Read Phom Naga EZEKIEL 45 Bible Online

EZEKIEL 45 - Phom Naga bible

EZEKIEL 45

¹Mechem ammi hapa kahdok mükjüp hanteihenshang, ammi SHEMBÜPA shing kahdok phaihan hanei hayaoha daüei shuohtuh. Hapayü yangkü kilometer anpünyi mü bhaoei, hatü ba kü kilometer an nyuhen. Hapa kahdok kempü daülangpü vaihen.

²Hapa kübü bahiyang meter 250 baong phopshem vehen shing tuhhen, hatü ba kü meter hapünga shinei shingkong banei tuhhen.

³Hapa daülangpü kahdok hükkeishing bhaoei yangkü kilometer anpünyi mü bhaoei, hatü ba kü kilometer nga shettuh; hapa shing kü phopshem, Longi Daülangpü Shing nyuhen.

⁴Hapayü kahmük kü daülangpü shing, phopshemei SHEMBÜPA chongphopü ngongpathülei phaihan vaihen; hapayü jomi shem vehen shing hatü phopshem shemshing vaihen.

⁵Hükkei shing aopü kahdokü phopshemei chongphopü Levi am nyuhen shing vaihen.

⁶Hapa daülangpü kahdok mü dheanei shao kahdok phaihan hük yangkü kilometer anpünyi mü bhaoei, hatü ba kü kilometer nyi mü bhaoei tuhpü kü Israel nanglakthü nyuhen.

⁷Ongpa shing kahdok phaihan hayaoha hanei tuhtuh. Daülangpü kahdok heshüphi viong kübü heihdaipü heshüphi Mediterranean Yungching thahshi nyuhen, hatü heongphi viong kübü Israel jatthü kü shuohpü kahdok heongphi viong thahshi nyuhen. Hanangkü hapalei kahmük yangü Israel jatthü kü shuohpü kahmük yang shük nyuhen.

⁸Hapa kahmük moidoiyü Israel kü vanglem lempü ongpalei kahdok phaihan vaihen; shejüang büpai nanglakthü kü neshüveihen; shejao aopü kahdok kemei Israel jatthülei kahdok vaihen.

⁹SHEMBÜPA Kahvangi hapakei enyüke: Oh Israel ongthü, hajük kü dohtuh! Nemei-i dükpü hatü shüveipü tuhtüktuh; mehe shahhing hatü jiü, ha düktuh. Ngelei nanglakthü hapa kahdok leipü changtükei heihpü kübü dohtuh shei SHEMBÜPA Kahvangi enyüke.

¹⁰Peüi jiüshi dok doktuh, hatü shettuh.

¹¹Hahying dokpü dok hatü yung dokpü dok hükkei dokhen vongbong. Ha nyiphen kü aihük mü dokhen dokü homer nyüke. Homer hük kü ephah an, hatü bath an nyüke.

¹²Hapakei dok doktuh: gerah kukhayü shekel hük; shekel pejemü mina hük.

¹³Ammi hapakei moila shuohtuh. Wheat ephah phaihan vok kü phaihan hük, barley ephah phaihan vok kü phaihan hük shuohtuh.

¹⁴Olive mainga bath phaihan an kübü phaihan hük moila shuohtuh. Bath ani homer hük vaihen; hapayü kor hük nyüke.

¹⁵Israel kahdok kü mi kho nyi khong ieyei kübü mi hük moila shuohtuh. Hapayü hahying moila, jakpü moila hatü mongjempü moila ammei mang tükhen shingvaishi shuohpü moila shei SHEMBÜPA Kahvangi enyüke.

¹⁶Israel kü nyupü ongpa mü kahmük kü nyupü nanglak peüi hapa moila chemi shuohhen.

¹⁷Shejao Israel jat kü jakpü moila, hahying moila, yiü moila, mohitap kü, Lenja Mo kü, Sabbath kü hatü lebü mothü kü ongpai hathü dükhen: Israel phangthülei mang tükhen shingvaishi ongpai mang moila, hahying moila, jakpü moila hatü mongjempü moila shuohhen.

¹⁸SHEMBÜPA Kahvangi hapakei enyüke: Shongpü len shongpü nyih kü ammi kawhikang neshiüpü mohoh baongha hük yah-ei hapa phopshem daütuh.

¹⁹Ngongpai hapa mang moila kübü iy hanei yah-ei phopshem shaden shemha kü, moidü vaungjung ali kü, hatü mongpa chingdung shaden shemha kü nyiohen.

²⁰Hapa keiha shennyak hanei-i pungpü nevaijü nethahnengoipü homei mang thahjema len nyetpabü kao dükhen; hapakei ammi phopshem daülangi tuh-aokhen.

²¹Shongpü len nyih anpüalipabü kü ammi hompü mo mohen, hatü nyih nyet daw neshihpü aan hahhen.

²²Hapa nyih ongpai büpa hatü nanglak peü shingvaishi mang moila shuohhen mohoh baongha hük shuohhen.

²³Mo thempü nyih nyet mong kü nyihjeih büpai SHEMBÜPA kü jakpü moila shuohhen; kawhikang neshiüpü mohoh baongha nyet, mi baongha nyet shuohhen, hatü nyihjeih mang moila shuohhen nangkü yum chebaong shuohhen.

²⁴Jakpü moila shuohpü mohoh baongha hatü mi baongha ieyei shing hahying moila dok anpünyet mü bhaoei, hatü olive mainga dok jem shuohhen.

²⁵Len nyetpabü nyih anpüngapabü kü hatü nyih nyet mo mong kü büpai aihük mü moilathü koei peiyei mang moila, jakpü moila, hahying moila hatü olive mainga shuohhen.