Read Phom Naga OBADIAH 1 Bible Online

OBADIAH 1 - Phom Naga bible

OBADIAH 1

¹Hapayü Obadiahlei manghkhang — Jeiyong SHEMBÜPAi Edom am nang hapakei enyüke: “Hamphongi SHEMBÜPAleipü shahjang hük dantepih, hatü jatthü touei phongmokbü hük shomei eteke: Layaongtuh, hatü jeni Edom am khüei hokshah!”

²“Veituh, jatthü khongkü ngei am peü mü maanpüba leihühen; am chemjalak kü yaktükhen.

³Ammei changmeipü thentoimongdangi am luhahteke; Am yaongvak kü chingchingpüthü, hatü kahshang shaopülei shem vepüthü. Ammei mongkü am nyingi, ‘Üpai ham chongei shüei vüaokhen?’ shei enyüke.

⁴Ammi alang kei shangei piyei aongjao, hatü lithathü chi kü jephijaan lingjao, ngei haleipao am shüei vühen shei Jeiyong SHEMBÜPAi enyüke.”

⁵Yanüng gühpa am touei peijü jomi napü doulem mon gühnyu nevaipü je? Nyalingngupai vaümpüthü am touei peijü betjük dheituhtü vaümnyu nevaipüje?

⁶Shejao mekei Esaulei shem bompa, hatü mekei büpalei thushaong dounyü aetlangpa?

⁷Am khüambakpü mongjemthüi-üng am luhahteke; jomi am kahmük kübü changtükteke. Am mongjem pongpü kahmükthüi am khüei yaongteke; am mü nükshung hük kü küpü küphüthüi am khüeitai heanteke, shejao ammi ha güh neyepaokhen.

⁸“Hapa nyih kü,” SHEMBÜPAi enyüke, “Ngei Edom am nahpülangpüthü, Esau kahshangthü leipü nyingpühingpüthü nemahtükhen je?”

⁹Oh Teman, ammei veshanthü nyemhühen, hatü Esaulei kahshangthü leipü veshanthü jütükkemhen.

¹⁰Anaü Jakob khüei hokpü nangkü, am veüi jümhühen; am denshing mahtükhen.

¹¹Mechem vepathü Jerusalem leipü mophimo aetei daipa, hatü kung am büpalei penyüsha benei shüpa, hatü Jerusalem nangkü phongyompa, amü jom keinyudaipeih, ha nyih am keüdaipeih.

¹²Anaü lomohpü nyih kü ammi naamei neveihah shepeih, nevaijü Judah nanglakthü mah pongpü nyih hüha shei nedeihhen vaipeih, nevaijü jom ponghahküpü nyih kü am nechangmeihah shepeih.

¹³Jom lomohpü nyih ammi jomei penyüsha homei neshühah shepeih, nevaijü jom hanghipü nyih jom tok vaipü kü am ühingei neveihah shepeih, nevaijü jom shanghahpü nyih jomei mop negühhah shepeih.

¹⁴Vepa kü nyemei nyaiküpüthü jühen am lembaong kü netaphen vaipeih, nevaijü jom ponghahpü nyih yangei daiküpüthü yepei vepa kü neshuohhen vaipeih.

¹⁵Jatthü peü khüei SHEMBÜPAlei nyih ngoikünyüke. Ammi mih kü dükshuohpükei am kao dükphahen, ammi dükpü douthü ammei shangjingei nyokei leikahen.

¹⁶Ngelei daülangpü Kahshangei, ngelei nanglakthüi shahyakpü yung yingteke. Shejao hapa mü nyeinya shahpü yungshong ngeihpü shonpü jatthüi yinghen hatü nyadaihen.

¹⁷Shejao Zion kahshangei yangpüthü hanei nyuhen, hatü hapayü daülangpüthü vaihen; hatü Jakob am phangi hapa mükjüp kahdok lomlanghen.

¹⁸Jakob am phang aw keiha, hatü Joseph am shem awlom keiha nyuhen; shejao Esau am shem hahtang kei nyuhen, hatü jomü aw kü jakhen hatü hahtükhen. Esau am phang yangei nechongkahen shei SHEMBÜPAi enyüke.

¹⁹Negeb leipü shennyakthüi Esaulei kahshangthü khüamlanghen, hatü heshüphi kahshangla kübü shennyakthüi Philistia yahlanghen, jomi Ephraim hatü Samaria kaamlanghen, hatü Benjamin phangi Gilead yahlanghen.

²⁰Wüpküpei daipü Israel am Kananei nyupüthüi Phonicia kübü Zarephath thahshi kaamlanghen, hatü wüpküpei daipü Jerusalem am Sepharadlei nyupüthüi Negeb amei jilathü khüamlanghen.

²¹Yangpüthüi Edom kü vanglem lemhen shingvaishi Zion kahshangei aonghen, hatü ongchingü SHEMBÜPAlei nyukahen.