Read Phom Naga EZEKIEL 7 Bible Online

EZEKIEL 7 - Phom Naga bible

EZEKIEL 7

¹SHEMBÜPAlei shah ngei touei peiteke:

²“Oh shennyak ha, Israel kahdok nangkü Jeiyong SHEMBÜPAi hapakei enyüke: Dohpü hük kahdok vaungjung aliphen kü peiteke.

³Am kü dohpü peiteke, hatü am khüei ngelei mongshih laihen; Ammi dükpü aimü ngei am shahphenhen hatü ammei jiühitnalai dükhiling kü ngei shemhen.

⁴Ngei am kü yahyangei nevaijü shinshangei neveipih. Hingmei ngei ammei dükhiling hatü ammei jiühitnalai douthü am mü nyupü thahshi ngei ha kü shemhen. Shejüang ngeiyü SHEMBÜPA shei ammi nyinghen.”

⁵Jeiyong SHEMBÜPAi hapakei enyüke; Vongshüh hük pheikü hük am touei peikünyüke:

⁶Dohpü peiteke, dohpü peiteke. Veituh, hapayü nüng khüei yaongteke. Hapa peiteke.

⁷Am lomohhen peiteke, am hapa kahdokei nyupüthü. Hepak ngoiteke, nyih yopailei nyüke; kahshangthü kü mongong nevai, shanghah nyüke.

⁸Ngei mongshihpü lomi am kü khüpphahen, ngei mongshihpü am khüei shomhen. Ammi dükpü aimü ngei ammei shahphenhen hatü ammei jiühitnalai dükhiling kü ngei shemhen.

⁹Ngei am kü yahyangei nevaijü shinshangei neveipih; ngei ammei dükhiling hatü ammei jiühitnalai douthü am mü nyupü thahshi ngei ha shemhen. Shejüang am kü bheipeyü SHEMBÜPA, ngei khih shei ammi nyinghen.

¹⁰Veituh, hapa nyih peiteke! Lomoh-aühaühen ngaiheyei vamteke. Üpteilenteipü madaiteke, changmeileüpüpü vangsho kü shongdaiteke.

¹¹Üpteilenteipai ten nyeinya bühnyüke. Shennyak, jomei mophimo, jomei dhemeilaüma nevaijü jomei müknyinshekhang meheyao aoei netuhphonghen.

¹²Hepak ngoiteke, nyih yopailei nyüke; shakhahpü amao mongteong nevaijü yupü amao mongtemei; mehenangkü Kahvangei hanghi shennyak peü kü peikahen.

¹³Bhei yupü am üpaiyao laophüi yupü kü nanglei danghen mü den luei nenyuhen; mehenangkü Kahvangei mongshih-ü peü shingvaishi nyüke. Jomei mang homei jom yangei nenyuaokpih.

¹⁴Jomphongi amit vüngtü lemphü temlangmao, üpaiyao vehokei nedaihen; mehenangkü ngelei mongshih peü kü nyuhen.

¹⁵Chingyangshongei depülaopü, shemongei cham hatü shaühile-i maei nyüke. Kahlei phaülei nyupüthüi yani mahhen, chingnyülei nyupüthü cham hatü shaühile-i dikemhen.

¹⁶Ha kübü yangei daipüthü laophülei mang nangkü kahji leipü athuba keiha kahshangei mahng thepei nyuhen.

¹⁷Lak kemei shaokdaihen, lashüh peü yung keiha indaihen.

¹⁸Jom peü dhoila ashak ümhen, nyempai jümtü nyuhen. Jomei dhe veüpai jümtü hatü jomei sho chaei kuptüktü nyuhen.

¹⁹Jomi jomei ngin chingyangshongei yaktükhen hatü jomei honü nyüphinya kei tuhphonghen. SHEMBÜPA mongshihpü nyih jomei hon hi ngini jom neyangaokhen. Hapai shei jom aeipülepü shümoh nemeihen; mehenangkü mang kü huluh shuohhen mü hapai leihüpeih.

²⁰Jomü jomei chühiyük meipü kü changmeihampeih, hatü hapai jomei jiühitnalaipü lajeithü linghampeih. Hanangkü ngei hathüyü jom shingvaishi nedaünelangpü dou leihühen.

²¹Ngei hathü kemei kung am kü hatü nebahnevaipüthü kü shuohtükhen, hatü jomi ha sheihtükhen.

²²Ngei jomphi leipü ngelei dhe lepdaihen, hatü jomi ngelei mop jaoshing phopshem sheihtükhen; gühpathü ha mongei shüei hapa sheihtükhen.

²³Nyiamvü hük lingtuh! Kahdok kü iy-aongmashateipai maei nyüke; chingnyü-ü üpteilenteipai maei nyüke.

²⁴Ngei jomei shemei angpü mophimothü yah-ei deitükhen shingvaishi peü mü nemeipü jatthü müei peihen. Ngei wong kohpü am changmeipü dohtükhen, hatü jomei daülangpü shingthü sheihtükhen.

²⁵Mechem nyempü hanpü peihen, jomi chingmeivangmei yemhen, shejao ha nedanghen.

²⁶Shanghah pheikü shanghah peihen, shahjang ten pheikü shahjang ten danhen. Jomi thibü leipü manghkhang naei yemhen, ngongpa leipü shahkung nyuhpüvenpü mahdaihen, hatü behethü leipü shahnying venpü nedanghen.

²⁷Ongpai mahng thephen, onglanyüi mongshangi maei nyuhen, hatü hapa kahdok kü nyupü shennyakthülei lak nyempai nenhen. Jomei dükhiling aimü ngei jom kü dükhen, hatü jomei laphen aimü ngei jomei shahphenhen. Shejüang jomi ngeiyü, SHEMBÜPA khih shei nyinghen.