nesheihhen.

⁸Mechem ngelei shakung tüngei jomei ongshem shakung hatü ngelei shatüngei jomei shaden lingpa, ngei hatü jom aa kü bhami aamshi jomi jiühitnalai douthü dükpai ngelei men sheihtükpeih; hanangkü ngei mongshihpai jom mahtükpeih.

⁹Shaang jomi lajei khümpü jomei ongthülei mahng ngei toueipü taishi nyemdeilang; shejüang ngei jom mü düngei nyuhen” shei eteke.

¹⁰Shennyak ha, nüngi Israel phang kü phopshem nang eyeishuoh, hatü jomi hapalei düklem shetei yemei nyemvei, hatü jomei mang deih-ei nyemveü.

¹¹Mechem jomi dükpü douthü deih-ei veühen, nüngi jom kü hapa phopshemei küpjan, tempülempü, shühen vamhen lemthü, hatü hapalei düklemhalei noteihen vanglem, hapalei küpjanthü hatü shahkungthü nyinghütuh. Jomi dükhen hatü noteihen shingvaishi küpjan kempü hatü hapalei vanglemthü jomi eeshi nyangtuh.

¹²Hapayü phopshem shahkung. Ha kü shinpü moidoi peü shangching thahshi longi daülangpü vaihen.

¹³Moidü shetpü hapakei nyuhen; phopshem kü shetpü vü aihük noei shetteke. Hapalei la shemshing kü centimeter 50, ba kü centimeter 25 shaoshi nyuhen.

¹⁴Moidü shang kübü maipa jung thahshi meter hük, ba kü centimeter 50, hatü maanpü jung kübü longpü jung thahshi meter nyi hatü ba kü centimeter 50 nyu.

¹⁵Moidü leipü awdepü meter nyi shaoshi nyu, hatü vaung ali daüpei aongpeyü lebüthü mü shaoshi nyu.

¹⁶Moidü leipü awdep shingü bahiyang hükkeikei meter vok baong nyu.

¹⁷Jiam shemao hükkeikei shing nyiphen kü meter nyet baong nyu; ha kü chingdaüphi jung kü centimeter 25 shaoshi khaala shinei nyu, hatü hapa shinpü kü centimeter 50 nyu. Moidülei aongpü lateenü heong lemei meeshi shiüteke.

¹⁸Hapheikü büpai ngei kü, “Shennyak ha, SHEMBÜPAi hapakei enyüke: Hathüyü moidülei vanglemthü nyüke: Jakpü moila shuohhen shingvaishi hapa moidü lingpü nyih hatü halei iy haihen epü nyih,

¹⁹nüngi Levi am ngongpathü Zadok am shem ngei chongphonüng ngei yopailei heihpüthü kü mang moila shuohhen mohohbaong hük shuohtuh.

²⁰Nüngi iy hanei yah-ei moidü jiam kübü nuk aliphen kü hatü shinei nyupü khaala peü kü nyiotuh; hapa keiha nüngi ha daühühen hatü hapa leipü mang daütükhen.

²¹Nüngi hapa mang moila shuohhen mohohbaong yah-ei daülangpü moidoi haolei phopshemei mepa shing jeyei nyu, hatouei deiyei ha jütuh.”

²²Nyih nyipabü kü kawhikang neshiüpü yum chebaong deiyei mang moila shuohtuh; mohohbaong jüei daühüpükei hapa moidü daüdaihen.

²³Mechem nüngi ha daüei kemhen, nüngi kawhikang neshiüpü mohohbaong hük hatü mi baongha hük moila shuohtuh.

²⁴Nüngi hathü SHEMBÜPA touei shuohtuh, hatü ngongpathüi ha kü hüm shihhen hatü hathü SHEMBÜPA kü jakpü moila shuohhen.

²⁵Hapakei nyihjeih nyih nyet mang moila yum shuohhen, hatü shao mohohbaong hük hatü mi baongha hük kawhikang neshiüpü yem khong kübü shuohhen.

²⁶Nyih nyet thahshi moidü leipü mang daühen shingvaishi moila shuohhen, hatü ha daüdaihen.

²⁷Mechem nyih nyet peihhenshang, nyih shetpabü kü ngongpathüi moidülei jakpü moila hatü mongjempü moila shuohhen, hatü ngei ammei moila yahhen shei SHEMBÜPAi enyüke.