Read Phom Naga BHEI-IE 3 Bible Online

BHEI-IE 3 - Phom Naga bible

BHEI-IE 3

¹Hapayü SHEMBÜPAi Mosa mü Sinai Kahshangei eteipü hepak kü nyupü Aaron hatü Mosa nyilei shemong laphen nyüke.

²Aaronei yeshangthülei men hathü nyüke: Hashongpa Nadab, Abihu, Eleazar hatü Ithamar.

³Hathüyü Aaronei yeshangthülei men nyüke hatü jomphongü ngongpa dousho kü ngongpathü kei chongphohen shingvaishi thiteiphuei jeteke.

⁴Shejao Nadab hatü Abihu nyiyü Sinai jahpanei SHEMBÜPA touei nedaünelangpü aw jakei moilapü nangkü jütük. Jijinyilei hapeüthü nenyuang, hanangkü Eleazar hatü Ithamar nyi-i chepa Aaronei den kemei kü ngongpathü kei chongphoteke.

⁵Hahepak kü SHEMBÜPAi Mosa kü,

⁶“Levi am phang Aaron ngongpa touei müei deikei hatü jom büpa mü sheühteihen jetuh.

⁷Jomi büpa mü sheühteiyei dou dükhen hatü khong peü shingvaishi ashakshem leipü dou dükei sheühhen.

⁸Jomi ashakshem leipü douhinang peü jungeilanghen hatü Israel am kempü shingvaishi ashakshemei dou dükpai jom kü sheühhen.

⁹Levi am kemei Aaron hatü chehathülei lak kü shuohtuh; Jomphongü büpa kü sheühhen shingvaishi Israel am khong kübü shuohpü nyüke.

¹⁰Aaron hatü yeshangthüi ngongpathü vaihen jetuh; lebü üpai hapa daülangpü shing yopailei heihhenshang dihühen” shei eshuohteke.

¹¹SHEMBÜPAi Mosa kü,

¹²“Ngei Levi amü Israel am nyüha hüki bühpü hashongpa nangjeipü vaishi Israel am khong kübü jepeih. Levi amü ngelei lompü nyüpeih;

¹³mehenangkü hashongpathü kemei ngelei; mechem ngei Ijiplei hashongpathü hatü shongei shaanpü yemhimakthü jütükpa, ngelei lompü vaihen shingvaishi Israel kü hashongpathü hatü shongei shaanpü yemhimakthü peü ngei daütükpeih; jomphongü ngelei. Ngeiyü SHEMBÜPA” shei eteke.

¹⁴SHEMBÜPAi Sinai jahpanei Mosa kü,

¹⁵“Levi am jomei shemdep hatü phang heshap shangkuk ietuh. Baha lenyang hük hatü ha dok kübü kemei ietuh” shei eteke.

¹⁶SHEMBÜPAlei shah keiha Mosai jomphong ieteke.

¹⁷Hathüyü Levilei chehathülei men shiüteke: Gershon, Kohath hatü Merari.

¹⁸Hathüyü Gershonei chehathülei phangdep men nyüke: Libni hatü Shimei.

¹⁹Kohath am phangthü: Amram, Izhar, Hebron hatü Uzziel.

²⁰Merari am phangthü: Mahli hatü Mushi. Hathüyü jomei shemdep aimü Levi phangthü nyüke.

²¹Libni hatü Shimei phang nyiyü Gershon phang nyüke.

²²Lenyang hük dok kübü bahathü shangkuk iepü peüshep 7, 500 nyuteke.

²³Gershon phangthü kemei ashakshem ngaümphei lemei heshüphilep kü baümtap vehen.

²⁴Gershon phangdep kü mübü-ü Laelei cheha Eliasaph nyuteke.

²⁵Jomei dousho-ü ashakshem, ha mongei hatü shakei jümpü, shadenei haenpü ashak,

²⁶ashakshem shinei chingshelei hatü moidü shinei haenpü ashak, hatü chingshe shadenei haenpü ashak kü jungeilanghen. Hathü douthü kü shenpü dousho kempü kü jomi veihen.

