Read Phom Naga HOSEA 14 Bible Online

HOSEA 14 - Phom Naga bible

HOSEA 14

¹Oh Israel, SHEMBÜPA, ammei Kahvang touei mong leptuh. Ammei mangi am dopeih!

²Hapa phoppü yah-ei SHEMBÜPA touei mong leptuh, hatü büpa kü eyeishuoh: “Hamei mang peü tükshih, hatü phahjipai ham yahtuh. Hamei jubenyeijaangi nüng kü jakpü moila shuohhen.

³Assyria ami ham neyangaok; ham hajük kü vehok koyei kü ne-uohen; Hamei laki lingpü lajei kü, ‘Hamei kahvang’ shei hajük kü nenyükpih. Nüng kü hashihhathüi phahji dangnyüke.”

⁴SHEMBÜPAi enyüke: “Ngei nanglakthü lembienei lüdaipü müei leihen; Ngei jom kü changshi bamhen; mehenangkü ngei jom kü mongshihpü meidaiteke.

⁵Ngei Israel am kü nyien kei nyuhen; büpa yangkheihchü kei punghen, Lebanon leipü cedar pü keiha büpa tünglang yiühen.

⁶Büpalei nyem ja vamhen; Büpa nethe meipeyü olive pü kei hatü büpa vong meipeyü Lebanon leipü cedar pü kei nyuhen.

⁷Büpalei püdhüm kü shao shennyakthü nyuhen, büpa sheili pemong kei nyuhen, hatü nyalingngupai kei punghen, jom vong meipeyü Lebanon yiü kei nyuhen.

⁸Oh Ephraim, lajeithü mü ngei mehe linghen? Am kü jangpü hatü jungpeyü ngei hih. Düngei phenlak thüngshingi nyupü awkaongpü leshi ngeiyü nyüpeih; Am hinglempü ngei kübü vamnyüpeih.

⁹Üami nahnya, jomi ha yaonyüke, üami yepaoknya, büpai hapa nyingaoknyüke. SHEMBÜPAlei lemthüyü daülangi nyüke; Daülangpüthü ha kü kamnyeih, shejao mangthü ha kü huluh shuohnyeih.”