Read Phom Naga BHEI-IE 5 Bible Online

BHEI-IE 5 - Phom Naga bible

BHEI-IE 5

¹SHEMBÜPAi Mosa kü,

²“Shennyak üpa kü ngomdin nevaijü büm kübü mehe nemeipü vamnya, nevaijü dipü mahng kü hongtü nyüpa, jom baümtap leipü deitüktuh shei Israel am kü etuh.

³Ngei jom mü nyupü, jomei baümtap nenyethen shingvaishi nyüha vaituh, baha vaituh jom baümtap kübü deitüktuh” shei e.

⁴SHEMBÜPAi Mosa kü epü keiha Israel ami ven bangei hapa keipü shennyakthü kemei baümtap leipü changtük.

⁵SHEMBÜPAi Mosa kü,

⁶“Israel am kü hapakei etuh shei eteke: ‘Mechem shennyak hüki SHEMBÜPA kü hingnelem hatü lebü shennyak hanei homei nejiüpü dou dükhenshang, hapa shennyakü pungteke,

⁷hatü büpai thahpü mang lahhen vongbong. Büpai shaitükpü kemei shemhen hatü ha kü phaihan nga kü phaihan hük ütü büpai shaishuohpü shennyak kü hang shemhen vongbong.

⁸Shejao hapa shennyak didaitü hapa hang shemhen büpalei shem am nenyujema, hapa hangü SHEMBÜPAlei, hatü hapayü ngongpathü kü büpai pungpü mang shingvaishi mang tükpü moila shuohhen mi chebaongha kü üei shuohhen vongbong.

⁹Israel ami ngongpa touei koei peipü thintho kemei SHEMBÜPAlei.

¹⁰Shennyak ieyeilei daülangpü thinthothüyü SHEMBÜPAlei, shejao mepa ngongpa kü shuohnya, hayü ngongpalei nyüke.’ ”

¹¹Hahepak kü SHEMBÜPAi Mosa kü,

¹²Israel nanglakthü kü hapakei eyeishuoh shei eteke: Shennyak hükei shembünyü hük lem pungei lüdaijema hatü büpa mü shahhing kü nenyui,

¹³lebü baha mü douten dükei hapa laophülei baha kü jojema, hatü pinnyü douten dükei nyushi güh yeppü denpü neshüpü nangkü pinnyü pungpü neyepaokjema;

¹⁴hatü chepahai pinnyü kü douten dükteke shei mongnelemi deihjema; nevaijü pinnyüi mehe tenao nedükpü kü mongnelemi deihjema,

¹⁵büpai laophülei shembünyü ngongpa touei müei peihen. Büpai shao pinnyülei men kü atta dok hük yah-ei peihen, shejao büpai hapa kü olive mainga nevaijü ayingshü meheyao neshihhen; mehenangkü hapayü shahhing shahshem dokhen shingvaishi bahapai shuohpü mongnelempü hahying moila nyüke.

¹⁶Ngongpai pinnyü müei deiyei SHEMBÜPA tou kü yaonghühen,

¹⁷hatü büpai haümdük kü daülangpü yung maani shihhen; hayü ashakshem aangshung leipü kübhih maani yah-ei hapa yung shahhühen shingvaishi shihhen.

¹⁸Ngongpai hapa nyüha SHEMBÜPA tou kü yaonghüphei kü büpai pinnyülei sholok laihühen, hatü mongnelempü hahying moila pinnyülei lakei shümhühen. Ngongpai büpalei lakei thaüvaü koei peihen nangkü hapa shahyak yungdük nohen,

¹⁹hatü ngongpai hapa nyühanyüi lah-ei hapakei ehühen: “Nüngi lebü baha mü mükbongjuyung nedük, hatü lempung kü nedai, hatü ambaha mü nyuyang kü nedaünelangi nenyupü vaijema, hapa thaüvaü koei peipü shahyak yungi nüng kü nehethen.

²⁰Shejao nüngi ambaha mü nyuyang kü lempungei lebü baha mü mükbongjuyungei, ambaha tuhtü nedaünelangi nyupü vaijema,

²¹ngongpai hapa nyühanyü kü thaüvaü hethen shingvaishi lah-ei ehütuh ‘SHEMBÜPAi, nüngei nanglakthüi, nüng kü thaüvaühühen hatü yaktükhen, hatü büpai nüngei naü uoshing jeptükhen hatü nüngei vom pouktükhen.

²²Hapa thaüvaü yung nüngei büm kü shühen hatü hapai nüngei naü uoshing jeptükhen.’ ” Hahepak kü hapa nyühai, “Amen. SHEMBÜPAi hapakei nyemdükpha” shei ehen.

²³Ngongpai hapa thaüvaüthü nyanghen hatü shahyak yung kü ha paüei shihhen.

²⁴Büpai hapa thaüvaü kohpü shahyak yung hapa nyühanyü kü yingshuohhen, hatü hapa yung pinnyü kü shühen, hatü mangshi tünghühen.

²⁵Ngongpai pinnyülei lak leipü atta moila yahlanghen hatü hapa notü SHEMBÜPA kü daühühen hatü moidü touei yah-ei deihen.

²⁶Ngongpai hapa moila leipü nebenelakpü moila vaihen lakpaoh hük yah-ei moidülei jakhen, hatü hapheikü hapa nyüha kü shahyak yung yingshuohhen.

²⁷Hapa nyüha mih mü mükbongjuyungei chepaha mü shahhing ne-epü vaijema, mechem pinnyüi thaüvaü kohpü shahyak yung yinghenshang, ha pinnyülei büm kü shühen hatü mangshi tünghen; pinnyülei vom poukhen hatü naü uoshing jepdaihen, hatü laophülei nanglak khongkü thaüvaütükpü nyüha leihen.

²⁸Shejao pinnyü pungpü neshiü, hatü nedaünelangpü kübü yangei nyupü vaijema, pinnyü kü thaüvaü nehethen hatü hapeü bühhen aokhen.

²⁹Mechem nyüha hük pungei daihen, hatü laophülei baha mü nyuyang kü mih mü mükbongjuyunghen,

³⁰hatü mechem chepahai mongnelemi deihhen, ha shingvaishi nohen shahkungnyü nyüke. Ngongpai pinnyü SHEMBÜPA touei yaonghütü pinnyü kü hapa shahkungnyü nohen.

³¹Pungpü kü chepaha neomhen, shejao pungpü mang kemei nyühanyüi kohen.