Read Phom Naga BHEI-IE 36 Bible Online

BHEI-IE 36 - Phom Naga bible

BHEI-IE 36

¹Josephei cheha Manasseh, Manassehlei cheha Makir, Makirlei cheha Gilead am phang kübü shemdep kü mübüthüi Mosa hatü lebü mübüthü, Israel shemdepthü kü mübüthü touei peiyei eteke,

²“SHEMBÜPAi nüng kü kahdokü phongyomtü Israel nanglakthü kü haneishuoh shei eteke, hatü büpai hamei jeihinaü Zelophehadei mükjüp kemei büpalei yiükhathü kü shuohtuh shei nüng kü eteke.

³Shejao deihhümao, shahnying jomi lebü Israel jat shennyak mü shem yemei lüdaijema, ham kü shuohpü hamei bü mükjüp jomphongi doi daijapü jat amei kahdok vaidaihen khih, hatü hamei mükjüp ham kü shuohpü komdaihen khih.

⁴Mechem jubilee bong kü yutükpü douthü shongpü shembü kü leiteihen shangkü Zelophehadei yiükhathülei mükjüpü denshing jom doi daijapü jat amei mükjüp leidaihen, hatü hamei bü mükjüp mahdaihen khih” shei eteke.

⁵Hahepak kü SHEMBÜPAi shuohpü ngeükhüam Mosai Israel am kü shuohteke: “Mehe Josephei hühihathüi enya, hayü jiüangpeih.

⁶Zelophehadei yiükhathüi jomi lümpü baha mü shem yemhen aok, shejao jomei jat shennyak mü mon shem yemhen shei SHEMBÜPAi epeih.

⁷Israel amei mükjüp jat hük leipü jat hük kü chaiteihen neaok; Israel jat peüi laophülei bü mükjüp laophülei jat mongkü mon tuhhen.

⁸Israel am peüi laophülei bü mükjüp noteihen shingvaishi Israel jat kü üpa nyühai mükjüp yahnya, pinnyüi laophülei jat shennyak mü mon shem yemhen.

⁹Jat hük leipü jat hük kü mükjüp nechaiteihen; mehenangkü Israel jat peüi laophülei mükjüp noteihen.”

¹⁰Hanangkü Zelophehadei yiükhathüi SHEMBÜPAi Mosa homei eshuohpükei dükteke.

¹¹Zelophehadei yiükhathüyü Mahlah, Tirzah, Hoglah, Milkah hatü Noah nyuteke, hatü jomi chepalei jeihinaü am mü shem yem.

¹²Jom Josephei cheha Manasseh jat kübü phang am mü shem yem, hatü jomei mükjüp chepalei jat hatü mükhiphangei lakmongei tuhteke.

¹³Hathüyü SHEMBÜPAi Mosa homei Israel am kü Jeriko kübü Jordan homei daiyei Moab kahjilei nyushi shuohpü shahkungnyüthü nyuteke.