Read Phom Naga BHEI-IE 14 Bible Online

BHEI-IE 14 - Phom Naga bible

BHEI-IE 14

¹Ha ya vangnyak nanglakthü peü ngeüwong annei wongmü thep.

²Israel am kemei Mosa hatü Aaron nyi kü eela, hatü khong kemei-i jiji kü, “Hamphongü Ijiplei nevaijü jahpanei didailangmeyü meihah shepü khih!

³Mih-ei lak kü dihen mü SHEMBÜPAi mehekei ham hapa kahdokei müei daipa? Hamei nyühihathü kemei vepathüi shetei lüdaihen khih. Ijiplei nyokei leidaijüang meihen khih!” shei eteke.

⁴Hanangkü jom hüki hük kü, “Jeni mübü hük jehahshah, hatü Ijiplei nyokei leidaishah” shei etei.

⁵Hahepak kü Mosa hi Aaron nyi-i thaipü Israel am tou mü kahdokei dhe shüshi shateke.

⁶Nunei cheha Joshua hatü Jephunnehlei cheha Kaleb üpa nyi-i kahmük doknüng daipü kü ompa, mongkü tüngei jijilei ashakviha shaaktük,

⁷hatü Israel am thaipü khongkü eteke, “Hamphong daiyei veipü kahdokü longi meishi nyüke.

⁸SHEMBÜPAi jen kü monghahjema, büpai jen hapa amma hatü nyahjiü yenpü kahdokei mülanghen, hatü jen kü hapa kahdok yahphahen.

⁹SHEMBÜPA khüei mon teyaongkei, hatü hapa kahdok leipü shennyakthü kü tenyemkei; mehenangkü jeni jom neüaokshasha hih. SHEMBÜPA jen mü nyüpeih, hatü jom yangpü jomei kahvangthü neütükteke; hanangkü tenyemkei” shei eteke.

¹⁰Shejao thaipü khongi jiji yaongi shükei jütükhen shei nyemshao. Hahepak kü SHEMBÜPAlei müknyinshekhang ashakshemei peipü Israel am peüi ee.

¹¹SHEMBÜPAi Mosa kü, “Meshükpa hapa nanglakthüi ngei yakphonghenang? Ngei jom kü yashanyalepü longi dükshuohjao meshükpa jomi ngei kü hingnelemhenang?

¹²Ngei jom kü cham shomei dihühen, shejao ngei nüng kübü jom mü longpü hatü wong kohpü jat hük linghen” shei eteke.

¹³Shejao Mosai SHEMBÜPA kü e, “Shejema Ijip ami ha jung danlanghen khih! Nüngei wong hi ngani hathü nanglakthü jom toueipü nüngi müei daiteke,

¹⁴hatü jomi ha jung hapa kahdokei nyupü shennyakthü kü etükkahen khih. Oh SHEMBÜPA, nüng ham mü nyüke shei ha shennyakthüi danlangteke, hatü Oh SHEMBÜPA, nüngei phum ham shak kü jümshi nyushingkü dhe dhe gongei eeteke, hatü nüngi ham shekü nyihnüng phum shemnyüi, hatü yanüng aw shemnyüi müteke.”

¹⁵Shaang nüngi nüngei nanglakthü kemei dhaomü jütükjema, nüng jung danpü jatthüi,

¹⁶SHEMBÜPAi jom kü shuohhen shei lahpü kahdokei müei nedaiaokpü nangkü büpai laophülei nanglakthü jahpanei jütükkempü khih shei eteihen.

¹⁷Hanangkü shaang, SHEMBÜPA, nüngei nganhilong hushih hatü nüngi lahshingkü mehe epa, hapakei dükshih:

¹⁸“SHEMBÜPAyü mongshih anpü youngmü, hatü bampü kü bhashahshi. Mang hatü pungpüshaipü mang tüknyeih. Shejao büpai nemeipüthü kü hanghi neshuoh-i netuhphongnyih. Bühipai thahpü mang nangkü hühiha den jem den ali thahshi büpai hanghihünyeih.”

¹⁹“Ijip leipü layaongpü hepak mebü shaang thahshi nüngi jomei mang tükpükei nüngei bampü longpü shangshi nanglakthülei mang tükeishuoh” shei e.

²⁰SHEMBÜPAi jangei, “Nüngi phoppükei ngei jomei mang tüktih” shei e.

²¹Shejao hingmeipa, ngeiyü vanyangyem Kahvang, hatü kahdoknyü peü SHEMBÜPAlei müknyinshekhangi mahen.

