Read Phom Naga DANIEL 8 Bible Online

DANIEL 8 - Phom Naga bible

DANIEL 8

¹Belshazzar ong vaipü bong jempabü kü, shongpü manghkhang pheikü shao ngei nyipabü manghkhang hük eeteke.

²Manghkhang kü ngeiyü Elam ongching kü Susa chingnyülei nyunyeih shei manghteke; ngei Ulai yungyenei hih shei yaongshi manghküteke.

³Ngei ngangei veishuohshingkü ngei shekü yungyen touei mi chebaongha hük vaung luangi nyi kohtü yaongshi ee. Vaung hükü lushi shiüteke shejao hükpayao pheishi lupüba aongteke.

⁴Mi chebaonghai heshü, apsha hatü pehe phikü vaungi hokpü ngei eeteke. Mepa yemhimakiyao büpa khüei neyaongaok, hatü büpalei lakmong kübü üpayao neyangaok; büpai mongpükei büpai dük hatü longpü leiteke.

⁵Ngei veishi nyushingkü heshüphi leipü yum chebaong hük vamei kahdok kü la-i nehongi kahdoknyü bahiyang peü homei mokei peiküpü eeteke. Hapa yum kü mük hi mük aa kü vaung longpü hük shiüteke.

⁶Yungyen philei ngei yaongshi eepü vaung nyi kohpü mi chebaongha touei pei, hatü wongmü hokteke.

⁷Hapai mi chebaongha kü hokpü ngei ee. Hapa longi mongshih anei mi chebaongha kü hok, hatü vaung nyiphen bhagtük. Mi chebaonghai hapa mü khüei hokhen wong neshiüi lei; yum chebaongi mi chebaongha kü kahdokei doei shantü la-i shoup, hatü üpaiyao büpa neyangaok.

⁸Hapa yum chebaong longi wong koh-ei long; shejao büpa wong kohpü den ngoipü hepak kü büpalei vaung bhagdai. Ha shingkü longpü vaung ali vangsho jung ali kü meeshi neenei vamteke.

⁹Hathü khongkü hük kübü vaung maanpü hük vamei büpalei wong hi ngan pehe hatü heong hatü lahtükpü kahdok thahshi daei dai.

¹⁰Hapa vangsho phongshanthü kei wong kohshi longteke hatü büpai vangsho lithathü hanei kahdokei vüshih, hatü hathü kü la-i shoup.

¹¹Vangsho phongshan hük hapa mübü longpü leiteke, hatü nyihjeih büpa kü jakpü moila shuohpeyao yahlang, hatü Phopshem dangkao nyettük.

¹²Mang dükpü nangkü phongshanthü hatü jomei nyihjeih moila shuohpeyao omshi hapa kü lanei shuohtük. Hapa vaungi dükpü lemphüli kü dapüshepü nyu.

¹³Hahepak kü Daülangpü Hüki epü ngei danteke, hatü lebü Daülangpü Hüki shelei epü hük kü eteke, “Manghkhang kü nyihjeih moila shuohpü yahlangpü, mangi chingyan kahpaan koei peipü, Phopshem lanei shuohtükpü hatü phongshanthü la-i shoupei eepü meshük lushi nyukahenang?”

¹⁴Büpai büpa kü, “Hapayü nyih 1, 150 nyukahen hatü hahepak kü dhom hatü om kü moila neshuohhen; hapheikü mon Phopshem kü jiüshangpü phoppü tupü nyuhen” shei jangei e.

¹⁵Mechem ngei, Danieli manghkhang eepa, hapa lappü nyinghen kheteke. Hahepak kü hanei am veiheni shennyak keiha vamei ngei touei yaongküteke.

¹⁶Hahepak kü Ulai yungyen homei hangkulei ngeü hüki, “Gabriel, hapa shennyak kü büpai eepü manghkhang nyinghen nih-ei eyeishuoh” shei nyüktü epü ngei dan.

¹⁷Hahepak kü Gabriel, ngei touei peiyei yaongküteke, hatü ngei nyempai kahdokei doei sha. Shejao büpai ngei kü, “Oh dipü mahpü hangkuli, hapa lappü nyingtuh. Hapa manghkhangü kahdoknyü dohpütenpü jung epü khih” shei e.

¹⁸Büpai ngei kü shah eshingkü ngei kahdok kü dhe shüshi shomei doteke; hahepak kü büpai ngei kü düktü phukei yaonghütü,

¹⁹ephüteke, “Kahvang mongshihpü nyihhihe kü pheilei mehe vamkahen ngei nüng kü ephüshah; mehenangkü hapa manghkhangü ittükpü dohpütenpü hepak nang epü nyüke.

²⁰Nüngi mi chebaongha hük vaung nyi kohtü eepeyü Media hatü Persia ongthü nang nyüke.

²¹Yum chebaong lappü Greek ongching khih, hatü hapalei mük hi mük aa kü vampü vaungü shongpü ong lappü nyüke.

²²Shongpü vaung bhagtükpü shingkü vaung ali vampü lappeyü, hapa jat kübü ongching ali hanteitü vamkahen, hatü hathü-ü shongpü ongching kei wong kohshi nechongkahen.

²³Jom vanglem lempü dohpü phikü mechem jomei mangi üng lümhenshang, monglongpü, mong vaanpü, lupülempü ongpa hük vamkahen.

²⁴Büpa longi wong kohshi leihen, büpai nyemshi bentüklangtükhen, hatü büpai dükpü lemphü kü aokpü danghen. Büpai wong kohpü shennyakthü, hatü Kahvangei nanglakthü mahtükhen.

²⁵Büpalei kon nemeipai lueilemei shemmei leihen, büpai ngeiyü peü mü longpü shei changmeihen. Büpai shahvüng neshuoh-i shennyak longi jühen, büpai ongthü khongkü ongpa kü dangkao khüei yaonghen; shejao büpayü hangkulei laki nehongpü kü mahdaihen.

²⁶Dhom hatü omthü nang manghkhang nih-ei epeyü jiükahen. Shejao nüngi hapayü mongei jaoei tuhtuh; mehenangkü ha jiükahen shao hepak luangi nyüpeih.”

²⁷Hanangkü ngei, Daniel mongshangpai nyih kansho hük tüngei nyu, hatü hapheikü layaongei ongpai ngei kü yahphopü dousho kü dükei dai, shejao hapa manghkhangi ngei üathamahüteke hatü ngei ha nenyingaok.