Read Phom Naga HOSEA 10 Bible Online

HOSEA 10 - Phom Naga bible

HOSEA 10

¹Israel amü banei daipü nyalingngupai kei nyüke. Meshükpa betjük jüknya, hajükpa moidü lingnyüke; Meshükpa angeideiyei leinya, hajükpa jom khümhen yaong shemnyü lingnyüke.

²Jomei mongdangü shahshem; jomei mang jomi-üng kohen. SHEMBÜPAi jomei moidü bentükhen, hatü yaong shemnyüthü mangtükhen.

³Hahepak kü jomi, “Hami SHEMBÜPA nenyempü nangkü ham ong neshiü, hatü ong nyulangmao büpai ham kü mehe mei dükphaaokhen?” shei ehen.

⁴Jomi yahlak neshiüpü shah enyüke, hatü shahshemi vangnyüke, hatü lahnyüke. Han hoktükpü kah kü leü nemeipü thüng vampükei, shahshemi shahhing jümlangteke.

⁵Samarialei nyupüthüi Beth-Aven leipü mohoh lajei hahtükpü nangkü nyemhen. Haleipü nanglakthü hatü lajei chongphopü ngongpathüi haleipü müknyinshekhang yandaipü eeyei mahng thephen.

⁶Hapa lajeiyü Assyria ong kü bom vaishi yah-ei lüdaihen. Ephraim am hai danghen; Israel ami lajei nangkü veüponghen.

⁷Samaria amei ongü yung shangkü püphuo bhongpükei bhonglanghen.

⁸Aven leipü khümshemthü bentükhen hayü Israel amei mang nyüke. Hühhihang longei jomei moidü lümlanghen. Ha nyih jomi kahshangthü kü, “Ham linlangtuh!” shei ehen, hatü shangtaothü kü, “Ham kü vüei shükshih!” shei ehen.

⁹Oh Israel, am Gibeahlei nyushi mebü ami mang thahpeih, Gibeahlei mang dükpüthü vehok kü nemah-angpü je?

¹⁰Ngei nemeipüthü kü shüveinüng peikahen, hatü jomi mang longi dükpü nangkü jom hanghihühen jatthü thaikahen.

¹¹Israel amü hah tenhen nyuhtükpü mohoh cheha kei nyuteke; hatü ngei nethe meipü üng kü püdü nechanshuoh; Shejao ngei püdü chanhütü, Ephraim ami hanshong shühen; Judah ami han hokhen, hatü Jakobi kahdok shohen.

¹²Am shing daülangshemshepü haituh, bampü betjük vettuh; ammi kahdok ja shotuh; Mehenangkü büpa peiyei am kü daülangpü vang keiphahen shingvaishi SHEMBÜPA yemhen hepak nyüke.

¹³Ammi mang shei, hatü mang-üng vetteke; ammi shahshem betjük hahteke. Ammi ammei wong kü monglempü, hatü ammei veshanthü kü hinglempü nangkü,

¹⁴Ammei nanglakthü khüei vehok vamkahen, hatü ammei penyüsha bentükhen. Hapayü Shalman ongpai Beth-Arbel vehok kü nyü, hatü hapeüthü ngümei jüpükei nyukahen.

¹⁵Oh Bethel, ha meimei am kü hetkahen; Mehenangkü ammei mang ahshi longshi khih. Mechem hapa nyih ngoihen, Israel ong chemjalak kü mahtükhen.