Read Phom Naga EZEKIEL 44 Bible Online

EZEKIEL 44 - Phom Naga bible

EZEKIEL 44

¹Hapheikü büpai ngei heong philei meetü chingshe peshaden touei müei dei, hatü hapa küpshi shiüteke.

²SHEMBÜPAi ngei kü eteke: Hapa peshadenü küpshi tuhhen; ha ne-aphen, hatü üpaiyao halei neshühen; mehenangkü SHEMBÜPA, Israel Kahvang ha lemei shüpeih; hanangkü hayü küpei tuhhen.

³Ongpa mon, mehenangkü büpayü ong vaipü nangkü SHEMBÜPA touei hahying hahhen uohen; büpayü peshaden toueipü shemshom lemei shühen hatü ha lemei-üng vamei daihen.

⁴Hapheikü büpai ngei apshaphi peshaden homei phopshem chingshe philei deiteke, hatü ngei veishingkü SHEMBÜPAlei müknyinshekhangi phopshem maei nyu, hatü ngei dhe aümei sha.

⁵SHEMBÜPAi ngei kü eteke: Shennyak ha, meishi nenei hüngei veituh, hatü SHEMBÜPAlei shemei noteihen vanglem hatü hapalei shahkungthü ngei nüng kü ephahen ha meishi mong shuoh-ei bangtuh, hatü üam phopshem mongei shüaokhen, hatü üam neshüaokhen meishi nyingei tuhtuh.

⁶Khüei yaongteipü Israel phangkü SHEMBÜPA Kahvangi hapakei enyüke shei etuh: Oh Israel phang, kung am halei müei shüpai thahpü ammei jiühitnalai peü dohtuh,

⁷ngelei shemei shühen am mongdang hatü phai kü shuw nejapi nyüke; ammi ngei kü mechem hahying cheü hatü iy moila shuohhen, ngelei shem sheihtüknyüke. Ammei jiühitnalai douthü homei ngelei vangpüshuwpü peü mangtükteke.

⁸Ammi ngelei shemei moila shuohhen dousho kü lakchong vaiyei nedüki kung am ha dükei tuhteke.

⁹SHEMBÜPA Kahvangi hapakei enyüke: Kung am, mongdang hatü phai kü shuw nejappüthü, Israel nanglak mü nyupü kung shennyak üpayao ngelei daülangpü shemei neshühen.

¹⁰Shejao Israel am lemnyong kü lüdaishingkü ngei toueipü taishi yanei lüdaipü, lajeithü kü khümei lemnyong kü lüdaipü Levi ami hapa hanghi kohen.

¹¹Jomi peshaden kü veiyei phopshemei ngei chongphohen; jomi jakpü moila yem jühen hatü nanglakthü shing moilathü shuohhen, hatü jomi ha kü veiyei chongphohen.

¹²Mehenangkü jomi lajeithü chongphoei Israel am mang thah-ei huluh shuohhüpü nangkü jomi jomei hanghi kohen shei ngei vangei enyeih shei SHEMBÜPA Kahvangi enyüke.

¹³Jom ngongpa kei chongnephohen nevaijü ngelei daülangpü moilathü yopailei neheihhen vongbong, shejao jomi jomei veü kohen, hatü jomi thahpü jiühitnalai mang jomi kohen.

¹⁴Shejao jomi ashüanyong douthü dükhen shingvaishi ngei jom jeyei tuhhen.

¹⁵Shejao Zadokei hühihathü Levi am ngongpathüi mechem Israel am lemnyongei lüdaihenshang, jomi ngelei daülangpü shing veihen, hatü ngei yopailei jom peiyei chongphohen, hatü jomi ngei kü cheü hatü iy moila shuohhen shei SHEMBÜPA Kahvangi enyüke.

¹⁶Jom mon ngelei daülangpü shingei shühen; ngelei moidü touei chongphohen nangkü peihen, hatü phopshemei chongphohen.

¹⁷Mechem jom mongpa chingdungei shühen, jomi nyemin ow owhen; jomi mongpa chingdung peshadenei hatü mongei shei ngei chongpho shingkü mimum ashakviha neyahhen.

¹⁸Jomi nyemin shangshak, nyemin shüng ashak yahhen, jomi lem-ow shatbenüng ow mepayao neyahhen.

¹⁹Mechem jom nanglakthü touei chingshelei vamhen; jomi chongpho shingkü yahpü ow kemei daülangpü dungei hukei tuhhen, hatü jomi lebü owthü owhen, shejüang owhiai homei nanglakthü kü daülangpü dou kü hongtü nedihühen.

²⁰Jomi sho chaei nekuphen, nevaijü sho lushi netuhhen; jomi sho japtükhen.

²¹Mongpa chingdungei shüshingkü ngongpa üpaiyao yiü neyinghen.

²²Jomphongi vaümnyü mü nevaijü baha mü yanpü nyüha mü shem neyemhen, shejao Israel phang kübü pai mü ngühpü nela mü nevaijü ngongpai tuhphongpü vaümnyü mü shem yemhen.

²³Jomi ngelei nanglakthü kü mepa daülangpü hatü mepa nedaüpü nyuhhen, hatü nedaünelangpü hi daülangpü nyi baong hanei huhen.

²⁴Dehilao kü jomphongü ngelei shahkung aimü shahphenbü vaihen; mohitap peü nangkü jomi ngelei shahkung hatü vanglemthü peü jiüshi nohen, hatü jomi ngelei Sabbath nyih daülangi tuhhen.

²⁵Laophülei pa, nyü, yiükha, yeshang, laophülei jeihinaü hatü doi mangdaipü naüpeü nevaipheikü jomi mahng yopailei heihpai nedaü-i neleihen vongbong.

²⁶Büpa daüpheikü jomi büpa kü nyih nyet ithen,

²⁷hatü büpa daülangpü shingei chongphonüng shüshingkü büpai mang moila shuohhen vongbong shei SHEMBÜPA Kahvangi enyüke.

²⁸Hapayü jomei mükjüp vaihen: Ngeiyü jomei mükjüp; jomi mepa doumong mükjüpao ne-anghen; ngeiyü jomei mükjüp.

²⁹Jomi hahying moila, mang moila, pungpü moila hahhen, hatü daütükpü douthü peü jomei vaihen.

³⁰Betjük lemphü kübü shongpü betjükthü peü, hatü ammei moila kübü lemphü moila ngongpathülei vaihen; ammei shemei moihiman nyuhen shangmü shongei oukpü aan ngongpathü kü shuohtuh.

³¹Ngongpathüi nyingnyoi kü dipü ou nevaijü yemhimak, nevaijü shahhishuwi jüpü phai meheyao nehahhen.