Read Phom Naga AMOS 2 Bible Online

AMOS 2 - Phom Naga bible

AMOS 2

¹SHEMBÜPAi hapakei enyüke: Moab amei mang jem nangkü, hatü ali shingvaishi ngei hanghi neyahlangpih. Mehenangkü büpai Edom ongpalei vang dhon kü cheüteke.

²Hanangkü ngei Moab am kü aw shomhen, hatü hapai Kerioth amei penyüsha hahtükhen. Moab am vehok ngeü chi kü vaüpü eepü hatü amit vüngpü chi kü dihen.

³Ngei jomei ongpa mü büpalei lakchongbüthü peü jütükhen shei SHEMBÜPAi enyüke.

⁴SHEMBÜPAi hapakei enyüke: Judah amei mang jem nangkü, hatü ali shingvaishi ngei hanghi neyahlangpih; Mehenangkü jomi SHEMBÜPAlei shahkung yaktük, hatü büpalei shahkungnyüthü nedük. Shejao jomei chebü chepa am keiha aihük shahshem kahvangi jom peü lemnyong kü mülangteke.

⁵Hanangkü ngei Judah am kü aw shomhen, hatü hapai Jerusalem penyüsha hahtükhen.

⁶SHEMBÜPAi hapakei enyüke: Israel amei mang jem nangkü, hatü ali shingvaishi ngei hanghi neyahlangpih: Mehenangkü daülangshemshepü jomi lop kü yutük, hatü lathuh jora hük kü taopathü yutükteke.

⁷Jomi taopathü kübhih kü nyeüei dungtüknyüke, hatü neaoknethang ponghahpüthü lemhaoei yaktüknyüke. Pahiha nyi chemi nyüha hük mü shinyüke; hapai ngelei daülangpü men tentüknyüke.

⁸Phoppü shing peü kü jomi taopathü leipü hang nangkü yahpü ashak nyemtü lemnyüke; Jomi Kahvangei shemei hang kü yahpü yiü yingnyüke.

⁹Shejao jom shekü ngei cedar pü kei shaopü, hatü longkhampü kei wong kohpü Amor am mahtükpeih. Ngei pü shang leipü jomei betjük, hatü mong leipü pü tünglang mangtükpeih.

¹⁰Ngei am Ijip kahdok leipü müei leipeih; vangbong pinyi jahpanei am müpeih, hatü Amor amei kahdok am kü shuohpeih.

¹¹Ngei ammei hapeüthü hanei thibü vaihen, hatü ammei nethethü hanei Nazirit vaihen jeyei longpeih. Hayü jiüpü nevaipü je, Oh Israel? shei SHEMBÜPAi enyüke.

¹²Shejao ammi Nazirit am kü yiü yingshuohnyüke, hatü thibüthü kü thihivam shah te-ekei shei khüamnyüke.

¹³Hanangkü shaang ngei hanggo vihpai mohoh khari leetpükei ngei am ngümei leettükhen.

¹⁴Shangshi mokpüthüiyao neyangaokhen, wong kohpüthü wong laaidaihen, hatü veshanthüi jomei büm dangkao neyangaokhen.

¹⁵Lah nopüthüiyao neyangaokhen, hatü shangshi mokpüthüi jom dangkao neyangaokhen, nevaijü koyei dokshangei uopüthüao jomei büm dangkao neyangaokhen.

¹⁶Hapa nyih, hampathü dangkao lakkong, hatü bümkong nyaihen shei SHEMBÜPAi enyüke.