Read Phom Naga BHEI-IE 15 Bible Online

BHEI-IE 15 - Phom Naga bible

BHEI-IE 15

¹SHEMBÜPAi Mosa kü,

²“Israel am kü hapakei eyeishuoh” shei eteke. “Am chingchingei nyuhen shingvaishi ngei am kü shuohpü kahdok ngoipheikü,

³ammi mohoh nevaijü mi yah-ei SHEMBÜPA kü vong meipü bühen shingvaishi jakpü moila nevaijü hayaoha vangpüshuwpü moila nevaijü mongong moila nevaijü mohitap moila aw kü jakei shuohtuh.

⁴Üpai SHEMBÜPA kü hathü moila shuohhenshang, büpai olive mainga dok hük yah-ei atta dok hük mü vuktü hahying moila shuohtuh.

⁵Hamü chemi phupü moila nevaijü jakpü moila mi ieyei mü yiü dok hük omshi shuohtuh.

⁶Mechem mi hük moilahenshang, atta dok nyi yah-ei olive mainga dok hük mü bhaoei yah-ei vuktü hahying moila shuohhen,

⁷hatü ha mü chemi yiü dok hük mü bhaoei shei omshi shuohhen. Hayü SHEMBÜPA kü vong meipü bühen shingvaishi moilatuh.”

⁸“Mechem nüngi SHEMBÜPA kü phupü moila nevaijü jakpü moila hayaoha vangpüshuwpü nevaijü mongjempü moila mohohbaong hük shuohhenshang,

⁹hapa mohohbaong mü hahying moila dok jem olive mainga dok nyi vuktü shuohtuh,

¹⁰hatü ha mü yiü shong nyi omshi shuohtuh. Hapayü SHEMBÜPA kü vong meipü aw kü jakpü moila nyüke.”

¹¹Mohoh, mi chebaongha, mi nevaijü yum ieyei kü hapakei dükhen:

¹²“Nüngi meshük moilanya, hapa aimü peü kü dükhen.

¹³Mechem SHEMBÜPA kü aw kü jakpü vong meipü moila shuohhenshang Israel bühü peüi hapa aimü dükhen.

¹⁴Am mü lakeiloiyei kanja shing vaijao denshing vaijao nyupü benha hanei SHEMBÜPA kü aw kü jakpü vong meipü moila shuohhüjema, büpayao ammi dükpü aimü dükhen.

¹⁵Hüdenhalenshi hapa aihük shahkungi am kao hatü am mü lakeiloiyei nyupü am kao shashi nyüke. Am hatü lakeiloipü am peü SHEMBÜPA tou kü hükkeipü nyüke.

¹⁶Hapa aihük shahkungi am hatü am mü lakeiloiyei nyupü am kü shashi nyüke.”

¹⁷SHEMBÜPAi Mosa kü,

¹⁸“Israel am kü ha eyeishuoh” shei eteke: “Mechem ngei am müei daipü kahdok ngoihenshang,

¹⁹hatü hapa kahdok kü vampü hahying hahhenshang, ha kübü hanei SHEMBÜPA kü moila shuohtuh. Hah tenshing leipü moila shuohpükei ammi ha shuohhen.

²⁰Amphongi shongpü hahja vetei aan ngümei lingpü shongpü aan SHEMBÜPA kü moila shuohtuh. Hah tenshing leipü moila shuohpükei ammi ha shuohhen.

²¹Hüdenhalenshi amphongi shongei ngümpü aan kübü SHEMBÜPA kü moila shuohtuh.”

²²Shejao shennyak hanei-i SHEMBÜPAi Mosa homei shuohpü shahkungnyüthü nenyingi shaitükjema,

²³hatü SHEMBÜPAi Mosa homei shuohpü shahkung lemphü ngoikahen nyih kü khongi nedükjema,

²⁴hatü hapayü khongi nenyingi shaitükpü vaijema, jomi SHEMBÜPA kü vong meipü jakpü moila mohohbaong hük mü nyingnyoi kü kei hahying moila hatü yiü moila hatü mang moila shuohhen yum chebaong hük shuohhen vongbong.

²⁵Ngongpai Israel khong peü shingvaishi mang tükpü moila shuohhen, hatü jom kü mang tükhen, hatü jomi SHEMBÜPA kü jom pungpü shingvaishi aw kü jakpü moila hatü mang moila koei peiteke.

²⁶Israel am khong kemei hatü jom mü lakeiloiyei nyupüthü peü kü mang tükhen; mehenangkü nenyingi pungpü kü jom peü omshi nyüke.

²⁷Shejao shennyak hüki nenyingi mang thahjema, büpai mang moila vangbong hük lompü yum chenyüha hük shuohhen.

²⁸Nenyingi mang thahpü shennyak shingvaishi ngongpai SHEMBÜPA kü mang tükpü moila shuohhen, hatü mechem hapa moila shuohhenshang, büpa kü mang tükhen.

²⁹Israel am vaijao lakeiloipü am vaijao nenyingi thahpü mang shingvaishi shahkung hük hatü aihüki peü kü shashi nyüke.

³⁰Shejao Israel am vaituh, lakeiloipü am vaituh, üpai nyingshangi mang thahhenshang, büpai SHEMBÜPA nyonghüteke; hapa keipü shennyakü jütükhen.

³¹Mehenangkü büpai SHEMBÜPAlei shah yaktük, hatü büpalei shahkungnyü mangtük; hapa keipü shennyakü jütükhen, hatü büpa dipü mang büpa shangkü nyuhen.

³²Mechem Israel am jahpanei nyupa, hahepak kü shennyak hük Sabbath nyih pü yah-ei eeteke.

³³Hapa shennyak eepüthüi büpa müei Mosa hi Aaron nyi hatü khong thaipü shingei dei,

³⁴hatü jomi büpa küpei tuh; mehenangkü büpa kü mehe dükhen neleki nyu.

³⁵Hahepak kü SHEMBÜPAi Mosa kü, “Hapa shennyakü jütükhen. Baümtap haolei müei daiyei büpa yaongi shükei jütüktuh” shei e.

³⁶Hanangkü SHEMBÜPAi Mosa homei epükei khongi büpa baümtap haolei müei daiyei yaongi shükei jütük.

³⁷SHEMBÜPAi Mosa kü,

³⁸“Israel am kü hapa eyeishuoh” shei eteke: “Hüdenhalenshi ammi laophülei ashakjung kü thüngla vü-i shentü vitem sheütuh.

³⁹SHEMBÜPAi am kü shuohpü shahkungthü deih-ei danghen shingvaishi hapa vitem kü veihen, hatü ammi hathü ven bangei dükhen, hatü ammi laophülei mükhimongi lümpülei daiyei ngei toueipü neyanhen.

⁴⁰Shejüang ammi ngelei shahkungnyüthü peü deih-ei dangei ven banghen, hatü ammei Kahvang kü am daülangi nyuhen.

⁴¹Ngeiyü ammei Kahvang vaihen shingvaishi am Ijip leipü müei leipü SHEMBÜPA, ammei Kahvang. Ngeiyü SHEMBÜPA, ammei Kahvang.”