Read Phom Naga JOEL 2 Bible Online

JOEL 2 - Phom Naga bible

JOEL 2

¹Zionlei amit vüngtuh; ngelei daülangpü kahshangei vebaong shemm kaongtuh. Kahmük kü nyupüthü peü kheütuh; mehenangkü SHEMBÜPAlei nyih ngoikünyüke; hapa longi yopailei nyüke.

²Hapayü vangnyak hatü vang yimpü nyih hük, phumnyaki jümpü shangmang nyih hük vaikahen! Vang mangei kahshangthü banglangpü keiha, longpü, hatü wong kohpü veshanthü kei shouk peikünyüke; Aivang den kao jom mechemao hapakei nenyu, nevaijü ngoikahen denhivan kao hapakei nechongkahen.

³Awi kei jomi pühivung hahtüknyüke; Jom pheilei awlom bahnyüke, jomei shesha philei kahdokü Eden pe kei nyüke; Jomei ngaümpheilei kahdokü kongmü meheyao ne-aoi hahtükteke.

⁴Jomü veiheni koyeithü kei nyüke, jomü vehok koyeithü kei moknyüke.

⁵Vehok koyei mokpü ngeü keiha jomi kahshang shangchingei phaukei aongnyüke; Vungkah jempaan kü aw hapjü vung phaungpü keiha, wong kohpü veshanthü thepju kü ngeü anpü keiha annyüke.

⁶Jom eejü jatthüi nyemnyüke; hathü dhe shodainyüke.

⁷Jomi hampathü kei hoknyüke; jomi veshanthü kei phaümük doknyüke. Laophü dailem kü kangshangi dainyüke, jomi laophülei lem kübü shing nechainyu.

⁸Jomi mih-ei lem kü nechaiteinyu, peüi laülüki laophülei shesha lemei dainyüke. Jomi vepalei veyom shing benei shünyüke, hatü mepaiyao jom kü nebangaoknyu.

⁹Jomi chingnyülei mokei shünyüke; jomi penyüsha benei shünyüke; Jomi shemthü kü bakei aongtü, ümha shaden kü gühpa kei bakei shünyüke.

¹⁰Jom daijü kahdokao jennyüke, hatü vangshothü kheünyüke. Vanghe hatü lennyü manghdainyüke, hatü lithathü hajük kü nenyanyu.

¹¹SHEMBÜPAi vangmuk kei büpalei veshanthü kü enyüke; büpai epü bangpü veshanthü iejü ieyei nekemi hatü wong kohshi nyüke. SHEMBÜPAlei nyih longshi; hayü nyemshi nyüke; Üpai ha munenaokhen?

¹²“Shaang dangkao ammei mong kempai shüaeiyungleyei, thepeiyoungei ngei touei mong leptuh” shei SHEMBÜPAi enyüke.

¹³Ammei ashakviha nevai, ammei mongdang shaaktuh. SHEMBÜPA, ammei Kahvang touei mong leptuh; mehenangkü büpayü phahjipü hatü bampü nyüke; Mongshih anhen youngmü, hatü bampü kü changpüshapü nyüke, hatü büpai hanghi shuohhen kübüao mong leidainyeih.

¹⁴Üpai nyingpa, büpa mong leiyei SHEMBÜPA, ammei Kahvang kü hahying, hatü yiü moila shuohhen am kü moihiman changshi yahphahen aokpeih.

¹⁵Zionlei amit vüngtuh; daülangpü thaihiyu hük nyüktuh.

¹⁶Nanglakthü chemi thaihütuh; thaipü khong daütüktuh; Behe, hashih hatü aküngnaüthü müei peikei. shemshüthüao laophülei shem tuhtü peikei.

¹⁷SHEMBÜPA chongphopü ngongpathüi phopshem shakung hatü moidü aa kü theptuh. Jomi, “Oh SHEMBÜPA, nüngei nanglakthü yangtuh” sheiehütuh. Nüngi nüngei nanglakthü kü mih jatthüi ne-ienelemhen mü tetuhphong. Lebü shennyakthüi, “Ammei Kahvang melei nyüpa?” shei mehekei ehühen?

¹⁸Hahepak kü SHEMBÜPAi büpalei kahdok kü phahjiei, hatü büpalei nanglakthü kü shinshangei deihteke.

¹⁹SHEMBÜPAi laophülei nanglakthü kü jangei eteke: Ngei am kü aung, yiü, mainga shomnyüpeih; hapai am hüshemei hahhen, hatü ngei hajük kü am lebü jatthü toumü ne-ienelemi neleihüpih.

²⁰Ngei am toueipü apsha kübü vepa taishi changtükphahen; Jom hanei bhih kahdokei changtükhen. Shelei shaongpüthü Dipü Yungchingei, hatü ngaümpheilei müpüthü peü Mediterranean Yungchingei hüngtükhen. Jomei büm peü shehen hatü shie büei aonghen. Hingmei büpai dou longpü dükteke.

²¹Oh kahdok, nüng tenyem; am mongong mongletuh. Hingmei SHEMBÜPAi dou longpü dükteke.

²²Am tenyem, Oh phaüyemthü; am het yemshing kü phenha ja nikünyüke. Püthüi betjük jüknyüke; adhapü hatü nyalingngupai longkemkünyüke.

²³Mongongtuh, Oh Zion nanglakthü, SHEMBÜPA, ammei Kahvang kü mongongtuh. Büpai am kü jiüshangi shongpü vang shomteke, büpai shongpü hatü pheipü vang sheleipü kei changshi shomteke.

²⁴Hah tenshingei hah aümshung kü hahnih mahühen, yiü-üm kü yiü, hatü mainga aüh-ei yenkahen.

²⁵Ngei am khüei shompü ngelei veshan longpü, haümei hahpü, khongmü peipü, phaukei daipü, hatü ngaüh-ei hahpü shoukthüi ammei sheili peü hahtükpü nangkü ngei nyokei am kü shemhen.

²⁶Am mangmoh thahshi hahhen changshi danghen; Am kü thamapü dou dükpü nangkü ammi SHEMBÜPA, ammei Kahvangei men longhen. Ngelei nanglakthü ne-yei hapakei veü neponghüpih.

²⁷Hahepak kü ammi ngeiyü Israelei nyüke; Ngeiyü SHEMBÜPA, ammei Kahvang, hatü lebü üpayao neshiü shei nyinghen. Ngelei nanglakthü ne-yei hapakei veü neponghüpih.

²⁸Hapheikü ngei nanglak peü kü ngelei laangha khapshuohhen; Ammei nethe hatü nelathüi teteivanhen; ammei bajeithüi mangh manghhen; ammei nethethüi manghkhang eehen.

²⁹Hapa nyih kü baha hatü nyüha aathü kao ngei ngelei laangha khapshuohhen.

³⁰Ngei vangsho hatü kahdok kü iy, hatü aw hatü awshit shei yashanyale huhen.

³¹SHEMBÜPAlei nyih longpü, hatü nyempü peishekü, vanghenyü manghdaihen, hatü lennyü iy leidaihen.

³²Shejao üami SHEMBÜPAlei men kü nyükhenshang yemleihen. SHEMBÜPAi epü keiha Zion Kahshang hatü Jerusalem kü yangpüthü nyuhen, hatü yangpüthüyü SHEMBÜPAi nyükpüthü nyukahen.