Read Phom Naga DANIEL 11 Bible Online

DANIEL 11 - Phom Naga bible

DANIEL 11

¹Media am Darius-i vanglem lempü shongpü bong kü-üng ngei büpa kü sheühhen, hatü wong kohhühen yaongpeih.

²Shaang, ngei nüng kü shahhing ephüshah: Persia kü ong jem nyeinya vamkahen, hatü alipabü ongpayü jom peü mü shemmei nyukahen. Mechem büpai mop homei wong koh-ei leihenshang, büpai Greek ongching khüei yaonghen.

³Hahepak kü hampa ong hük vamkahen; büpai longi wong kohshi vanglem lemhen hatü büpai mongpükei dükhen.

⁴Hatü mechem büpai vanglem lempü wongkoh hepak nyuhen, büpalei ongching mangdaihen, hatü shing ali antü handaihen. Büpalei iy kübü nephaakpü hüki vanglem lemhen, shejao büpai kei wong kohshi vanglem nelemhen; mehenangkü büpalei ongchingü bhitükhen hatü mih kü shuohtükhen.

⁵Hahepak kü pehephi kübü Ijip ongpa wong kohshi vamhen, shejao büpalei veshan mübü hük büpa mao wong kohpüba leihen, hatü büpai wong longi kohshi vanglem lemhen.

⁶Bong shohük pheikü jom mongjem ponghen. Pehe ongching kübü Ijip ongpai laophülei yiükha apsha ongching kübü Syria ongpa kü doi deishihhen, shejao mongjem pongpü neshenhen. Pinnyü hatü chepaha, chehathü hatü pinnyü mü deishihpü aathü peü jütükhen.

⁷Meshük ne-angi pinnyülei shem am hüki ong vaihen. Büpai Syria ongpalei veshanthü khüei hokhen; jomei penyüsha benei shühen, hatü hok neühen.

⁸Büpai jomei kahvangthü, lajeithü hatü honi ngini lingpü douvang yungshongthü Ijiplei koei leidaihen. Bong shohük büpai apsha ongching, Syria ongpa mü nehokhen.

⁹Hahepak kü Syria ongpai Ijip ongpa mü hokhen, shejao büpa laophülei kahdokei nyokei leidaihen.

¹⁰Büpalei chehai hokhen temhen hatü veshan longi daihen hatü yungnyü bünghiyangi keiha peü maoei shanhen hatü vepathülei penyü shaden thahshi hahhen.

¹¹Mongshih anei pehe ongching kübü Ijip ongpai Syria am mü hokhen daihen hatü veshan longi yephen, shejao büpayü mih-i neühahhen.

¹²Mechem veshanthü yepei daihenshang, büpa changmeihen, hatü haja haja jütükhen, shejao büpa aokpü dangpeih shei nenyuhen.

¹³Mehenangkü Syria ongpai shongpü mü nyeishi veshanthü thaihen, hatü vangbong shohük pheikü büpai veshanthü longi lahhilaong changshi temtü hokhen daihen.

¹⁴Hapa nyihthü kü longshi shingi Ijip ongpa khüei yaonghen. Manghkhang kü eepü hapa jiühühen shingvaishi nüngei nanglak khong kübü shahkung nenyingpüthü hanei khüei yaonghen, shejao aokpü nedanghen.

¹⁵Hahepak kü Syria ongpa peiyei pe-i shonlangpü chingnyü shümhen hatü hahtükhen. Ijip veshanthü khangei neyaonghen; meiden dohpü veshanthüiyao wong kemdaipü nangkü jom khüei neyaongaokhen.

¹⁶Shejao Syria am khüei peijapüthü kü jomi mongpükei dükhen, hatü üpaiyao jom khüei neyaongaokhen. Büpai nethe meipü kahdok kü chonglingei nyuhen hatü hapa büpalei lakmong kü nyuhen.

¹⁷Hahepak kü büpalei ongching wong kempai mekei vehok neühen shei küpjan tempai Ijip mü büpai chingmei linghen. Hapa ongching mahtükhen shingvaishi büpai laophülei yiükha doi deishihhen, shejao hapai shei büpa kü nanglei neshiühen hatü aokpü nedanghen.

¹⁸Hapheikü yungnah phi kübü jatthü lemei dhe lepei leihen hatü hathü ching longi hahhen. Shejao veshan mübü hüki büpa nebahnevaipü dohtükhühen; hih, büpa nebahnevaipü büpa kü büpai nyokei shuohhen.

¹⁹Ongpai laophülei kahmükei yangshing yemei leihen, shejao mih-i büpa neühen hatü hapai büpa dohpütenpü vaihen.

²⁰Hahepak kü büpalei shing kü jeiyei lebü ong hük vamhen, büpai laophülei ongching mopi müknyinshekhanghühen lakchongbüthü shomei shathai longi thaihen. Shejao bong shohük mong aa kü mongshihteipü nevaijü vehok kü nevai-i büpa jütükhen.

²¹Büpalei uoshing kü jeiyei nemeipü, ong vaihen nejiüpü shennyak hük vamkahen hatü büpa ngangahük kü peikahen hatü kon nemeipü lingei ong uoshing aetlanghen.

²²Veshanthü hatü vangpüshuwpü ongpa dangkao chemjalak kü maotükhen hatü thittükhen.

²³Mih mü mongjem pongei lebü jatthü lueilemei, hatü büpa jat maanpü kü vanglem lemlangmao büpa wong kohpüba leihen.

