Read Phom Naga BHEI-IE 27 Bible Online

BHEI-IE 27 - Phom Naga bible

BHEI-IE 27

¹Josephei cheha, Manasseh, Manassehlei cheha Makir, Makirlei cheha Gilead, Gileadei cheha Hepher, Hepherlei cheha Zelophehad, hatü Zelophehadei yiükhathü Mahlah, Noah, Hoglah, Milkah hatü Tirzah nyuteke.

²Jom ashakshem shadenei heih-ei Mosa, Eleazar ngongpa, mübüthü hatü khong peü touei yaongtü,

³“Hamei pa jahpanei nyushi didaipeih; büpayü SHEMBÜPA khüei yaongpü Korah hatü büpalei khongmü ne-omangpih, shejao büpayü büpalei mang nangkü dipeih hatü hapeüthü neshiü.

⁴Büpalei yeshang neshiü shei mehekei opalei men büpalei phang kübü katitükpa? Hamei opalei jeihinaüthü mü shepei mükjüp yahkei” shei eteke.

⁵Mosai jomei shahhidou SHEMBÜPA tou kü ko,

⁶hatü SHEMBÜPAi büpa kü,

⁷“Zelophehadei yiükhathüi epeyü jiüangpeih. Hingmei nüngi chepalei jeihinaüthü mü shepei mükjüp yah-eishuoh, hatü jom kü chepalei mükjüp yaheishuoh.

⁸Israel am kü hei etuh, shennyak hanei-i yeshang hapeü netuh-i didaijema, büpalei yiükhathüi chepalei mükjüp yahhen.

⁹Büpalei yiükhathü dangkao neshiüjema cheihinaüthüi ha mükjüp yahhen.

¹⁰Büpalei cheihinaüthü dangkao neshiüjema, büpalei mükjüpü chepalei jeihinaüthü kü shuohhen.

¹¹Chepalei jeihinaü neshiüjema, büpalei mükjüp büpalei phangyang kü shuohhen. Hapayü SHEMBÜPAi Mosa kü epü keiha Israel am shingvaishi noteihen shahkungnyü” shei eteke.

¹²SHEMBÜPAi Mosa kü, “Abarim Kahshang shoungei aongtuh hatü ngei Israel am kü shuohpü kahdok kü chiei veituh.

¹³Nüngi hapa eepheikü nüngao anjei Aaron keiha dihen;

¹⁴mehenangkü Zin jahpanei anjinyi-i ngelei shah khüei yaongpeih. Mechem nanglakthüi Meribahlei ngei khüei eelapa, anjinyi-i jom touei ngelei daülangpü nganhiwong nenyinghüangpih” shei eteke. (Meribah-ü Zin jahpan Kadesh shei epü shingeipü yung nyüke).

¹⁵Mosai SHEMBÜPA kü phopei,

¹⁶“SHEMBÜPA Kahvang, hangkulei yangnyu kü SHEMBÜPA Kahvangi, hapa nanglakthü shak kü,

¹⁷jom she kü daihen hatü leihen, hatü SHEMBÜPAlei nanglakthü mi yombü neshiüpü mikhong kei nenyuhen shingvaishi jom müei daihen hatü müei leihen shennyak hük jeshih” shei eteke.

¹⁸Hanangkü SHEMBÜPAi Mosa kü, “Nunei cheha Joshua, üpa kü laangha nyu, büpa deiyei büpa kü nüngei laki shüngtuh.

¹⁹Büpa Eleazar ngongpa hatü thaipü khong touei yaonghütü jom peü nyushi nüng kü jeihen büpa kü kangpü dousho shuohtuh.

²⁰Israel am khong peüi büpai epü ven banghen shingvaishi nüng kü nyupü nganhiwong hanei büpa kü shuohtuh.

²¹Eleazar ngongpa touei büpa yaonghen hatü büpa shingvaishi SHEMBÜPA toueipü Urim hatü Thummim kü Eleazari pheyei SHEMBÜPAi mongpü nyinghen. Hapa keiha Eleazari Joshua hatü Israel am khong kempü kü lem hupükei jom daihen hatü leihen” shei e.

²²Hanangkü SHEMBÜPAi epükei Mosai dük. Büpai Joshua deiyei Eleazar ngongpa hatü thaipü khong peü touei yaonghü,

²³hatü SHEMBÜPAi Mosa kü epükei büpai Joshua kü laki shüngei büpa kü jeiyei kangpü dousho shuohteke.