Read Phom Naga BHEI-IE 20 Bible Online

BHEI-IE 20 - Phom Naga bible

BHEI-IE 20

¹Shongpü len kü Israel am khong peü Zin yingnyü ngoi, hatü Kadeshlei nyu. Halei Mariam diyei mahng vütük.

²Shaang halei jom yinghen yung neshiüi nyuteke; hanangkü nanglakthüi Mosa hi Aaron nyi khüei thai.

³Jomi Mosa mü deyei, “Jempü jeihinaü ashakshem shadenei SHEMBÜPA touei dipü nyih didailangmeyü meihah shepeih!

⁴Ham hatü hamei yemhimakthü hapa jahpanei dihen mü mehekei nüngi SHEMBÜPAlei nanglakthü müei daipa?

⁵Mehekei nüngi ham Ijip leipü henüng keipü shingmang touei müei daipa? Hatouei hahying, nevaijü adhajük, nyalingngupai nevaijü pomegranat betjük neshiü. Hatouei yinghen yung dangkao neshiü” shei eteke.

⁶Mosa hi Aaron nyi khong toueipü yanei daiyei ashakshem shadenei yaong, hatü kahdok lemei jiji dhe thaungei sha, hatü SHEMBÜPAlei müknyinshekhang vamteke.

⁷SHEMBÜPAi Mosa kü,

⁸“Lenshuoh yahtuh, hatü anjei Aaron anjinyi-i khong kemei thaihütuh. Jom shekü nyupü yaong kü eyeishuoh, hatü haleipü yung bhaoei vamkahen. Hapa keiha nüngi nanglakthü hatü jomei yemhimakthüi yinghen yung ngaikahen” shei e.

⁹Hanangkü SHEMBÜPAi epükei Mosai lenshuoh yahteke.

¹⁰Aaron jijinyi-i yaong touei nanglakthü nyükei thaihütü jomphong kü, “Bangtuh, amphong khüpüthü, henjinyi-i amphong shing hapa yaong leipü yung ngaiaokkahen je?” shei eteke.

¹¹Hahepak kü Mosai büpalei lak noei antü lenshuoh yah-ei hapa yaong kü nyipa bheiteke. Haleipü yung bhaoei vam, hatü nanglakthü hatü jomei yemhimakthüi ha yung yingteke.

¹²Shejao SHEMBÜPAi Mosa hi Aaron nyi kü loh-ei eteke, “Israel nanglakthü touei ngaipü daülangpü nganhiwong nyüpeih shei nyinghen mü hinglempü anji kü changshi nenyupü nangkü ngei jom kü shuohpü kahdokei anjinyi-i jomphong müei neshüaokpih.”

¹³Hapayü Meribahleig vamteke. Halei Israel nanglakthüi SHEMBÜPA mü de, hatü halei büpayü daülangpü shei jomphong kü huteke.

¹⁴Mosai Kadesh leipü Edom ongpa touei phongmokbü shomei hapakei eteke: “Hapayü ammei jeihinaü Israel jat leipü shahjang khih: Hamphong tokvai hanghipü ammi nyingei nyüke.

¹⁵Hamei bühipa am Ijiplei yiüei halei vangbong luangi nyuteke. Ijip ami hamei bühipa hatü ham kü longi nemei-i nopeih,

¹⁶shejao mechem hami SHEMBÜPA kü leneiwongei phoppa, büpai hami lenpü danei vangsho phongshan hük shomei ham Ijip leipü müei daipeih. Shaang hamphong ammei kahmük vaungjung kübü Kadesh chingnyülei nyüpeih.

¹⁷Chingmeilemlingei ammei kahdok homei daihen mongshih. Ham hatü hamei yemhimaki lemnyü kübü yanei ammei kah, nevaijü nyalingngupai kah kü nekamhen, hatü ammei yungkuk leipü yungao neyinghen. Ammei kahmük mangpeihkem thahshi hamphongi lemnyüshong kü mon daihen.”

¹⁸Shejao Edom ami jangei, “Ammi hamei kahmük peih-ei daihen neaokpih; hapakei peihküjema, ham heih-ei am hahtükhen” shei e.

¹⁹Shao Israel ami, “Hamphongi lemnyüshong kü mon daihen; ham hatü hamei yemhimaki ammei yung yingjema hami ha shing lop shuohhen. Hami napeyü peih-ei daihen mon, lebü meheyao neshiü” shei e.

²⁰Shao Edom ami, “Am peih-ei nedeihahpih” shei e, hatü Edom ami Israel am khüei hokhen shingvaishi veshanthü longi deishih.

²¹Edom ami jomei kahmük peih-ei daihen nemongshuohpü nangkü Israel am nyokei leitü lebü lemei dai.

²²Israel am khong peü Kadesh leipü layaongei daiyei Hor Kahshang ngoiteke.

²³Edom amei viong, Hor Kahshangei SHEMBÜPAi Mosa hi Aaron nyi kü,

²⁴“Ngei Israel am kü shuohhen shei lahpü kahdokei Aaron neshüaokhen; mehenangkü Meribahlei anjipheni ngei epü khüei yaongpeih.

²⁵Aaron hi cheha Eleazar nyi müei Hor Kahshangei aongtuh.

²⁶Aaronei ngong-ow nyiuktuh hatü cheha Eleazar kü oweishuoh. Büpa halei didaihen” shei eteke.

²⁷SHEMBÜPAi epükei Mosai dük. Khong kemei veishi jomphong Hor Kahshangei aong.

²⁸Mosai Aaron leipü ngong-ow kemei nyiuk, hatü cheha Eleazar kü owhüteke, hatü Aaron hapa Hor Kahshangei di, hatü Mosa hi Eleazar nyi mon nyokei lei.

²⁹Mechem Israel ami Aaron didaiteke shei danpa, khong kemei nyih hapüan thahshi mahng thepteke.