²⁴Shahvüng neshuohpü kü büpai peü mü shemmei ongching hahtükhen, hatü büpalei bühipa üpaiyao nedükpü dou dükhen. Büpai büpa phei müpüthü kü vehok kü aetpüshepü, gühpükaaipü mophimothü hanhen. Büpai chingnyü penyüshathü benhen küpjan linghen, shejao lomi büpalei hepak kemdaihen.

²⁵Ijip ongpa mü hokhen büpai monglongshi veshanthü temhen, hatü Ijip ongpai wong kohpü veshanthü longi mü vehok hokhen. Shejao Ijip ongpai mih-ei kon nenyingpü nangkü aokpü nedanghen.

²⁶Büpa mü nükdep hük kü hahpü mongkhenthüi büpa luhahhen. Büpalei veshanthü longi jühen hatü maotükhen.

²⁷Hahepak kü ongpa nyi nükdü hük kü hahhen chemi uohen, shejao jomi hüki hük khüei ten temhen, shejao jomi napeyü aokpü nedanghen; mehenangkü ha shing ittükpü hepak shao-üng mangngoi.

²⁸Syria ongpai mop longi koei laophülei kahdokei leihen, shejao büpalei mongkü Kahvangei daülangpü vangpüshuwpü mangtükhen temhen. Büpai mongpükei dükhen hatü laophülei kahdokei leihen.

²⁹Pheishi shao büpai Ijip hahhen, shejao hahepak keyü sheleipü kei nevai-i nyuhen.

³⁰Mehenangkü büpa khüei Kittim leipü jahasthü peihen, hatü büpa nyemei mongmah-ei nyokei leidaihen. Büpa mongshih-ei nyokei leiyei Kahvangei daülangpü vangpüshuwpü khüei dou dükhen. Büpa nyokei leiyei Kahvangei vangpüshuwpü yaktükpüthülei shah yahhen.

³¹Büpai shompü veshanthüi Phopshem nyettükhen. Jomi nyihjeih moila shuohpü dohtükhen hatü benpülangpü peihüpü jiühitnalai halei tuhhen.

³²Büpai yawh-eiyangei vangpüshuwpü nebangpüthü leipü sheühpü yahhen, shejao Kahvang kü wong kohshi vaipüthüi büpa mü hokhen.

³³Kon kohpü mübüthüi mih longi mü jomei kihikon hanteihen, shejao kanja shingvaishi jomphong hanei vehok kü mahhen, nevaijü aw kü jakei jühen, aetpüshepü ponghen nevaijü khoklat kü küphen.

³⁴Mechem jomphong lomoh ponghenshang, sheühpü maani danghen, hatü mong kempai nevaijao jom mü omhen.

³⁵Jomphong daühühen hatü kawhikang neshiüi henghen shingvaishi kon kohpüthü hanei huluh shuohhen. Dohpü hepak, Kahvangi itpü hepak mangngoi thahshi ha nedoh-i nyukahen.

³⁶Syria ongpai büpa mongpükei dükhen. Kahvangthü peü mü büpa-üng longpüba shei changmeihen, hatü Jeiyong Kahvang khüei nyembenüng shah longi ehen. Kahvang mongshihpü hepak mangngoi thahshi büpai aokpü dangei ha dükaokhen; mehenangkü mehe temtük, hapayü dükshasha.

³⁷Büpai chebü chepai khümpü kahvangthü ne-ienelemhen, nevaijü nyühathüi kenpü kahvang kü dhüm neshuohhen, hatü mepa kahvang kao dhüm neshuohhen; mehenangkü büpayü peü mü longpeih shei deihhen.

³⁸Ha nang jeiyei büpai penyüsha yompü kahvang kü dhüm shuohhen; chebü chepai nenyingpü kahvang kü hon hi ngin, douvang yaongthü hatü thinthothü noshi khümhen.

³⁹Kung amei kahvang leipü sheühpü yah-ei büpai wong kohpü penyüshathü bentükhen. Üami büpa mü nyingteiyei leinya, büpai jomphong kü mop hatü dhüm longi shuohhen, hatü uoshing shaopü kü nanglak longi shak kü vanglem lemhen, hatü jom kü kahdok yahshuohhen.

⁴⁰Dohpü hepak kü Ijip ongpai büpa mü hokhen, shejao Syria ongpai büpa mü khüei alüngleple kei vehok koyeithü, koyei veshanthü hatü jahasthü müei peiyei hokhen. Büpai kahmükthü longi hahtükhen hatü bünghiyangi kei maotükhen.

⁴¹Büpai nethe meipü kahdokao hahhen, hatü haja haja büpalei lak kü dihen shejao Edom, Moab hatü Ammon kahmük phaihan longshi shing büpalei lak kübü yanghen.

⁴²Mechem büpai kahmükthü hahhenshang Ijip dangkao neyangaokhen.

⁴³Ijip amei hon hi ngin hatü mopnyümopha peü büpalei lakmongei shümlanghen; büpai Libya hatü Ethiopia nyiphen hahtükhen.

⁴⁴Hahepak kü heong hatü apsha phi leipü peipü shahjangi büpalei mong hanhühen hatü büpa mongshih-ei layaongei daiyei beneilangei shennyakthü longi jütükhen.

⁴⁵Büpai yungching hatü nethe meipü kahshang nyi aa kü longhiongei ashakshem longpü vehen. Shejao üpaiyao büpa kü sheühhen neshiüi büpa hammü dihen.