Read Phom Naga BHEI-IE 35 Bible Online

BHEI-IE 35 - Phom Naga bible

BHEI-IE 35

¹Jeriko kübü Jordan homei daiyei Moab kahjilei SHEMBÜPAi Mosa kü,

²“Israel ami jomi dangpü mükjüp kahdok kübü Levi am nyuhen hatü yemhimakthü het hahhen shingvaishi kahmük hanei ching kü shonei shuohhen etuh” shei e.

³“Ha chingthü Levi amei vaihen, hatü jom halei nyuhen, hathü phaümükü jomei mohoh, mi hatü lebü yemhimakthüi het hahshing vaihen.

⁴Yemhimak het hahshing phaümükü penyü kü shinei feet haja hük mü kho nga baong taishi shuohhen.

⁵Ching haolei heongphi kü feet haja jem, pehephi kü feet haja jem, apshaphi kü feet haja jem hatü pehephi kü feet haja jem ching jiamei tuhtü shettuh. Hapa phaümükü jomi yemhimak kü het ühshing vaihen” shei eteke.

⁶Ammi Levi am kü ching vok shuohtuh hatü shennyak hanei-i nenyingi lebü shennyak jütükjema, büpa halei daiyei shojoei nyuhen. Ha kü üei lebü chingthü pinyipünyi shuohtuh.

⁷Peüshep ammi Levi am kü yemhimak het hahhen phaümük omei ching pinyipüshet shuohtuh.

⁸Ammi Levi am kü shuohpü chingthüyü jat ieyei laophü laophüi dangpü kahdok longpü maanpü heshap shuohtuh.

⁹SHEMBÜPAi Mosa kü,

¹⁰“Israel am kü hapakei etuh shei eteke: ‘Mechem ammi Jordan yung homei Kanan kahdokei shühenshang,

¹¹shennyak hanei-i nenyingi mih jütükjü laongei daiyei shojohen shingvaishi shojo ching jetuh.

¹²Hathüyü jüshuohpü shennyak shahphen shingei yaongshekü bhüh yempü ami büpa jütükmangkü hapa shennyak laongei daiyei shojohen chingthü vaihen.

¹³Ammi shuohpü ching vokü shojo ching vaihen.

¹⁴Jordan yungdangei ching jem, hatü Kananei ching jem shuohtuh.

¹⁵Hathü ching vokü Israel am lakeiloiyei nyupü am hatü lebü shennyakthü peü shingvaishi shojohen ching vaihen. Hanei-i nenyingi shennyak hanei jütükjema hathü ching hükei daiyei shojohen’ ” shei eteke.

¹⁶Shejao shennyak hüki hanei kü nyiami bheitü jütükjema, büpayü shennyak jüpü am nyüke; hapakei büpayao jütükhen.

¹⁷Nevaijü shennyak hüki büpalei lakei yaong noshi nyupai shennyak hanei kü shüktü jütükjema, büpayü shennyak jüpü am nyüke, hapakei büpayao jütükhen.

¹⁸Nevaijü shennyak hüki büpalei lakei pü noshi nyupai shennyak hanei kü bheitü jütükjema, büpayü shennyak jüpü am nyüke, hapakei büpayao jütükhen.

¹⁹Jütükpü shennyakei shem ami jüpü shennyakao jütükhen. Mechem jomi büpa heühenshang büpa jütükhen.

²⁰Shennyak hüki hanei am kü jiühitei hungtü vüshih-ei nevaijü nyingshangi lemhüki shüktü jütükjema,

²¹nevaijü mükhakei büpai hapa shennyak kü laktaümi shüh-ei jütükjema, büpayü shennyak jüpü am nyüke, hapakei büpayao jütükhen. Hapa bhüh yempü shennyaki mechem büpa ponghenshang büpa jütükhen.

²²Shejao meheyao ten deihpü neshiü, shejao shennyak hüki hanei am kü hungtü vüshih-ei nevaijü lemhüki shüktü jütükjema,

²³nevaijü büpai ne-ee-i hanei kü yaongi shüktü jütükjema, didaipü shennyakü büpalei vepa nevai, hatü jütükhen shei deihshi dükpü nevaipai,

²⁴khongi hathü shahkungthü aimü bhüh yempü shennyak hi jüpü shennyak nyi aa kü shahphenhen.

²⁵Khongi bhüh yempü shennyak khüambakei nevai, shejao mih jüpü shennyak yanghen khüambakei shahphenhen vongbong, hatü büpa shojo chingei shomtükhen. Hahepak kü nyupü ngongchong mangdi thahshi büpa halei nyuhen.

²⁶Shejao shennyak jüpü shennyaki büpa daiyei shojo chingei nenyui lebülei daiyei nyushi,

²⁷bhüh yempü ami büpa heüei jütükjema, bhüh yempü ami pungpü nevaihen.

²⁸Hapa shennyak jüpü shennyakü shojo chingei ngongchong mangdi thahshi nyuhen; ngongchong dipheikü mon büpa laophülei shemei nyokei leihen aok.

²⁹Am hatü ammei hühihathü melei nyuhenshang hapa shahkungthü am kü shashi nyüke.

³⁰Üpai shennyak hanei jühenshang, denpü nyi mü nyeishi nyujü mon büpayao jütükhen aok. Shejao denpü hük mon nyupü kü shennyak jühen mü nyonghühen neaok.

³¹Shennyak jüpü shennyakü jütükhen vongbong; shennyak jüpü shennyak kü hang hahtü tuhhen neaok.

³²Shennyak jüpü shennyak hük shojo chingei laongei daiyei nyutü ngongchong nedi-i tuhtü shemei leihen shingvaishi lop yahtü teleishih.

³³Am nyupü kahdok tenyettük. Jüteishangteipai kahdok nyettüknyeih; lebü shennyak jüpü mang paütükhen lem neshiüpih.

³⁴Am nyupü kahdok tenyettük; mehenangkü ngeiyü SHEMBÜPA, hatü ngei Israel nanglakthü mü nyunyüpeih.