Read Phom Naga JOEL 1 Bible Online

JOEL 1 - Phom Naga bible

JOEL 1

¹Hapayü Pethuelei cheha Joel touei peipü SHEMBÜPAlei shah nyüke.

²Hapa bangtuh, amphong behethü; kahmük kü nyupü peüi hapa kü dhaong shaangtuh. Ammei nyih kü nevaijü ammei bühipa hepak kü henüng kei chemao vamla?

³Ammei hapeüthü kü hapa jung eyeishuoh; jomi jomei hapeüthü kü ehen, shao jomei hühihathü kü ehen.

⁴Mepa haümmei hahpü shouki hahtü aopa, ha khongmü peipü shouki hahtük; mepa khongmü peipü shouki hahtü aopa, ha phaukei daipü shouki hahtük; mepa phaukei daipü shouki hahtü aopa, ha ngaüh-ei hahpü shouki hahtük.

⁵Paotuh, amphong yiüi chokpüthü, hatü theptuh, hatü youngtuh, am yiü yingpüthü; Yiü ja linghen nyalingngupai peü mangtükteke.

⁶Shouki jenei kahmük mangtükteke; jom wong kohshi hatü iehen neaoki longi nyüke; jomei bha mailangei bha kei nyüke, hatü mailang chenyülei bhataüm kei nyüke.

⁷Hathüi ngelei nyalingngupai kah kowtük, hatü ngelei adhapüthü peü jangtükteke. Hathüi püshuw ngaüh-ei hahtük, hatü pükaobüm mon shotoh-i tuhphongteke.

⁸Yiük phepü nethe didaijü nela-i dhoila ashak ümtü theppü keiha, amphong thepeiyoungtuh.

⁹SHEMBÜPAlei phopshem leipü hahying moila, hatü yiü moila dohdaipü nangkü, SHEMBÜPA chongphopü ngongpathüi mahng thepnyüke.

¹⁰Kahthü mangdai, kahdok vandai; hah peü mangtük, yiü ja üdai, hatü olive püthü kaudaikem.

¹¹Mongmangtuh, am kahling am, theptuh, am nyalingngupai kah lingpü am; wheat hatü barley hah shingvaishi mong yungtuh; Mehenangkü hahnyü dongchong kemei mangdaiteke.

¹²Nyalingngupai vü vandai, hatü adhapüthü kaudai; Pomegranat, palm hatü apple kah kübü betjük peü didaiteke. Hingmei, shennyakthülei mongong mongle mahdaiteke.

¹³Dhoila ashak ümtuh hatü theptuh, Oh ngongpathü; youngtuh, am moidülei chongphopüthü. Peikei, vangnyak dhoila ashak ümtü phoptuh, amphong ngelei Kahvang chongphopüthü; Mehenangkü SHEMBÜPAlei phopshem kübü hahying, hatü yiü moila shümlangteke.

¹⁴Shüaeiyunglehen ngeükhüam shuohtuh; daülangpü thaihiyu hük nyüktuh! Behethü hatü kahmük kü nyupüthü peü SHEMBÜPA, ammei Kahvangei phopshemei thaituh, hatü SHEMBÜPA kü leneishuoh.

¹⁵Hapa nyih shingvaishi Onyükei! Mehenangkü SHEMBÜPAlei nyih yopailei nyüke; Jeiyong Kahvangi mangtükhen yah-ei peikünyüke.

¹⁶Jenei müki eeshi hahying, hatü jenei Kahvangei phopshem kübü mongongmongle nedohdaiangpü je?

¹⁷Kahdokvan kü sheilivungla didaipü nangkü puongmong kemei kongdai; hahpuongthü peü tendaikem.

¹⁸Mohohthü tok vaipai vaünyüke; mehenangkü jomi hahhen phenha nedangi longteinyüke; mi khongao hanghinyüke.

¹⁹Nüng kü lennyüpeih, Oh SHEMBÜPA; mehenangkü awi phenha peü jangtükteke, hatü awlomi pühivungthü peü hahtükteke.

²⁰Phaüyemthüi dangkao nüng kü lennyüke; mehenangkü yunglok peü jepdai, hatü awi phaü kübü phenha peü hahtükteke.