Read Phom Naga EZEKIEL 47 Bible Online

EZEKIEL 47 - Phom Naga bible

EZEKIEL 47

¹Hahepak kü büpai ngei phopshem shadenei müei dei; hapa phopshem shaden touei yung vamei phopshem heongphi lemei sha (phopshemü heong lemei meeshi shiüteke), hatü moidü pehephi kübü yung vamei phopshem shatüng pehephi phang leipü yung yenei shateke.

²Hapheikü büpai ngei apshaphi peshaden lemei müei dei, hatü heong philei meepü chingshe peshaden haolei shinei müei ngai, hatü yungü pehe philei yenei shaei shiüteke.

³Vü hük lakei notü heong philei heih-ei hapa shennyaki meter 500 shet, hatü büpai ngei yung homei mü hatü hapa yungü lamük mü chüshi nyu.

⁴Shao büpai meter 500 shet hatü hapa lashüh mü chüshi shiüteke. Shao büpai meter 500 shet, hatü hapayü shüng thahshi chüshi shiüteke.

⁵Shao büpai meter 500 shet, hatü hapa yungü ngei nehomaokhen mü longdaitü nyu, hatü owei homhen mü; la mü nehom-aokhen mü shiüteke.

⁶Büpai ngei kü, “Shennyak ha, nüngi ha eela?” shei phe. Hapheikü büpai ngei yungkung sheetei müei lei.

⁷Ngei nyokei leishingkü ngei yungkung nyiphenei pü longi koh-ei ee.

⁸Büpai ngei kü, “Hapa yungü heong lemei yenei shaei Arabah yung kü dhaonyeih, hatü mechem nenmü nyupü Dipü Yungching kü ha shaei dhaohen, hapa yung daüei leikahen.

⁹Melemei ha yung yenhen, halei yemhamakha lemphü hatü nyah longi nyuhen, hatü hapa yung daülangi leihen hatü ha yung yenpü peü lemei lemphü yemmü nyukahen.

¹⁰Nanglakthüi En Gedi kübü En-eglaim thahshi nyah yepei yaonghen; hapayü shang shepshing vaihen, hatü haleipü nyah-ü Mediterranean Yungching leipü nyah kei nyahlem longi nyuhen.

¹¹Shejao haleipü nyaühut nedaüdaihen; hapayü hüm vamhen nangkü tuhphonghen.

¹²Hapa yungyen yungkung nyiphen kü hahying vaihen pülem longi vamhen. Hathülei lak nekaudaihen, betjük nejüki nenyuhen, shejao hathü shing yungü phopshem leipü yenpü nangkü len ieyei betjük meipü jükhen. Hathülei betjük hahying vaihen, hatü hapalei phenlak meli vaihen.”

¹³SHEMBÜPA Kahvangi hapakei enyüke: Israel phang anpünyi kü mükjüp shingvaishi kahdok hanshingkü viong hapakei nyuhen: Joseph-ü phaihan nyi danghen.

¹⁴Ammi ha hükkei hanhen; ngei hayü ambü ampa kü shuohhen shei lahpeih, hatü hapa kahdokü am shing mükjüp nyuhen.

¹⁵Kahdok viong hapakei nyuhen: Apshaphi keyü Mediterranean Yungching kübü Hethlon lemei heihdaipü Lebo-hamath, hatü nedoh-i Zedad,

¹⁶Berothah, Sibraim (Damaska viong hatü Hamath viong aa kü nyupü) kübü heihdaipü Hauran viong kü nyupü Hazer-Hattikon thahshi nyuhen.

¹⁷Hanangkü viongü Dipü Yungching kübü shadaipü Damaska viong kü apshaphi Hamath lemei Hamath viong vaitü Hazer-Enon thahshi nyuhen. Hapayü apshaphi kübü viong nyuhen.

¹⁸Heongphi kü Hauran hatü Damaska nyi aa kü; Gilead hi Israel kahdok nyi aa kü Jordan yungyen viong vaitü shapü heongphi kü Dipü Yungching kübü Tamar thahshi nyuhen.

¹⁹Pehephi kü Tamar kübü shadaipü Meribath-Kadesh yung thahshi, hatü haleipü Ijip viong kübü Mediterranean Yungching thahshi nyuhen. Hapayü pehephi kübü viong nyuhen.

²⁰Heshüphi kü Mediterranean Yungching kübü aongdaipü apshaphi Lebo-hamath shing thahshi nyuhen. Hapayü apshaphi kübü viong nyuhen.

²¹Hanangkü Israel jatthü aimü ammi hapa kahdok hanteihen.

²²Ammi hapayü am shing hatü am mü nyupü benhathü shing hatü ammei hühihathü shing hanteihen. Jomphongao Israel am bühü kü kei nohen, hatü Israel jatthü mü jom kao mükjüp kahdok hanhen.

²³Mepa jatthülei benhathü nyunya, halei ammi jom kao mükjüp kahdok hantuh shei SHEMBÜPA Kahvangi enyüke.