²⁷Kohath phangkü Amram, Izhar, Hebron hatü Uzziel shemdepthü nyüke.

²⁸Lenyang hük dok kübü bahathü shangkuk iepü peüshep 8, 600 nyuteke. Kohath phangthüi daülangpü shingkü veihen.

²⁹Kohath phangthüi ashakshem pehephi kü baümtap vehen.

³⁰Kohath phangthü kü Uzzielei cheha Elizaphan mübü vaiteke.

³¹Jomei dousho-ü pela, haüdü, awshong, moidü, daülangpü shingei chongpho shingkü noteipü douhinangthü, haenpü ashak hatü hathü mü shenpü douhinang lemphüli kü jungeilanghen.

³²Aaron ngongpalei cheha Eleazar-ü Levi am mübüthü shak kü mübü longpü nyuteke, hatü daülangpü shingkü veipüthü shak kao kheipa vaishi jeteke.

³³Mahli hatü Mushi phang nyiyü Merari kübü phaakpü phang nyi nyüke; ha phang nyiyü Merari phang nyüke.

³⁴Lenyang hük dok kübü bahathü kemei shangkuk iepü peüshep 6, 200 nyuteke.

³⁵Merari phangthü kü Zurielei cheha Abihail mübü nyuteke; jomi ashakshem apshaphilep kü baümtap vehen nyuteke.

³⁶Merari phangthüi ashakshem shemnyü shemha, yithiyü shongmong, shongbhang, hatü ha kü shihpü douthü hatü hapa kü shenpü noteipü lemphüli kü jomi veihen nyuteke

³⁷hatü chingshelei shinei haongpü shemhathü, haleipü pangbhangthü, haanhaung hatü ha kü shenpü vüthü peü kü jomi jungeilanghen.

³⁸Mosa, Aaron hatü chehathüi ashakshem shemshe heongphi kü baümtap vehen eteke. Jomei dousho-ü Israel nanglakthü shingvaishi daülangpü shingei chongphohen nyuteke. Lebü üpai hapa yopailei heihhenshang jütükteke.

³⁹SHEMBÜPAi epü keiha Mosa hatü Aaron nyi-i phang phang kübü bahathü lenyang hük hatü ha dok kübü shangkuk ieshingkü peüshep shennyak 22, 000 nyuteke.

⁴⁰SHEMBÜPAi Mosa kü, “Israel am hashongpathü lenyang hük hatü ha dok kübü peü shangkuk ietuh hatü jomei men nyangtuh.

⁴¹Israel amei hashongpathü nangjei Levi amei hashongpathü, hatü Israel amei shongei shaanpü yemhimakthü nangjei Levi amei yemhimakthü ngei yahhen. Ngeiyü SHEMBÜPA” shei e.

⁴²Hanangkü SHEMBÜPAi epükei Mosai Israel am lenyang hük hatü ha dok kübü hashongpathü peü shangkuk ieteke,

⁴³hatü hashongpathü lenyang hük hatü ha dok kübü men nyangshingkü peüshep 22, 273 nyuteke.

⁴⁴SHEMBÜPAi Mosa kü,

⁴⁵“Israel amei hashongpathü nangjei Levi amei hashongpathü, hatü Israel amei shongei shaanpü yemhimakthü nangjei Levi amei yemhimak yah-ei daütüktuh. Levi amü ngelei. Ngeiyü SHEMBÜPA.

⁴⁶Levi am mü Israel am hashongpathü 273 nyeidaipü angei leihen shingvaishi,

⁴⁷shennyak pabüm ieyei kü lop thaiteipü vanglem keiha ngin nga baong thaituh,

⁴⁸hatü hapa ngin Aaron hatü chehathü kü nyeidaipü Israel am angei leihen shuohtuh” shei eteke.

⁴⁹Levi am mü nyeidaipü Israel am angei leihen ngin Mosai thaiteke.

⁵⁰Israel am hashongpathü leipü ngin büpai 1, 365 thai,

⁵¹hatü SHEMBÜPAi eshuohpükei Mosai angei leihen ngin thaiyei Aaron hatü chehathü kü shuohteke.