Read Phom Naga BHEI-IE 23 Bible Online

BHEI-IE 23 - Phom Naga bible

BHEI-IE 23

¹Balaami Balak kü, “Hatouei ngei shing moidü nyet lingshih, hatü mohoh nyet hatü mi nyet deikei” shei e.

²Balaami epükei Balaki dük, hatü jijinyi-i moidü ieyei kü mohoh hatü mi hükbaong moilateke.

³Hahepak kü Balaami Balak kü, “Ngei lüdaijü nüngei moila touei yaongshi chongkei, üpai nyingpa SHEMBÜPA ngei mü pongteinüng yiüei nyunüng aokpeih. Büpai mehe ephahenshang, ngei nüng kü ekahen” shei e.

⁴Kahvang büpa mü pongteiteke, hatü Balaami, “Ngei moidü nyet lingpeih hatü moidü ieyei kü mohoh hatü mi hükbaong moilatepih” shei e.

⁵SHEMBÜPAi Balaam kü mehe ehen nyu, ha eshuoh, hatü “Balak touei nyokei leiyei hapa shah eyeishuoh” shei eteke.

⁶Hanangkü büpa leijashingkü Balakü Moab am mübüthü mü büpa moila shuohpü shingei yaongshi nyu.

⁷Hahepak kü Balaami hapa tetpüvanpü shah eteke: “Balaki Aram leipü ngei nyük, Moab ongi heong kahshangthü leipü ngei müei leiteke. Peikütuh, ngei leimao Israel am kü thaüvaütükkütuh shei ephüteke.

⁸Kahvangi nethaüvaüpüthü kü ngei mekei thaüvaühen? SHEMBÜPAi ne-eelapüthü kü ngei mekei eelahen?

⁹Yaongvak shangching kübü ngei-i jom eenyüke, shangtaothü leipü ngei-i jom kü chinyüpeih. Jomphongü jat lom jat nyüke, mih jat mü jomü nyeinya moihimanpü shei jomi nyingnyüke.

¹⁰Yungching bhihhiphang keipü Israel am üpai ieaokhen, nevaijü phaihan ali kü hük dangkao üpai itaokhen? Kahvangei nanglak kü ngei ngelei yangnyu hantet dohhüshah; Daülangpü shennyak kei ngei daülangi dishah.”

¹¹Hahepak kü Balaki Balaam kü, “Nüngi ngei kü mehe lingphopa? Ngelei vepathü kü thaüvaühühen shingvaishi ngei nüngü müei leipeih, shejao nüngi jom küang moihimanteke” shei e.

¹²Büpai, “SHEMBÜPAi mehe etuh shei enya, hapa mon ephahen” shei jangei e.

¹³Hahepak kü Balaki Balaam kü, “Israel am hanei monha eepü lebü shing hükei ngei müei daishah. Haleipü nüngi ngei leimao jom kü thaüvaüeishuoh” shei e.

¹⁴Hanangkü büpai büpa müei Zophim kah Pisgah shangchingei aong. Haleiyao büpai moidü nyet ling, hatü moidü ieyei kü mohoh hatü mi hükbaong moilateke.

¹⁵Balaami Balak kü, “Nüng moila shuohpü shingei yaongshi chongkei; ngei antolei Kahvang mü ponghen khih” shei e.

¹⁶SHEMBÜPAi Balaam kü mehe ehen ha eshuohteke hatü, “Balak touei nyokei leiyei hapa shah eyeishuoh” shei eteke.

¹⁷Hanangkü büpa leijashingkü Balakü Moab am mübüthü mü büpai moila shuohpü shingei yaongshi nyu. Balaki, “SHEMBÜPAi mehe ephopa?” shei pheteke.

¹⁸Hahepak kü Balaami hapa tetpüvanpü shah eteke: “Heihkei Balak, Zipporlei cheha; Ngei mehe ekahen bangtuh:

¹⁹Büpai shahshem ehen mü, Kahvangü shennyak nevai, nevaijü büpa mong yeiyahen mü shennyak ha nevai. Büpai etüktü ha nedüknyu je? Büpai lahtüktü ha nejiühünyu je?

²⁰Ngei kü moihimaneishuoh shei ephopeih; Mechem büpai moihimanhen, ngei ha neyeiya-aokpih.

²¹Jakob kü mehe shanghah nevaijü Israel kü mehe shangpong yakyingao ngei ne-eenyu. SHEMBÜPA, jomei Kahvang jom mü nyüke; Büpayü jomei ongpa shei lennyüke.

²²Kahvangi jom Ijip leipü müei daipeih; Büpayü jom shingvaishi phaünya kei wong kohshi nyüke.

²³Jakob khüei mehe phongyomhen; Israel am khüei meheyao tetpüvanpü nenoaokpih.” Shaang Israel am nangkü, “Kahvangi mehe dükpa veituh!” shei eteihen.

²⁴Veituh, nanglakthüyü mailang chenyü kei vamnyüke, hatü jom nyingi mailang kei ngaikünyüke. Hapayü het manghah thahshi neshinyu, hatü iy mangying thahshi nenmü nenyunyu.

²⁵Hahepak kü Balaki Balaam kü, “Nüngi jom kü tethaüvaü nevaijü moihimanao teshuoh” shei e.

²⁶Balaami jangei, “SHEMBÜPAi mehe ehenshang ha mon ngei ephahen shei nüng kü ne-eangpü je?” shei e.

²⁷Hapheikü Balaki Balaam kü, “Ngei nüng lebü shing hükei müei daishah, huoi. Üpai nyingpa, antolei daijü ngei leimao nüngi jomphong kü thaüvaühen Kahvangi mongkahenao aokpeih” shei e.

²⁸Hatü Balaki veishuohjü yingnyü eepü Peor shangchingei Balaam müei aongteke.

²⁹Balaami Balak kü, “Ngei shingvaishi hammü moidü nyet lingshih hatü mohoh nyet hatü mi nyet müei deikei” shei e.

³⁰Balaami epükei Balaki dük, hatü moidü ieyei mohoh hatü mi hükbaong moilateke.