Read Phom Naga BHEI-IE 6 Bible Online

BHEI-IE 6 - Phom Naga bible

BHEI-IE 6

¹SHEMBÜPAi Mosa kü,

²“Israel am kü hapa etuh shei eteke: ‘Nyüha nevaijü baha hük Nazirit shennyak hük vaihen shingvaishi hayaoha vangpüshuwpü yah-ei SHEMBÜPA kü lanei shuohjema,

³hapa shennyaki yiü hatü chokbenüng hetlem lemphü kübü yanei nyuhen, hatü yiüji neyinghen vongbong. Jomi nyalingngupai yiü nevaijü nyalingngupai vantükpü nehahhen vongbong.

⁴Jom Nazirit vaipü mong aa thahshi büpai nyalingngupai kübü vampü vang nevaijü nyalingngupai shuw meheyao nehahhen.

⁵Jom Nazirit shei lahtü nyupü thahshi jomei sho nevaijü jumum nejaphen. SHEMBÜPA kü lanei shuohpü hepak mangpeih thahshi jom daülangpü nyüke; jomi sho hatü jumum lushi banhen vongbong.

⁶SHEMBÜPA kü lanei shuohpü hepak yangkemei kü jomi mahng yopailei neheihhen vongbong.

⁷Laophülei pa nevaijü nyü, jeihinaü nevaijü nyahinaü dijao jomphong nangkü shei jom nedaüi neleihen vongbong; mehenangkü jom Kahvang kü lanei shuohpü nyangeihepü jomei sho hatü jumum nyüke.

⁸Jom Nazirit shennyak vaipü thahshi Kahvang kü daüei lanei shuohtükpü yangnyu nyüke.’ ”

⁹Jom nyushi ngangahük kü shennyak hanei diyei jomi daütükpü sho nyettükjema, nyih nyetpabü kü-ang jom daülangi leihen.

¹⁰Nyih shetpabü kü jomi athuba nyi nevaijü khakhi ouha nyi ashakshem shadenei ngongpa touei yah-ei peihen.

¹¹Ngongpai hük yah-ei mang moila hatü hükpa yah-ei jakpü moila jomei mang tükhen shingvaishi shuohhen; mehenangkü jom mahng touei nyupai mang thahteke. Hapa nyih-üng jomi laophülei shangjing daütükhen,

¹²hatü jom Nazirit vaihen lanei shuohpü hepak shingvaishi jom SHEMBÜPA kü shao daühühen vongbong. Sheleipü nyihthü ne-ithen; mehenangkü daütükpü shangjing nyettükteke. Jomi pungpü mang shingvaishi vangbong hük lompü mi chebaongha hük shuohhen vongbong.

¹³Hapayü Nazirit shennyak hük jom lanei shuohpü hepak lomjü dükhen shahkungnyü nyüke. Jom ashakshem shadenei peihen,

¹⁴hatü SHEMBÜPA kü jakpü moila shuohhen kawhikang neshiüpü vangbong hük lompü mi chebaongha hük, mang moila shuohhen vangbong hük lompü kawhikang neshiüpü mi chebiha hük, mongjempü moila shuohhen kawhikang neshiüpü mi chebaongha hük shei moila koei peihen.

¹⁵Ha mü chemi jomi hahying moila, yiü moila, daw neshih-i lingpü aan mühdow hük, atta hatü olive mainga nyi nyettü lingpü aan, hatü olive mainga nyettü oukpü baünyangpü aan koei peiyei moilahen.

¹⁶Ngongpai hathü kemei SHEMBÜPA kü shuohhen, hatü jomi mang moila hatü jakpü moila shuohhen.

¹⁷Hahying hatü yiü moila mü chemi jomi daw neshihpü aan mühdow hatü mi chebaongha nyi mongjempü moila shuohhen.

¹⁸Ashakshem shadenei hapa Nazirit shennyak yaonghütü jomei sho kupei mongjempü moila jakpü awbhaong kü jakhen.

¹⁹Nazirit shennyaki jom daüei sho kuptükpheikü ngongpai cheüei nyupü mi bhag hük, hatü chetlüpü aan hük, hatü baünyangpü aan hük mühdow leipü yah-ei jomei lak kü shuohhen.

²⁰Hapheikü ngongpai hathü SHEMBÜPA kü hayaoha thintho kei shuohhen, milei khaapa hatü shüüng ngongpalei hean nyüke, hatü ha mü chemi hathüyü daülangpü moila hean ngongpathü shing nyüke.

²¹Hathü shahkungü Nazirit shennyak hük shingvaishi nyüke, shejao Nazirit shennyak hüki jomi shuohhen jiüpü mü lenei shuohhen lahjema, jomi lahpü keiha jiüshi dükhen vongbong.

²²SHEMBÜPAi Mosa kü,

²³“Aaron hatü chehathü kü Israel am kü moihimanei phopshingkü hapakei etuh” shei eteke:

²⁴“SHEMBÜPAi am moihimantuh, hatü jungei angtuh.

²⁵SHEMBÜPAlei dhe am kü khanghütuh, hatü phahjituh.

²⁶SHEMBÜPAlei dhe am philei meetuh, hatü am mü chingmei nyutuh.

²⁷Shejüang jomi ngelei men Israel am kü baonghen, hatü ngei jom kü moihimanhen.”