Read Phom Naga HOSEA 2 Bible Online

HOSEA 2 - Phom Naga bible

HOSEA 2

¹Hanangkü jempü Israel am kü “Kahvangei nanglakthü” hatü “SHEMBÜPAi bampüthü” shei nyüktuh.

²Ngelei hapeüthü, anyü kü lohtuh; mehenangkü pinnyü ngelei nyüha nevai, hatü ngei pinnyülei baha nevai. Pinnyü kü mükbongjuyung dhe kohpü kübü, hatü büm yupü kübü dohhen loh-eishuoh.

³Hei nevaijema ngei pinnyü moi paipü nyih kü kei bümbai tuhphonghen, hatü ngei pinnyü-ü bhih kahdok, hatü shingkong kei leitükhen, hatü pinnyü yunglepai dihühen.

⁴Ngei pinnyülei hapeüthü kü bampü nehuhen; mehenangkü jomphongü mükbongjuyung hapeüthünyüke.

⁵Mehenangkü pinnyüi mükbongjuyung dükteke; pinnyüi neveü gühshe shatü jom büh-ei paümteke. Pinnyüi, “Ngei kü nük, yung, phümphah ashak hatü nyemin ashak, olive mainga, hatü yiü shuohpü maithü touei daihen” shei eteke.

⁶Hanangkü ngei pinnyülei lem hühhihangi bangtükhen; hatü pinnyüi lem nedanghen mü pinnyü shonei pe showtükhen.

⁷Pinnyüi maithü changei daihen, shejao phei nethahhen, hatü jomphong yemhen shejao nedanghen. Hahepak kü pinnyüi ehen, “Ngei ngelei shongpü baha touei nyokei leishah; mehenangkü shaangpü laphen meyü sheleipü-üng meipü khih.”

⁸Üpai pinnyü kü hahying, yiü, hatü mainga shuohpa, hatü Baal kahvang khümshing kü noteipü hon hatü ngin shuohpa hapayü ngei khihshei pinnyüi nenying.

⁹Hanangkü mechem hah menkahen, ngei hapa hah hatü yiünaü yahlanghen, hatü ngei ngelei phümphah ashak, hatü nyemin ashak büm leipü nyiuklanghen.

¹⁰Shaang ngei, pinnyülei maithü tou kü pinnyülei ashak nyiuklanghen, hatü üpaiyao ngelei lak kübü pinnyü neyangaokhen.

¹¹Ngei pinnyülei mohitapthü, bong jiam mo, lenja mo, pinnyülei nyeümo, hatü monyü moha peü dohtükhen.

¹²“Ngelei maithüi yahphopeih shei pinnyüi epü nyalingngupai kah, hatü adhapüthü peü ngei mahtükhen, hatü ha phaükong leitükhen, hatü phaüyemthüi hahtükhen.

¹³Baal kü vong büpü ayingshü jakei mopü nyihthü shingvaishi, hatü ngei petüktü hon-ow owtü chühimai changei daipü nangkü ngei pinnyü kü hanghi shuohhen” shei SHEMBÜPAi enyüke.

¹⁴Hanangkü shaang ngei pinnyü yawh-ei yingmongei yah-ei daihen, hatü pinnyü kü bampai shah ehen.

¹⁵Halei ngei pinnyü kü pinnyülei nyalingngupai yahshuohhen, hatü Akhor kahjiyü monglempü kahji leihühen. Halei pinnyüi nela hepak kü keiha, hatü pinnyü Ijip leipü vamei daipü nyih kü kei ngei kü ephahen.

¹⁶Ha nyih, nüngi ngei kü, “Ngelei baha” shei nyükhen, hatü hajük kü nüngi ngei kü, “Ngelei Baal” shei nenyükhen shei SHEMBÜPAi enyüke.

¹⁷Ngei pinnyülei ju kübü Baal menthü yaktükhen, hatü jomi hapa men ne-yei nenoteihen.

¹⁸Hapa nyih kü ngei am shingvaishi phaüyemthü mü, shangouthü mü kahshak kahmongei nyupü yemhimakthü mü ngei vangeishuwhen. Am yangyangphangei hüshemei nyuhen shingvaishi ngei kahdok kübü vehok phunglang hatü vehok mahtükhen.

¹⁹Nüngü denshing ngelei nyüha vaiyei yahhen; ngei nüng daülangpü kü, shahhing kü, hatü shinshangpü kü ngelei nyüha vailanghen.

²⁰Ngei nüng monglempü kü ngelei nyüha vailanghen, hatü nüngi ngeiyü SHEMBÜPA shei nyinghen.

²¹Hapa nyih ngei janghen shei SHEMBÜPAi enyüke, ngei vangshothü kü janghen, hatü jomi kahdoknyü kü janghen;

²²hatü kahdoki sheilithü, yiünaü, hatü olive mainga kü janghen, hatü jomi Jezreel kü janghen.

²³Ngei ngelei nanglakthü kahdok kü shingnüngei tuhhen, hatü dahüshehühen; hatü ngei, “Nebamnyih” shei eshuohpüthü küngei bampü huhen. Ngei, “Ngelei nanglak nevai” shei eshuohpüthü kü, “Amphong ngelei nanglakthü” shei nyükhen; hatü jomi, “Nüngü hamei Kahvang” shei ehen.