Read Phom Naga EZEKIEL 46 Bible Online

EZEKIEL 46 - Phom Naga bible

EZEKIEL 46

¹SHEMBÜPA Kahvangi hapakei enyüke: Heong philei meepü mongpa chingdung shadenü dou dükpü nyih vok mongkü küpshi tuhhen; shejao Sabbath nyih kü hatü Lenja Mo nyih kü ha apei tuhhen.

²Ongpai chingshe lemeipü hapa shemshom shaden lemei shühen, hatü büpai shaden shemha touei yaonghen. Ngongpai jakpü moila hatü mongjempü moila shuohhen, hatü büpai shakung tüngei aümei khümhen. Hapheikü büpa lüdaihen, shejao om dhüshi hapa peshaden neküphen.

³Sabbath hatü Lenja Mo ieyei kü nanglakthüi hapa shaden tüngei SHEMBÜPA kü khümhen.

⁴Sabbath nyih kü ongpai SHEMBÜPA kü jakpü moila shuohhenü kawhikang neshiüpü mi vok, hatü mi baongha hük;

⁵hatü mi baongha ieyei kü büpai hahying moila dok anpünyet mü bhaoei shuohhen, hatü mi baongha ieyei mü büpai mehe shuohhü, ha shuohhen. Hapa keipü hahying moila mü olive mainga dok jem shuohhen.

⁶Lenja Mo nyih kü büpai kawhikang neshiüpü mohoh baongha hük, mi cheha vok hatü mi baongha hük shuohhen;

⁷mohoh hatü mi baongha ieyei mü hahying moila dok anpünyet mü bhaoei, hatü mi cheha ieyei mü ongpai mehe shuohhü, ha shuohhen. Hahying moila ieyei mü olive mainga dok jem shuohhen.

⁸Mechem ongpa mongei shühen, büpai shemshom shaden lemei shühen, hatü hapa lem kü-üng daihen.

⁹Mechem mohitapthü kü kahmük kübü nanglakthüi SHEMBÜPA kü khümnüng peihenshang, khümpü tempheikü apsha lemei shüpüthüi pehe shaden lemei vamei daihen, pehe shaden lemei shüpüthüi apsha shaden lemei vamei daihen; jom shüpü lemeiüng vamei nedaihen, shejao jiüshangi she lemei vamei daihen.

¹⁰Mechem jom shühen ongpayao jom mü shühen, hatü jom mü büpayao vamei daihen.

¹¹Hahyingpü nyih hatü mohitapthü peü kü mohoh hatü mi baongha ieyei mü hahying moila dok anpünyet mü bhaoei, hatü mi ieyei mü mehe shuohhü, ha shuohhen. Hahying moila ieyei mü olive mainga dok jem shuohhen.

¹²Mechem ongpai SHEMBÜPA kü mongongpü moila, jakpü moila nevaijü mongjempü moila shuohhüei deihnya, mongpa chingdungei shüpü heong peshaden büpa kü aphen. Büpai hayü Sabbath kü dükpü keiha hapa moila shuohhen, hatü büpa vamdaipheikü peshaden küptükhen.

¹³Büpai nyihjeih dhom mü bong hük lompü kawhikang neshiüpü mi cheha moila shuohhen.

¹⁴Büpai düngei dhom mü hahying moila atta dok nyi mü hapa atta kü nyethen shingvaishi olive mainga dok hük shuohhen. SHEMBÜPA kü shuohpü hapa moilayü den kü dükhen.

¹⁵Mi cheha, atta hatü olive mainga moilayü den kü nepjeih shuohhen.

¹⁶SHEMBÜPA Kahvangi hapakei enyüke: Ongpai büpalei kahdok phaihan kübü büpalei hapeü kü hanei shuohüjema, hapayü hapa hapeülei mükjüp vaihen; hayü büpalei mükjüp kahdok vaidaihen.

¹⁷Shejao ongpai büpalei chongphobü hanei kü büpalei kahdok hanei shuohhüjema, hapayü nyokei leiteihen bong thahshi kü mon büpalei vaihen; hapheikü hayü ongpa kü nyokei leitükhen; chehai mon büpalei mükjüp vaishi tuhhen.

¹⁸Ongpai nanglakthülei mükjüp meheyao lenei neyahhen. Büpai hapeü kü shuohpü mükjüp kahdokü büpalei kahdok phaihan kübü vaihen vongbong; büpai ngelei nanglakthülei kahdok aetei yahtü neshüveihen.

¹⁹Hapheikü büpai ngei apshaphi leipü ngongpathülei daülangpü dung lemeipü shadenei müei dei, hatü ngei halei hathü heshüphi dohpü jungei shing hük eeteke.

²⁰Büpai ngei kü, “Hapayü ngongpathüi pungpü moila, hatü mang moila shuohhen shing hih; halei jomi chingshe leipü nanglakthü kü daülangpü doui jom kü nehonghen shingvaishi halei jomi hahying moila aan oukhen” shei e.

²¹Hapheikü büpai ngei chingshelei müei ngai, hatü chingkon vaungjung ali kü ngei peih-ei deishih, hatü halei chingkon nyuteke;

²²hapa chingkon vaungjung ali kü maanpü chingkon yangkü meter kukha hatü ba kü meter anpünga shiüteke; aliphen bahiyang hükkei shiüteke.

²³Hapa chingkon ieyei kü mong lemei yaongi bham shongtü nyu, hatü bham kü dhienei awdep lingei nyuteke.

²⁴Hahepak kü büpai ngei kü, “Hapayü nanglakthüi shuohpü moila phopshemei chongphopüthüi cheühen shing hih” shei ngei kü ephüteke.