Read Phom Naga BHEI-IE 19 Bible Online

BHEI-IE 19 - Phom Naga bible

BHEI-IE 19

¹SHEMBÜPAi Mosa hi Aaron nyi kü eteke:

²“Hapayü SHEMBÜPAi epü shahkungnyü nyüke: Israel ami anji touei mohoh cheha hakla hük eela nevaijü kawhikang neshiüpü hatü pang chemao mangpaaipü yah-ei peihen eyeishuoh.

³Hapayü Eleazar ngongpa kü shuohtuh; baümtap haolei müei daiyei büpa omshi jühahtuh.

⁴Hatü Eleazar ngongpai lakjaangi hapalei iy hanei yah-ei ashakshem chingshephi kü nyetpa haihen.

⁵Büpai veishi hapa mohoh chehayü jakhen; hapalei shuw, phai, iy hatü thenleimongphang kemei yah-ei jakhen.

⁶Ngongpai cedar pü, hyssop hatü mo hakla hanei yah-ei ha aw kü shokhen.

⁷Hapheikü ngongpai büpalei ashakviha dhotükhen hatü hangha laktüktü baümtap mongei shühen, shejao büpa om dhüshi nedaü-i nyuhen.

⁸Üpa shennyaki hapa jaknya, büpaiyao ashakviha dhotükhen hatü hangha lakhen hatü büpa om dhüshi nedaü-i nyuhen.

⁹Hatü shennyak üpa daülangi nyu, büpai hapa mohoh jakpü awmi thaiyei baümtap haolei daülangpü shingei tuhhen; hapayü Israel ami daühen yung kü shih-ei noteihen jaoei tuhhen; hapayü mang tükhen shingvaishi nyüke.

¹⁰Üpa shennyaki awmi thainya, büpaiyao laophülei ashakviha dhotükhen, hatü büpayao om dhüshi nedaüi nyuhen. Hapa shahkungü hüdenhalenshi Israel am hatü am mü lakeiloiyei nyupü am shingvaishi nyuhen.”

¹¹Üpai dipü mahng kü honghenshang nyih nyet nedaüi leihen.

¹²Büpai daühüpü yung yah-ei nyih jempabü kü hatü nyih nyetpabü kü daütükhen vongbong; hapheikü büpa daülangi leihen. Shejao büpai nyih jempabü hatü nyih nyetpabü nedaütükjema büpa nedaühen.

¹³Üpai mahng kü hongtü nedaütükhenshang büpa nedaüi nyuhen; mehenangkü daühüpü yungi büpa kü nehai. Büpai SHEMBÜPAlei ashakshem nyettüknyüke, hatü büpa mechemao Kahvangei nanglak nevaihen.

¹⁴Mechem shennyak hanei-i ashakshem mongei dihenshang, hapa shahkung nohen: Halei shüpü nevaijü dipü hepak kü nyupü shennyakthü peü nyih nyet thahshi nedaüi leihen.

¹⁵Ha mongei dükküplak neküpi apshi nyupü dük peü nedaüi leihen.

¹⁶Haolei daiyei shennyak hanei-i mahmahng nevaijü leanmahng kü hongjema, nevaijü shennyak hanei-i shennyakei mahngvang nevaijü mahngchong kü hongjema, nyih nyet nedaüi leihen.

¹⁷Hapa nedaüpü shennyak daühen shingvaishi dük kü mohoh hakla mepa mang tükhen shingvaishi jakpülei awmi tuhpa, ha shihtuh hatü ha kü yungthüng shihtuh.

¹⁸Hapheikü daülangpü shennyak hüki hyssop hanei yah-ei yung kü hingtü ashakshem, haleipü douhinangthü hatü halei nyupü shennyakthü peü kü haihen. Nyipabü kü büpai mahngvang nevaijü mahngchong nevaijü mahmahng nevaijü leanmahng kü hongpü shennyak kü haihen.

¹⁹Hapa daülangpü shennyaki nedaüpü shennyak kü nyih jempabü kü, hatü nyih nyetpabü kü daühüpü yungi haihen. Nyih nyetpabü kü büpai hapa shennyak daühühen. Hapa shennyaki ashakviha dhotükhen hatü hangha laktükhen, hatü hapa om kü büpa daüdaihen.

²⁰Shejao nedaüpü shennyak hanei-i nedaütükhahjema, büpa laophülei nanglak khong kübü katitükhen; mehenangkü büpai SHEMBÜPAlei ashakshem nyettükteke. Daühüpü yungi büpa kü nehaipü nangkü büpa nedaünelangpü nyüke.

²¹Hüdenhalenshi ammi hapa shahkungnyü noteihen. Üpa shennyaki daühüpü yungi haishuohnya, büpaiyao laophülei ashakviha dhotükhen vongbong, hatü üpai daühüpü yung kü honghenshang om dhüshi nedaüi leihen.

²²Nedaüpü shennyaki hongtükpü dou lemphü nedaüi leinyüke, hatü üpai ha kü honghenshang om dhüshi nedaüi leihen.