²²Shejao ngelei müknyinshekhang eepüthü, hatü Ijiplei hatü jahpanei yashanyalepü dou dükpü eepüthüi ngelei shah nebang hatü jomi ngei kü anpa anpa dokpeih.

²³Hapa shennyakthü üpaiyao ngei chebü chepa kü lahpü kahdok ne-eehühen. Ngelei ven nedanpüthü üpayao hapa kahdok ne-eeaokhen.

²⁴Shejao ngei chongphobü Kaleb, lebü mü chudeih hayaoha nyupü nangkü, hatü mong kempai ngei epü kü müpü nangkü büpa thümnüng daipü kahdokei ngei büpa müei daihen, hatü büpalei hühihathüi hapa kahdok yahhen.

²⁵Shaang, Amalek hatü Kanan am kahjithülei nyupü nangkü, ngenyih nyokei leituh hatü Hakla Yungching phileipü lem kü jahpanei layaongei daituh.

²⁶SHEMBÜPAi Mosa hi Aaron nyi kü eteke,

²⁷“Meshükpa ha nemeipü nanglakthüi ngei khüei eelahen? Israel ami ngei khüei eelaei langmaanpü ngei dantepih.

²⁸Hanangkü jom kü hapakei eyeishuoh. Hingmei ngeiyü vanyangyem SHEMBÜPA, ammi eyei danpü hapa douthü ngei am kü dükhen.

²⁹Amphong dihen hatü ammei mahng hapa jahpan maei haishi nyuhen. Vangbong kukha hatü ha dok kübü shangkuk iepü kü ompüthü hatü ngei khüei eelapüthü peü,

³⁰üpayao Jephunnehlei cheha Kaleb hatü Nunei cheha Joshua nyi mü lenei ngei am kü chingyah kahshenei bükhishem lingei anghen shei lahpü kahdokei neshüaokhen.

³¹Ammei hühihathü nang keyü ammi vepathü peiyei shetei lüdaihen khih shei epeyü, ngei jom müei leiyei ammi yaktükpü kahdokei chingchingei nyuhühen.

³²Shejao amphong payü hapa jahpanei dikemhen.

³³Ammei hühihathü vangbong pinyi thahshi jahpanei longteihen, amphong khongkü shoumpü shennyak mangdi thahshi amphongü mang lat shangponghen.

³⁴Am nyih pinyi kahmük doknüng daipü nyih ieyei shingvaishi vangbong hükbaong heshap ammei mang lat vangbong pinyi am shangponghen.

³⁵Ngei khüei chemi thaipü nemeipü nanglakthü kü hingmei ngei hapa douthü dükhen. Hapa jahpanei jom denshohvanloh ponghen; halei jom dikemhen shei ngei, SHEMBÜPAi enyüpeih.”

³⁶Hanangkü Mosai kahmük doknüng shompü shennyakthü nyokei leiyei kahdok nang shahshem shah-om aokpü nangkü nanglakthü khong kemei büpa khüei eelateke.

³⁷Kahmük nangkü shahshem shah-om baongpüthü kü SHEMBÜPAi cham peihü, hatü jom didaikem.

³⁸Kahmük doknüng daipü shennyakthü khongkü Nunei cheha Joshua hatü Jephunnehlei cheha Kaleb nyi mon yemmü nedi-i aoteke.

³⁹Mechem Mosai Israel am peü kü hapa shahthü ejapa, jom shahyaki thep.

⁴⁰Nepphei dhom mü lomi jomi phaüshang kahmükei aongei, “Hami mang thahteke, SHEMBÜPAi lahpü shing ngoishi ham daihen hih” shei jomi eteke.

⁴¹Shejao Mosai eteke, “Mehekei ammi SHEMBÜPAi epü nebangnya? Sheyü neaokpih!

⁴²Amphong te-aongtei; mehenangkü SHEMBÜPA am mü nenyu. Ammi ammei vepathüi neühahshasha;

⁴³mehenangkü halei ammi Amalek hatü Kanan am ponghen. Mehenangkü am SHEMBÜPA toueipü yandaipü nangkü büpa am mü nenyukahen hatü amü vepathülei lak kü mahkemhen.”

⁴⁴Mosa nevaijü SHEMBÜPAlei Vangpüshuwpü Pela baümtap leipü ne-aongjoong shei jom phaüshang kahmükei aongteke.

⁴⁵Hahepak kü phaüshang kahmükei nyupü Amalek hatü Kanan am yiüei jom neütüktü Hormah thahshi jom kü changteke.