Read Phom Naga HOSEA 8 Bible Online

HOSEA 8 - Phom Naga bible

HOSEA 8

¹SHEMBÜPAi enyüke, “Amit vüngtuh! Alang kei vepathü SHEMBÜPAlei phopshemei laongkünyüke; Mehenangkü ngelei nanglakthüi vangteipü mangtük, hatü ngelei shahkung khüei yaongteke.”

²“Oh hamei Kahvang, hami nüng nyingnyüpeih” shei Israel ami elangmao,

³jomi mehe mei, ha yaktük; hanangkü vepathüi jom kü changhen.

⁴Jomi ngei kü nephe-i ong lingteke; jomi ngei nenyingi long jeteke. Jom nyingi mahhen jomei hon, hatü ngini lajeithü lingteke.

⁵Oh Samaria am, ammei mohoh lajei yaktüktuh! Hathü khüei ngei mongshihnyeih. Jom mang neshiüi nyuhen mechemang vamkahenang?

⁶Hathüyü Israel leipü nyüke! Lajei lingbüi lingteke; hayü Kahvang nevai. Samaria amei mohoh lajeiyü khih mü nihtükhen.

⁷Jomi vanglüki keiha ten hainyüke, hatü jomi alüngleple kei ten vetnyüke. Kohpü hah kü betjük nejükhen, hapai hahying nevamhen; Hapa kü jük jüklangmao kung ami lühtükhen.

⁸Shaang Israel amü lebü jatthü kei leidaiteke, hatü dükten kei nyüke.

⁹Mehenangkü jomü phaüei gadu monha longteipükei Assyrialei aongei nyüke, Ephraimü laophü nyingi maithü kü yutükteke.

¹⁰Jomi laophü nyingi jatthü kü yutüklangmao, shaang ngei jom thailanghen. Mechem Assyria ongpai jom kü shüveihen, lomi jom tüngpai hangha yüpteihen.

¹¹Ephraim ami mang moila jakhen moidü longi lingjao, hathüyü mang thahshing moidü leidaihen.

¹²Ngei jom shing ngelei shahkung longi nyangei nyuhshuohjao, jomi hayü douthüng kei yakphongnyüke.

¹³Jomi jakpü moila meipü shuohjao, hatü jomi phai hahjao, SHEMBÜPAi hathü neyahnyu. Shaang büpai jomei mang deihhen, hatü hapa mang shing jom hanghihühen; Jom Ijiplei nyokei shomtükhen.

¹⁴Israel ami jom Lingbü betüktü ongshemthü veteke; hatü Judah ami jilathü kü pe showteke; Shejao ngei jomei chingnyüthü kü aw shomhen, hatü jomei penyüsha hahtükhen.