Read Phom Naga AMOS 5 Bible Online

AMOS 5 - Phom Naga bible

AMOS 5

¹Oh Israel nanglakthü, hapa shah bangtuh, ngei am kü mangh kesho hük lokphanüng:

²Mechemao nepao-aokhen mü Israel nela doteke. Üpaiyao pinnyü phukhen neshiüi kahdokei shükshi nyüke.

³SHEMBÜPA Kahvangi hapakei enyüke: Israel chingnyü hüki veshan haja hük vehokei shomjü kho hük mon aoei nyokei leihen, hatü kho hük shomjü an mon nyokei leihen.

⁴SHEMBÜPAi Israel nanglakthü kü hapakei enyüke: Ngei yemtuh hatü am yemmü nyuhen;

⁵shejao ammi Bethel teyem, hatü Gilgalei tedai nevaijü Beer-shebalei teheih; Mehenangkü Gilgal-ü hingmei wüpküpei daihen, hatü Bethel-ü neshiüi kong leidaihen.

⁶SHEMBÜPA yemtuh hatü yemmü nyuhen, hei nevaijema büpai Joseph phang khüei aw kei vamkahen, hatü üpaiyao hapa methen neshiüi Bethel hahtükhen.

⁷Am shahhing nyongtükpüthü, hatü daülangshemshepü kahdokei yaktükpüthü.

⁸Üpai lithathü, Pleiades hatü Orion lingpa, hatü shangmangi nepnüng leitüknya, hatü nyihnüngi vangnyak leitüknya, üpai yungching yung kü nyüknya, hatü kahdok kü vang keihünya, hayü SHEMBÜPA, büpalei men nyüke.

⁹Büpai veyom shing bentüknyeih, hatü pe ngeihtükpü chingnyü mangtüknyeih.

¹⁰Shahphen shingei shahhing ne-epüthü kü yeanpü shennyak kü ammi jiühitnyüke, hatü shahhing epü shennyak küang eelanyüke.

¹¹Ammi taopathü kü la-i shoupnyüke, hatü jomei hah yahlangnyüke. Hanangkü ammi yaongshem velangmao, ha kü nenyuhen; ammi nyalingngupai longi sheiteke, shejao haleipü yiü ammi neyinghen.

¹²Mehenangkü ammei mang meshük longpa ngei nyingei nyüpeih. Ammi daülangpüthü kü shüveinyüke, hatü yawhdou yahnyüke, hatü ammi shahphen shingei taopathü kü shahhing shahphenpü neshuohnyu.

¹³Hanangkü kon kohpüthüi henüng hepak kü nenmü nyudainyüke; mehenangkü hepak vangpan nemei-i nyüke.

¹⁴Am yemmü nyuhen shingvaishi ten nevai mei yemtuh. Shejüang ammi epükei Jeiyong SHEMBÜPA am mü nyukahen.

¹⁵Ten kü jiühittuh, mei kü bamtuh. Shahphen shingei shahhing etuh. Jeiyong SHEMBÜPA Kahvangi Josephei hühiha yemmü nyupüthü kü phahjihen.

¹⁶Hanangkü SHEMBÜPA, Jeiyong SHEMBÜPA Kahvangi hapakei enyüke: Chingmuh chingshang peü kü theppü nyuhen, chingyangshong peü kü Onyükei, Onyükei shei lenhen. Young kesho eyei thepteipüthü mü kahling amao thephen nyükhen.

¹⁷Nyalingngupai kah peülei theppü hatü youngpü nyuhen. Mehenangkü ngei am khong homei daihen shei SHEMBÜPAi enyüke.

¹⁸SHEMBÜPAlei nyih ongyangpüthü Onyükei! Mehekei ammi SHEMBÜPAlei nyih ongyangnya? Hapayü vangngai nevai, vangnyak nyukahen.

¹⁹Hapa nyih-ü shennyak hük mailang kübü mokei daiyei sheptao pongpükei, nevaijü shemei leiyei bham kü laki shongshingkü biüikaokpükei nyukahen.

²⁰SHEMBÜPAlei nyih-ü vangngai nevai, vangnyaknyukahen. Hapayü ngaiphapü nevai yimyuipü nyih vaikahen.

²¹Ngei ammei mohitap kü jiühitnyeih, hatü am thaipüyupü kü ngei mong neongnyih.

²²Ammi ngei kü jakpü moilathü, hatü hahying moila shuohlangmao ngei hathü neyahhen. Ammi ngei kü mongjempü moila shuohhen nitshüpü yem yah-ei peiküjao ngei hathü neyahpih.

²³Ngei toueipü kesho nyahhai ngeü yahlangshih, ngei ammei liping kongkoih ngeü nebanghüang.

²⁴Shejao shahhingpa yungyen kei yenhütuh; Daülangshemshepü mechemao nejeppü yunglok kei yenhütuh.

²⁵Oh Israel nanglakthü, bong pinyi thahshi jahpanei nyushi ammi ngei kü jakpü moila, hatü yangnyu moila shuohla?

²⁶Shejao ammi ammei Sakkuth ongpalei lajei, hatü ammei litha kahvangei lajei, Kaiwan, mepa ammi linghahpa, ha kü khümpü nangkü,

²⁷mechem ngei am Damaska homei lebü kahdokei wüpküpei küphen müei daihenshang ammi hathü koei daihen, SHEMBÜPA, üpalei men Jeiyong Kahvang nyüpa, büpai enyüke.